Read Te Tusi Tapu I Te Gana Tuvalu Lomiga Lua IELEMIA 9 Bible Online

IELEMIA 9 - Te Tusi Tapu I Te Gana Tuvalu Lomiga Lua bible

IELEMIA 9

¹Aku muna eiloa i toku ulu se vaikeli e fonu i te vai Mo oku mata se punavai o loimata, Ko te mea ke mafai ne au o tagi i ao mo po ona ko te tamatega o oku tino.

²Aku muna eiloa ke isi se koga mo oku nofo i te toafa, Ko te mea ke galo atu au keatea mai oku tino. A latou ne tino se fakamaoni katoa, Ne tino masei katoa.

³E toka faeloa o faipati ki muna loi; A te se fakamaoni ko pule ne ia a te fenua, Ko se pule te mea tonu. Muna a te Aliki, “A oku tino ko fai soko faeloa ne latou a amioga masei, Kae ko se taku eiloa ne latou a au ko te lotou Atua.”

⁴A tino katoa ko tau o nofo fakaeteete i olotou taugasoa, Kae ko seai eiloa se tino e talitonu ki tena taina; Me i tautaina ko fakatau fai togafiti katoa e pela mo Iakopo; A tino katoa ko fakatau amio masei ki olotou taugasoa.

⁵Ko fakatau 'taki se ne latou olotou taugasoa, Kae ko seai eiloa se tino e faipati ki te mea tonu; Ne fakaakoako ne latou olotou laulaufaiva ke poto i te loi Kae se mafai o tiaki olotou uiga masei. E se manava eiloa te fai ne latou o amioga fakasaua, Pela foki amioga fakaloiloi. Muna a te Aliki i tena fenua ko teke ki a ia.

⁷Ona ko te mea tena, ko ala ei o fai mai a te Aliki Malosi penei, “Ka faka'ma ne au oku tino e pela me se fiti, Kae tofotofo foki latou. A toku fenua ko oti ne fai ne latou a amioga masei — Se a foki la te mea ka fai ne au ki a latou?

⁸A olotou laulaufaiva ko pela me ne matasana fakamataku; E faipati faeloa latou ki te loi. A tino katoa e faipati faka'lei sale fua ki lotou tuakoi, Kae tela la, e fakatoka ne latou ne togafiti e malei ei latou.

⁹E a, e se fakasala ne au latou ona ko mea konei e fai ne latou? E a, e se taui atu ne au ki se malo penei, E tusa mo olotou uiga ma'sei? Ko au, te Aliki, tena ne faipati atu.”

¹⁰Ne fai atu au penei, “Au ka tagi fanoanoa ona ko mauga, Pela foki a malae moukua, Me ko seai ne vai i ei, Kae ko seai foki ne tino e olo sale i ei. Ko se lagona atu a leo o pulumakau; A manu eva mo manu vao ko 'sola kae ko galo atu.”

¹¹Muna a te Aliki, “Ka ofa ne au a Ielusalema ke maofa valevale, Ke fai mo koga e nofo ei a manu vao ko tiakolo; A fa'kai o Iuta ka liu toafa, Te koga e seai ne tino e nofo i ei.”

¹²Ne fesili atu au penei, “Te Aliki, ai a ko masei valevale ei a te fenua, kae ko malō faka eiloa pela me se toafa, ko ala ei o seai ne tino fai malaga e ui sale i loto i ei? Ko oi te tino e lava tena poto o malamalama i te mea tenei? Ko oi te tino ne fakamalamalama ne koe ki ei, ko te mea ke mafai o fakaasi atu ne ia ki nisi tino?”

¹³Ne tali mai te Aliki, “Ne tupu te mea tenei ona ko oku tino ne tiakina ne latou aku akoakoga kola ne tuku atu ki a latou. E seki faka'logo mai ki a au, seki fai foki ne latou a mea ne fai atu ne au ki a latou.

¹⁴Ne tumau eiloa te loto makeke o latou, kae ne tapuaki atu eiloa ki tupua o Paala, e pela eiloa mo te mea ne akoako atu ne olotou tamana ki a latou.

¹⁵Tela la, fakalogo mai ki te mea ka fai ne au, te Aliki Malosi, te Atua o Isalaelu: ka tuku atu ne au ki oku tino a lakau kona ke kai ne latou, mo meainu poisini ke inu ki ei.

¹⁶Ka fakasalalau ne au latou ki malo fakaatea kola e seki iloa eiloa ne latou, seki iloa foki ne olotou tupuga. Ka uga mai ne au a kautau ke ta fakapalele eiloa latou.”

¹⁷Muna a te Aliki Malosi, “Mafaufau ki te mea tenei ko tupu! Kalaga atu ki tino tagi fanoanoa ke o'mai, Ki fafine kola e usu ne latou a pese o te mate.”

¹⁸Muna a tino o te fenua penei, “Fai ki ei ke usu fakavave mai se pese mate mo matou, Ke fonu omotou mata i loimata, Ke 'siu foki omotou fifi mata i te tagiga.”

¹⁹Fakalogo aka ki te leo o te tagi i Siona, “Matou ko masei valevale! Matou ko masiasi! Ko tau o tiaki ne matou a te motou fenua; A omotou fale ko maofa valevale.”

²⁰Ne fai atu au penei, “Fakalogo ki te Aliki, koutou fafine, Kae saga tonu atu ki ana muna. Akoako atu otou tama fafine ke iloa o 'tagi fanoanoa, Pela foki otou taugasoa ke iloa o usu a pese o te mate.

²¹A te mate ko ulu mai fua i omotou fakamalama Kae ulu mai ki loto i omotou palesi; Ko 'ta ne ia a tamaliki i auala Pela foki a tamataene i te maketi.

²²A foitino mate ko salalau valevale, Pela me ne fakatuga kaiao i fatoaga, Pela me ne saito kola ko oti ne kati kae ne tiaki ne te kau kati saito, Ko saito kola ko seai ne tino e tae aka ne latou. Tena te mea ne fai mai ne te Aliki ke fai atu ne au.”

²³Muna a te Aliki, “A tagata poto e se tau o fakamatamata i te lotou poto, Pena foki tagata 'mafi e se tau o fakamatamata i olotou mafi, A tagata maumea foki e se tau o fakamatamata i te lotou maumea.

²⁴ Kafai se tino e fia fakamatamata, E tau o fakamatamata me e iloa ne ia a au, Kae malamalama foki i oku uiga, Me i toku alofa e tumau, kae e fai foki ne Au a te mea tonu mo te fakamasinoga tonu Kona a mea e fiafia au ki ei. Ko au, te Aliki, tena ne faipati atu.”

²⁵Muna a te Aliki, “E oko mai eiloa te taimi e fakasala ei ne au a tino Aikupito, tino Iuta, tino Etoma, tino Amoni, tino Moapi, mo tino o te toafa kola e kati mutu olotou ulu. A tino katoa konei ne pilitome, kae e seki tausi fakalei eiloa ki te feagaiga tela e 'tau o tausi ne latou. E seai eiloa ne tino i konei, io me ko tino Isalaelu kai tausi ki taku feagaiga.”