Read Te Tusi Tapu I Te Gana Tuvalu Lomiga Lua TAGIGA A IELEMIA 1 Bible Online

TAGIGA A IELEMIA 1 - Te Tusi Tapu I Te Gana Tuvalu Lomiga Lua bible

TAGIGA A IELEMIA 1

¹Ielusalema te fa'kai ne masani o fonu sale i tino, Ko tu fakaalofa fua me ko seai ne tino i ei. Se fa'kai ne fakaaloalogina ne te lalolagi, Kae nei ko pela me se fafine ko mate tena avaga. A te fa'kai tafasili i te takutakua ko nofo pologa nei.

²I po katoa, e tagi faeloa a ia, mo ona loimata e sofi ifo i ana kalafau. E seai eiloa se taugasoa mua o ia e nofo mai o fakamafanafana a ia. A taugasoa o ia ko fulitua ki a ia, kae ko ita foki ki a ia.

³A tino Iuta ko ave fakapologa, Ki se fenua e mao mai te lotou fenua.[1] E nofo latou i fenua fakaatea, i koga e se o latou, Ka ko fili o latou e nofo mai i feitu katoa o latou, Ko seai ei se koga e mafai o sao latou i ei.

⁴Ko seai nei se tino e vau ki te Faletapu o fai tapuakiga i aso fakamanatu. A tamafine usu pese i kona ko puapuaga, mo faitaulaga ko oko eiloa i te fita. A mataloa o te fa'kai ko tu aliali mai, a Siona ko vaivai i te fanoanoa.

⁵Ko manumalo a fili o Ielusalema me ko pule ne latou Ielusalema. Ko te Aliki ne fakapuapuaga ne ia e tusa eiloa mo ana agasala e uke ne fai; A tamaliki a ia ko oti ne ave fakapagota ki se fenua fakaatea.

⁶A te fa'kai o Ielusalema se fa'kai gali, Kae nei ko oti atu tena gali. A ona takitaki ko pela me ne tia kola ko vaivai faka eiloa i te fiakai, Me i olotou malosi ko gasolo eiloa o seai i te taimi e 'tele ei latou ke sao mai olotou fili.

⁷A Ielusalema nei ko masei valevale, kae nei, ko toe fakamasau'sau ki tena gali i aso mua. I te taimi ne takavale ei a ia i ana fili, e seai eiloa se tino ke fesoasoani atu ki a ia; A tino ne fakatakavale ne latou a ia e kata atu i a ia ko takavale.

⁸A tena tulaga maluga ko seai; ko nofo fuafua a ia kae ko se fiafia foki a tino ki a ia. E tagi kae funa ona mata me ko oko eiloa i te masiasi. Ko masei Ielusalema ona eiloa ko ana agasala i te uke.

⁹Ko lavea atu eiloa tena se 'lei, kae e se saga mai eiloa a ia ki te ikuga ka oko ki a ia i ana uiga masei kona. A tena pakūga ko oko eiloa i te masei; E seai eiloa se tino e mafai ne ia o fakamafanafana a ia. Ko manumalo ona fili, kae ne kalaga a ia ki te Aliki mo se fesoasoani.

¹⁰Ne 'fao malo katoa ne ona fili a koloa o ia. Ne lavea eiloa ne ia a latou e ulu ki loto i te Faletapu, Te koga ne fakatapu ne te Aliki a tino fakaatea ma ulu ki ei.

¹¹A tino Ielusalema ko vaivai eiloa i te salasalaga ki ne meakai; E avatu ne latou olotou koloa ke sui mai ki meakai ke ola latou. Ne tagi Ielusalema penei, “Te Aliki, kilo mai ki a au, Kilo mai ki toku puapuaga.”

¹²E penei eiloa ana tagi ki tino katoa kola e fakasili aka i ona tafa,[2] “Kilo mai ki a au!” E seki ai eiloa se tino kai 'mae penei mo au, Ko te 'mae ne aumai ne te Aliki ki a au i te taimi ne kaitaua ei a ia.

¹³“Ne aumai ne ia te afi mai te lagi tela ne 'paku ei oku ivi. Ne fakatakato ne ia se malei mo oku, Tena ne fakasiga ei ne Ia au ki lalo i te laukele. Oti aka, tiaki ei ne Ia a au i a au ko vaivai.

¹⁴“Ne fakamau ki lalo ne Ia aku agasala katoa, Kae sai fakatasi katoa ne Ia, Kae safe ne Ia ki toku ua, tena la, ko vaivai faka eiloa au i te 'mafa. A te Aliki ne tuku ne Ia a au ki oku fili, Tela la, ko seai se mea e mafai o fai ne au ki a latou.

¹⁵“Ne fakalili ne te Aliki aku sotia mafi eiloa; Ne aumai ne Ia se kautau o 'ta taku kau tamataene. Ne nutipala ne Ia oku tino e pela me ne vine e kumi i te koga 'tau vine.

¹⁶“Tena te mea ko lofia ei oku mata i loimata. E seai se tino e mafai ne ia o fakamafanafana au; E seai foki se tino e mafai ne ia o fai au ke toa. Au ko takavale i oku fili; Ko seai eiloa se mea a oku tino e 'toe.

¹⁷“E fola atu toku lima, kae seai eiloa se tino e fesoasoani mai ki a au. A te Aliki ne aumai ne ia oku fili ke taua mai ki a au mai oku feitu katoa; Ne fai ne latou a au e pela me se mea masei.

¹⁸“A te Aliki e fai mea tonu, ka ko au ne seki fakalogo ki a Ia. Tino katoa i so se koga, fakalogo mai ki a au; Kilo mai ki a au i au ko 'mae valevale. A tamataene mo tamafine ko oti ne ave fakapagota.

¹⁹“Ne kalaga au ki oku taugasoa, kae ne ita ma fesoasoani mai ki a au. A faitaulaga mo takitaki e mate fua i auala o te fa'kai, I te salaga ki ne meakai ke ola ei latou.

²⁰“Te Aliki, kilo mai ki toku fi'ta, ki te fanoanoa o toku loto! A toku loto ko fatifati i te fanoanoa e tusa mo aku agasala. A auala ko fonu i te tatino; Ke oko foki eiloa ki loto i fale, e mate foki eiloa a tino i ei.

²¹“Fakalogo [3] mai ki aku tagi fi'ta, me e seai se tino e fakamafanafana ne ia a au. A oku fili ko fiafia me ne aumai[4] ne koe te puapuaga ki a au. Fakapuapuaga aka oku fili e penei mo au, I te aso ko oti ne tauto mai ne koe.

²²“Fakaseaoga atu latou e tusa mo olotou uiga masei; Fakasala atu latou e penei mo tau fakasalaga ki a au ona ko aku agasala. Au ko tagi i toku fi'ta, kae ko vaivai foki toku loto.”