Read Te Tusi Tapu I Te Gana Tuvalu Lomiga Lua IELEMIA 52 Bible Online

IELEMIA 52 - Te Tusi Tapu I Te Gana Tuvalu Lomiga Lua bible

IELEMIA 52

¹A Setekaia ne fai mo tupu o Iuta ka ko luasefulu tasi ei ona tausaga, kae ne fai mo tupu i Ielusalema i tausaga e sefulutasi. A tena matua ko Amutala, te tama fafine a Ielemia tela e nofo i te fa'kai o Lipina.

²A te Tupu ko Setekaia ne agasala ki te Aliki, e pela eiloa mo te mea ne fai ne te Tupu ko Ieoiakimo.

³A te Aliki ko oko eiloa i tena kaitaua ki tino Ielusalema mo Iuta, tela la, ne ave keatea ei ne Ia a latou mai i ona mua. Ne teke atu a Setekaia ki a Nepukanesa, te tupu o Papelonia,

⁴ tena la, ne vau ei a Nepukanesa mo tena kautau katoa o taua atu ki Ielusalema i te po sefulu o te sefulu o masina i te iva o tausaga o te nofoaiga a Setekaia. Ne manava latou i tua o te fa'kai, faite a fakatuga one fakatamilo i te fa'kai, mo olotou kake ki loto,

⁵kae ne nikoi eiloa pena ne latou ke oko ki te sefulutasi o tausaga o te nofoaiga a Setekaia.

⁶I te po iva o te fa o masina i te tausaga foki eiloa tena, ka ko te oge ko oko eiloa i te fai malosi, tela ko seai ne meakai e maua ne tino mo olotou kai,

⁷ tena te taimi ne ofa ei ne te fili a pui o te fa'kai. E ui eiloa e nikoi te fa'kai ne te kau Papelonia, kae ne sao katoa eiloa a sotia i te lotou telega keatea mo te fa'kai i te po. Ne ui atu latou i te fatoaga o te palesi, ulu atu i loto i te auala tela e soko i ei a te ava pui, tele atu eiloa i te auala ki te Vanu o Iolitana.

⁸Ka ko te kautau Papelonia ne olo o afuli a te Tupu ko Setekaia, maua atu eiloa ne latou a ia i te laukele laugatasi i tafa o Ieliko, ka ko ana sotia ne tele katoa kae tiakina a ia.

⁹Ne avatu Setekaia ki mua o te Tupu ko Nepukanesa, tela e nofo i te fa'kai o Lipila i te koga fenua o Hamata, i kona ne fai ei ne Nepukanesa a te ikuga o Setekaia.

¹⁰Ne tamate foki ne Nepukanesa a tama tagata a Setekaia i kona i Lipila, ka ko Setekaia e pula atu eiloa ona mata. Ne fai foki tena fakatonuga ke tamate a ofisa o Iuta.

¹¹ Oti aka, fai ei tena fakatonuga ke kape a kanomata o Setekaia kae saisai ki filifili, kae ave ki Papelonia. Ne nofo pagota eiloa a Setekaia i Papelonia ke oko ki te aso ne mate ei.

¹²I te po sefulu o te lima o masina i te sefuluiva o tausaga o te nofoaiga a Nepukanesa, te tupu o Papelonia, ne ulu atu ei a Nepusalatana, te tagata fakatonutonu a te tupu, kae ko te takitaki foki o tena kautau, ki loto i Ielusalema.

¹³ Ne sunu ne ia a te Faletapu, te palesi, mo fale o tino maluga i Ielusalema;

¹⁴ka ko ana sotia ne ofa ki lalo ne latou a pui o te fa'kai.

¹⁵Tena ne ave ne Nepusalatana ki Papelonia[45] a tino kona e toe i te fa'kai, ko tino apo i galuega, mo tino kola ne tele mai i te kau Papelonia.

¹⁶Kae ne tuku ne ia i Iuta a nisi tino mativa eiloa, kola e seai ne laukele o latou, kae ne fakagalue ne ia i togavine mo fatoaga.

¹⁷ Ne ofa likiliki ne tino Papelonia a pou palasi mo ka i te Faletapu, fakatasi mo te tani palasi lasi eiloa, kae ne ave ne latou a palasi kona ki Papelonia.

