Read Te Tusi Tapu I Te Gana Tuvalu Lomiga Lua IELEMIA 7 Bible Online

IELEMIA 7 - Te Tusi Tapu I Te Gana Tuvalu Lomiga Lua bible

IELEMIA 7

¹Ne uga mai au ne te Aliki ke fano au ki te mataloa o te Faletapu, te koga e tapuaki ei a tino Iuta. Ne fai mai ki a au ke tu au i kona o folafola atu te fekau a te Aliki Malosi, te Atua o Isalaelu, ki tino kona. E penei te fekau: “Fuli ake o tou faiga, mo te olaga e ola ei koutou, kae ka tuku atu ne au ke ola eiloa koutou i konei

⁴Sa toe talitonu ki muna loi kona e fai pela, ‘Matou ko saogalemu! Mea nei ko te Faletapu o te Aliki, mea nei ko te Faletapu o te Aliki, mea nei ko te Faletapu o te Aliki!’

⁵“Fuli aka te olaga e ola ei koutou, kae sa toe faigina a mea kona e fai ne koutou. Faka'pau ne koutou a tino katoa, kae sa fapito ki se tino.

⁶Sa toe fakatogafiti ne koutou a tino fakaalofa, tamaliki seai ne matua, mo fafine ko 'mate olotou avaga. Sa toe tatino i te fenua tenei. Sa toe tapuaki atu ki nisi atua, i a koutou ma 'ta fakapalelegina.

⁷Kafai e fuli otou uiga, kae ka tuku atu eiloa koutou ke nofo i te fenua tenei, te fenua ne tuku atu ne au ke fai mo tofi tumau o otou tupuga.

⁸“Kiloke, a koutou e talitonu fua ki muna 'loi.

⁹A koutou e kaisoa, e tatino, e mulilua, e faipati ki te loi i taimi e fai ei otou tautoga, e ofo otou taulaga ki a Paala, kae tapuaki atu ki atua kola e seki iloa eiloa ne koutou i aso mua.

¹⁰E fai ne koutou a mea konei e takalialia au ki ei, ka oti ko o'mai ei koutou o 'tu i oku mua, i toku Faletapu, kae fai ake koutou penei, ‘A matou e saogalemu faeloa!’

¹¹ I te otou fakatau a toku Faletapu se koga 'muni mo tino kaisoa? Ko oti ne lavea ne au otou mea kona e fai.

¹² Olo ki Sailo, [4] te koga muamua eiloa tela ne filifili ne au ke fai mo koga e tapuaki mai ei a tino ki a au, ke kilo koutou ki te mea ne fai ne au ki ei ona ko agasala a toku fenua ko Isalaelu.

¹³Ne fai ne koutou a agasala katoa konei, kae e ui eiloa e faipati soko atu au ki a koutou, e se mafai eiloa koutou o fia fakalogo mai. E seki tali mai foki eiloa koutou i te taimi ne kalaga atu ei au ki a koutou.

¹⁴Tela la, a te mea ne fai ne au ki Sailo, ka toe fai foki ne au ki toku Faletapu tenei e fakalagolago koutou ki ei. I luga i te koga tenei, te koga ne tuku atu ne au ki otou tupuga, pena foki ki a koutou, ka fai ne au ki ei te mea pela mo te mea ne fai ne au ki Sailo.

¹⁵Ka afuli ne au koutou keatea mai i oku mua, e pela mo te afuliga keatea ne au a otou taina kola ko te kau Isalaelu. Ko au, te Aliki, tena ne faipati atu.”

¹⁶Muna a te Aliki, “Ielemia, ke mo a eiloa koe e talo mo tino konei. Sa tagi io me talo mo te lei o tino konei; sa fakamolemole mai ki a au, i a au e se mafai o fakalogo atu ki a koe.

¹⁷E se lavea ne koe a olotou mea konei e fai i fa'kai o Iuta, pela foki i auala o Ielusalema?

¹⁸ A tamaliki e fakaputu fafie, a tagata e faka'ka afi, ka ko fafine e palu puta falaoa mo keke ma te atua fafine tela e fakaigoa ne latou ko te Tupu Fafine o te Lagi. E ligiligi atu foki ne latou a taulaga uaina ki nisi atua, ko te mea ke fakamae ne latou a au.

