Read Te Tusi Tapu I Te Gana Tuvalu Lomiga Lua TAGIGA A IELEMIA 2 Bible Online

TAGIGA A IELEMIA 2 - Te Tusi Tapu I Te Gana Tuvalu Lomiga Lua bible

TAGIGA A IELEMIA 2

¹Ne ufi ne te Aliki a te fa'kai o Siona ki te pouliga ona eiloa ko tena kaitaua. A te gali faka‐te‐lagi o Siona ko palele ne fuli ne Ia ki te masei valevale. I te aso ne kaitaua ei a Ia, ne tiakina foki eiloa ne Ia a tena Faletapu.

²Ne ofa fakamasei ne te Aliki a fa'kai katoa i Iuta. Kae ofa foki a pui kola e puipui ei a te fenua. Ne fakamasiasi ne Ia a te malo mo ona takitaki.

³Ne fakaseaoga ne Ia a te malosi o Isalaelu i tena kaitaua; Ne ita ma fesoasoani mai ki a matou i te taimi ne o'mai ei omotou fili. Ne oso mai tena kaitaua ki a matou e pela me se afi, Tena ne fakamasei ei a mea katoa.

⁴Ne fakatonu mai ana matasana ki a matou, E pela a Ia me se fili o matou; Ne tamate katoa ne Ia a tamataene malie'lie o te motou fenua. Ne lagona ne matou i konei i Ielusalema a te 'kona o tena kaitaua.

⁵Ne ofa fakamasei ne te Aliki a Isalaelu E pela eiloa a Ia me se fili o matou. Ne ofa ne Ia a olo mo palesi o Isalaelu. Ne aumai ne Ia te fanoanoa e se gata mai ki tino o Iuta.

⁶Ne ofa likiliki ne Ia a te Faletapu, Te koga e tapuaki sale ei matou ki a Ia; Ko oti ne fakagata ne Ia a aso fakamanatu mo Sapati. Ko tupu fakatasi mo faitaulaga ko oti ne lagona ne latou te malosi o tena kaitaua.

⁷A te Aliki ko se manako ki tena fata-fai-taulaga, Kae ko fano keatea foki mai tena Faletapu; Ne talia ne Ia a te fili ke ofa ne latou a ona 'pui ki lalo. Ne kalaga latou mo te manumalo i te koga ne masani sale matou o fai tapuakiga i ei.

⁸Ko te ikuga eiloa a te Aliki ke ofa a 'pui o Siona; Ne fua fakalei eiloa ne ia a te koga tena, Ko te mea ke maofa katoa a mea katoa kona. A taoa mo pui ko maofa katoa.

⁹A mataloa o te fa'kai ko tanumia ne mea ne maofa, Mo fiti o latou ko maofa likiliki. A te tupu mo tino maluga ko nofo nei i te fenua ne ave fakapagota ki ei latou. Ko seai se tino e akoako ne Ia a te Tulafono, Mo pelofeta foki ko se maua ne latou ne fakaasiga mai i te Aliki.

¹⁰A toeaina o Ielusalema ko sagasaga fua i luga i te laukele kae se ua, Mo olotou ulu e fonu i lefu, kae 'pei fua ki lautaga. A tamafine ko punou fua olotou ulu ki lalo i te laukele.

¹¹A oku mata ko mae i te tagiga; A toku agaga ko fanoanoa. Au ko vaivai eiloa i te fanoanoa i te tāga mo te fakamaseiga ne oko ki oku tino mo toku fenua. A tamaliki mo pepe ko mata'po valevale i auala o te fa'kai.

¹²Ko tagi fua ki olotou matua me ko fiakai kae fiainu; Ko siga latou i te auala e pela eiloa me ko pakia, Kae mate lemu ifo eiloa i lima o olotou matua.

¹³Ielusalema, Ielusalema toku fa'kai fakapelepele, Se a foki taku pati ka mafai o fai atu? Ka fakamafanafana pefea ne au a koe? E seki ai eiloa se isi tino kai puapuaga fita penei mo koe. A te puapuaga tena ne oko ki a koe e seai ne ana tuakoi e pela eiloa mo te moana; E seai eiloa se fakamoemoega 'lei mo koe.

¹⁴A ou pelofeta e faipati faeloa ki te loi; A koutou e fakaloiloi faeloa ne latou i olotou lauga, Me e se mafai o fakaasi atu a otou agasala. Ne fai ne ia koutou ke mafaufau koutou pela i a koutou e 'lei faeloa.

¹⁵A tino kola e fakasili aka i te fa'kai e kilo mo te fakatauemu ki a koe. E lulu olotou ulu kae kata i a Ielusalema ko maofa valevale, kae fai mai olotou muna penei, “Mea nei ko te fa'kai tela e fai pela me se fa'kai gali?” “Mea nei ko te fa'kai tela e fakamatamata ki ei te lalolagi?”

¹⁶A ou fili e kata fakalili atu ki a koe, Kae 'pula toka atu mo te kaitaua ki a koe. E fakamasei olotou laugutu kae fai aka penei, “Ko oti ne ofa ne tatou! Tenei te aso ne fakatalitali ki ei tatou!”

¹⁷Tenei ko fakataunu eiloa ne te Aliki a te mea ne mafaufau a Ia o fai: Ko ta fakamasei ne Ia tatou mo te se alofa, E pela eiloa mo tena folafolaga ki a tatou i aso mua. Ne tuku ne Ia te manumalo ki omotou fili, Ne fakafiafia ne Ia latou i te fakatakavalega o matou.

¹⁸Ielusalema, a pui o koe ke tagi atu ki te Aliki![5] A ou loimata ke tafe pela me ne vaitafe i ao mo po; Ave tou foitino ke vaivai i te tagi fanoanoa!

¹⁹Masaua o ala soko faeloa i te po katoa o tagi sale ki te Aliki; Ligi atu a fanoanoaga katoa o tou loto ki te Aliki, Kae fakamolemole atu ki a Ia ke alofa mai ki au tamaliki kola ko mate fiakai i feitu auala katoa!

²⁰Te Aliki, kilo mai ki tino konei ko fakapuapuaga ne koe! A fafine ko kai ki foitino o tamaliki fakapelepele a latou! A faitaulaga mo pelofeta ko tamate i loto i te Faletapu!

²¹A tamaliki mo tino matua ko tafola valevale i loto i auala, A tamataene mo fafine ko mate valevale i pelu a te fili. Ne 'ta valevale ne koe latou i te taimi o tou kaitaua.

²²Ne kami mai ne koe oku fili ke mai o ta valevale matou, Kae seai eiloa se tino e mafai o sao i te aso ne kaitaua ei koe. Ne tamate ne latou aku tamaliki kola ne puti aka ne au kae pele i toku loto.