Read Te Tusi Tapu I Te Gana Tuvalu Lomiga Lua IELEMIA 6 Bible Online

IELEMIA 6 - Te Tusi Tapu I Te Gana Tuvalu Lomiga Lua bible

IELEMIA 6

¹Tino Peniamina, tele ke sao koutou! Tele keatea mai Ielusalema! Fakatagi te pu i Tekoa kae faka'ka aka te afi o te fakailoga i Peta Hakelema. A te mala mo te fakamaseiga ko pili o oko mai mai matu.

²A te fa'kai o Siona se fa'kai gali, kae ka ofa fakamasei.

³A tupu ka manava i kona mo olotou kautau. Ka fakatu olotou faleie i tafatafa o te fa'kai, kae ka taki nofo aka eiloa latou i koga e manako latou ki ei.

⁴Ka fai ake olotou muna penei, “Fakatoka o taua atu ki Ielusalema! Fakatoka ke toka! Tatou e taua atu i te tutonu!” Kae ka toe fai aka olotou muna penei, “Tatou ko talimuli, ko pili o po, a te malu afiafi ko gasolo mai eiloa.

⁵Tatou ka taua atu i te po; ka ofa fakamasei ne tatou a pui malosi o te fa'kai.”

⁶A te Aliki Malosi ne fakatonu ne ia a tupu konei ke kati ki lalo a lakau kae faite ne mea e mafai ei ne latou o 'to atu ki loto i Ielusalema. Ne fai ana muna penei, “Ka fakasala ne au a te fa'kai tenei, me ko 'fonu i amioga fakasaua.

⁷E pela mo te vaikeli tela e tausi tena vai ke fou faeloa, e pena Ielusalema tela e tumau faeloa o fai a amioga masei. E lagona ne au te leo o te taua mo te ofa mea i te fa'kai; e tasi te mea e lavea atu ne au i te fa'kai, ko tino masaki mo tino pakia.

⁸Tino Ielusalema, ke fai a fakalavelave konei ne tupu mo akoakoga ki a koutou, me ka se salamo koutou, ko koutou ka tiakina ne au, kae fuli te otou fa'kai ke fai mo toafa, se koga e seai ne tino e nofo i ei.”

⁹A te Aliki Malosi ne fai mai ki a au penei, “A Isalaelu ka fulu fakama, e pela me se togavine tela ne tau faka'ma fuagā vine i ei. Tela la, e tau o faka'sao ne koe a tino e mafai o faka'sao ne koe, koi maua nei se taimi.”

¹⁰Ne tali atu au penei, “Ko oi te tino e mafai o fakalogo mai ki a au manafai e faipati atu au ki a latou o polopoloki latou? Ko oko eiloa i te loto makeke kae ita ma fakalogo ki tau fekau, kae e kata ki te fekau e fai mai ne koe ke faipati atu ne au.

¹¹Te Aliki, a tou kaitaua ki a latou ko oko foki eiloa i te 'ka i loto i a au, kae ko se mafai foki eiloa ne au o taofi.” Tena kae fai mai te Aliki ki a au penei, “Ligi atu toku kaitaua ki luga i tamaliki i auala, pela foki i maopoopoga a tamataene. A tagata mo olotou avaga ka ave keatea, ke oko foki eiloa ki tino matua eiloa ka se sao.

¹²A olotou fale ka tuku atu mō nisi tino, pena foki olotou fatoaga mo olotou avaga. Ka fakasala nei ne au a tino o te fenua tenei.

¹³A tino katoa, tino maluga mo tino se maluga, e taumafai o sala tupe i auala se tonu, ke oko foki eiloa ki pelofeta mo faitaulaga e fakaloiloi ne latou a tino.

¹⁴ E fai olotou faiga e pela eiloa a pakiaga o toku fenua ne pakiaga foliki fua. E fai olotou muna penei, ‘E lei mea katoa, kae tela la, e se lei.’

¹⁵ E a, a tino nei e 'ma i mea ma'sei konei e fai ne latou? Ikai, e se tae'ma lele eiloa; e se iloa foki ne latou o lagona te ma. Tela la, ka malaia latou e pela mo nisi tino kola ne malaia. Kafai ko fakasala ne au a latou, tena foki eiloa te gataga o latou. Ko au, te Aliki, tena ne faipati atu.”

¹⁶Muna a te Aliki ki tino o tena fenua, “Tu i maga ala kae onoono. Fesili ki tino me ko fea a auala taumua, kae maise te auala tafasili i te lei. Sasale i te auala tena kae ka ola koutou i se olaga filemu.” Kae ne fai mai latou penei, “Ikai, a matou e se sasale i ei!”

¹⁷Tena ne filifili aka ei ne te Aliki ne tino tiute ke fakalogologo ki te leo o te pu. Kae ne fai mai latou penei, “A matou e se ma'nako o fakalogo ki te leo o te pu.”

¹⁸Tena la, muna a te Aliki, “Fakalogo mai koutou malo, kae onoono ki te mea ka tupu ki oku tino.

¹⁹Te lalolagi, fakalogo mai! Ka aumai ne au te masei valevale ki tino konei, ko te fakasalaga tena o latou ona ko olotou aofaga masei, me ne 'teke ne latou aku akoakoga kae seki fakalogo mai ki aku muna.

²⁰Se a te mea e manako au ki ei, ko mea manogi e aumai ne latou ki a au mai i Seepa, io me ko mea fakamanogi mai i fenua mao? E se talia ne au olotou taulaga, e se fiafia foki au ki taulaga e aumai ne latou.

²¹Tela la, ka fai ne au a tino konei ke siga kae takavale. A tamana mo olotou tama tagata ka 'mate, pena foki a takaga mo tuakoi.”

²²Muna a te Aliki, “E isi ne tino konei ka o'mai mai i te fenua i matu; se malo malosi mai i se koga mao ko fakatoka mo se taua.

²³Ko toka olotou kausana mo pelu, a latou ne tino saua kae se alofa. A te tele mai o latou i olotou solofanua e pela eiloa mo te gulu o te tai. Ko toka latou o taua mai ki Ielusalema.”

²⁴Muna a tino Ielusalema, “Ko oti ne lagona ne matou te tala tena, tela la, omotou lima ko fakamate, ko ulufia matou ne te manavase mo te mae, e pela me se fafine ka fai o fanau.

²⁵E se mafai ne matou o olo ki tua mo te fa'kai io me sasale i auala, me i omotou fili ko toka mo olotou meatau, kae ko oko eiloa i te lasi o te fakamataku i omotou feitu katoa.”

²⁶Muna a te Aliki ki tino o tena fenua, “Pei ki gatu lautaga kae fitifiti i lalo i lefu. Tagi fanoanoa e pela me ko fanoanoa koutou i se mate o se tama tagata e tokotasi, me i te tino tenei e vau o ta koutou e taua fakavave mai eiloa.

²⁷Ielemia, tofotofo aka oku tino, e pela me tofotofo ne koe se fiti, kae onoono atu me e pefea latou.

²⁸A latou ne tino loto makeke, e pela eiloa i te makeke mo te palasi mo te fiti. A latou ne tino ko se aoga, kae olo sale fua o gutu faitala.

²⁹A te ogaumu ko oko eiloa i te 'ka malosi, ka ko kaigā fiti ko se liu suavai. E seai se aoga o te taumafaiga o fakama a tino o toku fenua, me i tino amio masei e se ave keatea.

³⁰Ka taku latou ne kaiga se aoga, me ko oti ne tiakina ne au a latou.”