¹⁸Ne ave foki ne latou a sevolo, mo mea tuku lefu kola e fakaaoga i te fuluga o te fata-fai-taulaga, pela foki a mea e fakaaoga i te tausiga o moli, mo pola kola e tali ei a toto o taulaga, mo pola kola e sunu i ei a mea manogi, mo nisi mea faigaluega palasi kola e fakaaoga i sauniga i loto i te Faletapu.

¹⁹Ne ave ne latou a mea katoa kola ne faite ki aulo mo siliva: ko pola foliki, ko ulo kola e ave i ei a malala ka, ko pola e tali i ei a toto o taulaga, ko mea tuku lefu, ko tulaga o moli, ko pola e tuku ei mea manogi, mo pola kola e ligiligi sale ei a taulaga uaina.

²⁰A mea palasi kola ne faite ne te Tupu ko Solomona mo te Faletapu — ko pou e lua, ko ka, ko te tani lasi, mo pulumakau palasi e sefululua kola e tu i ei te tani — a mea kona ko to māfa se mafai o fua.

²¹A pou kona e lua e pau eiloa: e taki 8 mita te maluga kae lima tesimale tolu mita te pukupuku. E pū a koga i loto, ka ko te fiti i ei e tusa mo te fitusefulu lima milimita te matolu. I luga o pou kona, e isi ne ulupou e taki lua tesimale lua mita i te maluga, kae i feitu katoa e koli i ei a ata o pomekalanite, ne faite katoa foki ki palasi.

²³E selau pomekalanite palasi i te pou e tasi, pena foki te sua pou, kae e ivasefulu ono fua e mafai o matea mai i lalo i te laukele.

²⁴Ne ave fakapagota foki ne Nepusalatana a Selaia, te Faitaulaga Sili, Sefanaia te faitaulaga tafa ki a Selaia mo te tokotolu ofisa taua aka foki o te Faletapu.

²⁵Konei a tino ne puke mai ne ia mai i te fa'kai: ko te ofisa tela ne takitaki i kautau, e tokofitu tino fakatonutonu a te tupu kola koi nofo mai eiloa i te fa'kai, ko te tokolua ki te takitaki o kautau, tela e tausi ne ia a tusi o te kautau, mo te onosefulu tagata maluga aka foki.

²⁶Ne avatu ne Nepusalatana a latou kona ki te tupu o Papelonia, tela e nofo i te fa'kai o Lipila,

²⁷i te koga fenua o Hamata. I kona ne fakasaunoa ne ia latou kae tamate. Tena la, a tino Iuta ne ave fakapagota ki Papelonia.

²⁸Tenei te fuainumela o tino kola ne ave fakapagota ne Nepukanesa: i te fitu o tausaga o tena nofoaiga, ne ave ne ia e tusa mo te 3,023,

²⁹i te sefuluvalu o tausaga o tena nofoaiga, e 832 mai i Ielusalema;

³⁰kae i te luasefulu tolu o tausaga o tena nofoaiga, e 745 — ko Nepusalatana ne feagai mo te potukau kona. A te katoaga, e tusa mo te 4,600 tino ne ave fakapagota.

³¹I te tausaga tela ne fai ei a Evilemalota mo tupu o Papelonia, ne fakaasi tena alofa ki te Tupu o Iuta ko Ieoiakini, i te fakasaolotoga ne ia mai i te falepuipui. Ne fai te mea tena i te po luasefulu lima o te sefululua o masina o te tolusefulu fitu o tausaga talu mai te taimi ne ave fakapagota ei a Ieoiakini.

³²Ne fai fakalei eiloa a ia ne Evilemalota kae avatu ki a ia se tulaga tela e maluga atu i tulaga ne ave ne ia ki nisi tupu kola ne aumai fakapagota foki ki Papelonia.

³³Tena la, ko talia ne te tupu ke tapale keatea a gatu pagota o Ieoiakini, kae ke kai faeloa i te taipola a te tupu, ke oko ki te taimi e mate ei a ia.

³⁴I aso katoa, ke oko ki te taimi e mate ei, e avatu faeloa ki a ia a te tupe mo togi a mea e manako a ia ki ei.