¹⁹I te lotou fakatau ko au tenei e fakamae ne latou? Ikai, ko latou foki eiloa e mae i olotou mea e fai, e fakamasiasigina foki eiloa latou ne latou eiloa.

²⁰Tela la, a au, te Aliki Sili, ka ligi atu toku kaitaua fakamataku ki te Faletapu tenei. Ka fakaoko atu ne au ki luga i tino mo manu, pela foki ki lakau kaina mo lakau lasi. A toku kaitaua ka pela me se afi tela e se mafai ne se tino o tamate.

²¹“Toku fenua, e isi ne taulaga a koutou kola e sunu kātoa i luga i te fata-fai-taulaga, ka ko nisi taulaga e mafai o kai ne koutou. Ka ko au, te Aliki, e fai atu ke kai katoa ma koutou.

²²E seki ai ne fakatonuga kai tuku atu ne au ki otou tupuga e uiga ki taulaga 'sunu io me ko nisi vaega taulaga aka foki, i te taimi ne aumai ei ne au latou keatea mai i Aikupito.

²³Ne fakatonu ne au latou ke faka'logo mai ki a au, ko te mea ke fai au mo Atua o latou, ka ko latou ke fai mo oku tino. Ne fai foki au ki a latou ke ola i se olaga lei, e pela eiloa mo taku fakatonuga ki a latou, ko te mea ke solosolo lei a mea katoa mō te lei o latou.

²⁴Kae tela la, seki saga mai lele eiloa ki aku pati e fai atu, se fia fakalogo mai foki ki a au, kae ne saga eiloa o fai a mea masei kola e loto latou o fai, tela la, e se gasolosolo mai o lei kae gasolosolo eiloa o masei.

²⁵Ne tumau eiloa te uga sale atu ne au o aku tavini ko pelofeta ki a koutou, talu mai te aso ne tiaki ei ne otou tupuga a te fenua o Aikupito, ke oko mai ki te aso tenei.

²⁶Kae e seai eiloa se tino ne saga tonu atu o fakalogo ki a latou. Ne gasolo fua eiloa koutou o loto makeke kae loto 'teke atu i lo otou tupuga.

²⁷“Tela la, e Ielemia, ka faipati atu ne koe a pati katoa konei ki tino o toku fenua, kae ka se mafai eiloa o faka'logo mai ki a koe; ka kalaga atu koe ki a latou, kae se mafai eiloa o tali mai.

²⁸Ka fai koe ki a latou i te lotou malo e se fakalogo mai ki a au, te Aliki te lotou Atua, e se salamo foki latou i fakasalaga ne oko ki a latou. A te fakatuanaki ko mate, ko se toe takutaku eiloa ne tino.

²⁹“Tagi fanoanoa, koutou tino Ielusalema; Kati otou laulu kae 'pei keatea. Usu se pese o te mate i luga i ulu o mauga foliki, Me i a au, te Aliki, ko kaitaua, Kae ko ita foki au ki toku fenua.

³⁰“A tino Iuta ko oti ne fai ne latou se amioga masei. Ne ave olotou tupua kola e takalialia au ki ei, o tuku i toku Faletapu, tela la, ko fakalailai ne latou toku Faletapu.

³¹ Ne faite ne latou te fata-fai-taulaga e igoa ko Tofeta i te Vanu o Hinomo, ko te mea ke 'sunu i ei olotou tama tagata mo tama fafine e fai mo taulaga a latou. E seki fakatonu ne au ke fai ne latou se mea pena — e seki mafaufau lele eiloa au ki se mea pena.

³²Tela la, e oko mai te taimi e se toe fakaigoa ei ko Tofeta io me ko te Vanu o Hinomo, kae ka fakaigoa ko te Vanu o Tatino. Ka tanu ne latou a tino i kona, me ko seai aka foki eiloa se koga mo tanu latou.

³³A foitino mate ka fai mo meakai a manu eva mo manu vao, kae ka seai se tino ke afuli ne ia a manu kona keatea.

³⁴A te fenua tena ka fai mo toafa. Ka fakagata ne au a leo o te lifu mo te fiafia, pela foki a fakafiafiaga o faiga o avaga, i fa'kai o Iuta pela foki i auala o Ielusalema.