Read Te Tusi Tapu I Te Gana Tuvalu Lomiga Lua IELEMIA 8 Bible Online

IELEMIA 8 - Te Tusi Tapu I Te Gana Tuvalu Lomiga Lua bible

IELEMIA 8

¹“I te taimi tena, a ivi o tupu mo tino maluga i Iuta, pela foki a ivi o faitaulaga mo pelofeta, mo ivi o nisi tino kola e nofo i Ielusalema, ka avake mai i olotou tanuga.

²E se fakaputu o tanu, kae ka pela me ne kaiao i luga o te laukele. Ka fakatafola a ivi kona i lalo o te la, te masina mo fetu. A tino kona ne fiafia kae tavini sale ki te la, te masina mo fetu; ne kalaga sale ki ei kae tapuaki ki ei.

³Tela la, a tino o te malo masei tenei kola koi ola mai, kae e nofo nei i koga ne fakasalalau ne au ki ei latou, ka fiafia atu o mate i lo te ola mai i te olaga nei. Ko au, te Aliki Malosi, tena ne faipati atu.”

⁴A te Aliki ne fai mai ki a au ke faipati atu au ki tena fenua penei, “Kafai se tino ko siga ki lalo, e a, e se tu aka a ia ki luga? Kafai se tino ko piko keatea mo te ala, e a, e se foki mai a ia ki ei?

⁵Ka ko koutou toku fenua, ai a ne fulitua mai ei koutou ki a au kae ko se toe foki mai? E piki mau koutou ki otou tupua, kae ita eiloa ma foki mai ki a au.

⁶Ne fakalogologo fakalei atu eiloa au, ka ko koutou e seki faipati ki te mea tonu. E seai eiloa se tino i a koutou kai fanoanoa ona ko ana uiga masei; e seki ai eiloa se tino i a koutou kai fesili aka penei, ‘Se a te mea se ko oti ne fai ne au?’ A tino katoa e fakatau olo eiloa i te auala e ma'nako latou o olo i ei, e pela me se solofanua tela e tele kini atu ki loto i te taua.

⁷A matuku e iloa ne latou te taimi e tau ei latou o foki ki olotou ofaga; a lupe, sualou mo tuluse e iloa ne latou te taimi e foki atu ei latou. Ka ko koutou toku fenua, e se iloa ne koutou a tulafono kola e takitaki ki ei ne au koutou.

⁸E mafai pefea o fai mai koutou i a koutou e poto kae e iloa foki ne koutou aku tulafono? Kiloke, a tulafono ko palele ne fulifuli valevale ne faiakoga o te tulafono kola e se fakamaoni.

⁹A otou tagata poto ko fakamasiasigina; ko numi valevale, kae ko se maua o fai se mea. Ne 'teke ne latou aku muna; se a te vaega poto tenei e nofo mo latou?

¹⁰Tela la, ka tuku atu ne au olotou fatoaga ki nisi tino, mo olotou avaga foki ka tuku atu ki nisi tagata. A tino katoa, tino maluga mo tino se maluga ko taumafai katoa o sala tupe i auala se tonu. Ke oko foki eiloa ki pelofeta mo faitaulaga ko fakaloiloi ne latou a tino.

¹¹ E fai olotou amioga e pela eiloa a pakiaga o oku tino ne pakiaga foliki fua. E fai olotou muna penei,‘E lei a mea katoa,’ kae tela la, e se lei lele eiloa.

¹² Toku fenua, a koutou na e ma i mea se lei konei ne fai ne koutou? Ikai, a koutou e se taema; e se iloa foki ne koutou o mata mā! Tela la, ka takavale koutou e pela mo nisi tino; kafai ko fakasala koutou ne au, ko te gataga foki eiloa o koutou tena. Ko au, te Aliki, tena ne faipati atu.

¹³“Au e manako o fakamaopoopo a tino o toku fenua, e pela me se tino e fakaputu a fua o te taukai; ka ko latou ko pela me se vine tela e seai ne fuagavine i ei, pela me se mati tela e seai ne fuaga mati i ei, mo lau foki ko magemage. Tela la, ko oti ne talia ne au a tino mai i tua ke 'fao malo ne latou a te laukele o toku fenua.”

¹⁴Ne fesili aka a tino o te fenua o te Atua penei, “Ai a e sagasaga filemu ei tatou?” O'mai i tatou ka tele ki fa'kai kola ko oti ne pui ke malosi, ke mate tatou i ei. A te Aliki ko oti ne fakamalaia ne ia tatou ke 'mate; ko oti ne aumai ne ia a te poisini ke inu tatou ki ei, me i a tatou ne agasala ki a Ia.

¹⁵Ne fakamoemoe tatou ki te filemu mo te fakaleiga ki o tou pakiaga, kae ko seai eiloa se aoga; ko te mataku fua tena ne oko mai.

¹⁶A omotou fili ko nofo nei i te fa'kai o Tanu; e lagona ne matou te tagi o olotou solofanua. A te fenua katoa e galulu manafai ko 'tagi a olotou solofanua. A o'tou fili ko o mai o 'ta fakamasei a te tou fenua, fakatasi mo mea katoa i ei, te tou fa'kai mo tino katoa i ei.”

¹⁷Muna a te Aliki, “Ke pula otou mata! Ka uga atu ne au a gata ki a koutou, ne gata poisini kola e se mafai o fakalata, kae ka u ne latou koutou.”

¹⁸A toku fanoanoa e se mafai o gata; au ko masaki i te loto.

¹⁹Fakalogo mai! E lagona ne au i te fenua kātoa a oku tino e tagi kae fai aka penei, “E a, ko galo te Aliki i Siona? Ko se nofo i kona a te tupu o Siona?” Ne tali mai te Aliki, te tupu o latou penei, “Ai a ne fai ei ne koutou au ke kaitaua i te tapuaki atu o koutou ki otou tupua kae Ifo atu ki atua fakaatea?”

²⁰Ne fai aka a tino penei, “A te tau vela ko palele atu, ko oti foki te taukai, Kae e seki fakasaogina eiloa matou.”

²¹A toku fatu ko fatifati Ona ko toku fenua ne ta fakamaseigina; Au e tagi fanoanoa; ko oko eiloa i toku fanoanoa.

²²E a, e seai ne vailakau i Kileata?[5] E seai ne tokita i kona? Ai a la e seki fakalei ei a pakiaga o tino o toku fenua?