Read Te Tusi Tapu I Te Gana Tuvalu Lomiga Lua TAGIGA A IELEMIA 3 Bible Online

TAGIGA A IELEMIA 3 - Te Tusi Tapu I Te Gana Tuvalu Lomiga Lua bible

TAGIGA A IELEMIA 3

¹Au se tino ko oti ne iloa ne au a te fakasalaga a te Atua.

²Ne teke mai ne Ia a au ki te pouliga,

³Kae soko eiloa te kini ne Ia a au mo te se alofa.

⁴Ko pakiakia valevale toku foitino, kae fatifati foki ne Ia oku ivi.

⁵Ne sai ne Ia a au i loto i te fanoanoa mo te puapuaga.

⁶Ne fai malo ne Ia au ke nofo i loto i te pouliga o te mate.

⁷Ne saisai ne Ia au ki filifili; Au nei se pagota ko seai se fakamoemoega ke toe sao.

⁸Ne kalaga au ki luga mō se fesoasoani, Ka ko te Atua ne ita ma fakasao au;

⁹Au ko takasese manafai e sasale au; A 'pui fatu e pono mai faeloa i so se koga e mafuli au ki ei.

¹⁰E fakatalitali mai a Ia ki a au e pela me se ulosa; E tafuke mai a Ia ki a au e pela me se leona.

¹¹E afuli ne Ia au ki tua mo te auala, Saesae ne Ia toku foitino, Oti aka, tiakina ei ne Ia au pena.

¹²E futi aka tena kausana, Kae fai au pela me se taketi ki ana matasana.

¹³E sana mai ana matasana, Galo eiloa ki loto i toku foitino.

¹⁴A tino e kata mai faeloa ki a au i aso katoa; Au pela me se mea fai fa'kata ki a latou.

¹⁵E fainu malo ne Ia au ki vai 'kona, Kae fagai ne Ia au ki meakai 'kona mo meainu 'kona.

¹⁶E kana ne ia oku mata i lalo i te laukele Kae fatifati ne ia oku nifo i luga o kaupapa.

¹⁷Ko puli eiloa i a au a te uiga o te ola 'lei, Te filemu mo te fiafia.

¹⁸Ko se leva nei te taimi e ola ei au; A toku fakamoemoega i te Aliki ko seai.

¹⁹A toku mafaufau ki toku mae mo te seai o se koga mo oku nofo, Ko pela eiloa me se poisini i te 'kona;

²⁰Kafai e mafaufau soko au ki ei, Kae gasolo o vaivai toku agaga.

²¹Kae e isi eiloa se fakamoemoega 'lei e maua ne au mafai e mafaufau au ki te mea tenei e tasi:

²²A te alofa mo te agalei o te Aliki e tumau faeloa,

²³E fou faeloa pela mo te tafataeao, Kae mautinoa tonu eiloa, E pela eiloa mo te la e mautinoa tonu me e fanake faeloa.

²⁴Ko te Aliki fua ko toku fakamoemoega, Tela la, au e fakamoemoe eiloa ki a Ia.

²⁵A te Aliki e atafai ki a latou kola e talitonu ki a Ia,

²⁶Tela la, e sili te fakatali o tatou mo te kufaki ke fakasao ne Ia tatou.

²⁷Se mea sili i kautama tuputupu ke fakamasani ke maua ne latou a te loto kufaki.

²⁸Kafai ko puapuaga tatou, e tau mo tatou o sagasaga mo te filemu kae kufaki;

²⁹E tau mo tatou o talia te fakasalaga, Me e isi eiloa se fakamoemoega 'lei mo tatou i se taimi fakamuli.

³⁰Kafai tatou ko takavale kae ko fakaitaitagina ne nisi, E tau eiloa o talia ne tatou te 'tou takavale.

³¹A te Aliki e alofa kae se mafai o ita faeloa ki a tatou ki te se gata mai.

³²E aumai ne ia te fanoanoa i nisi taimi, Ka ko tena alofa mo tatou e iloa tonu, kae e lasi foki.

³³E se fai pela e fiafia a Ia o faka'mae Kae fakafanoanoa sale tatou.

³⁴E iloa eiloa ne te Aliki mafai ko momomo tou agaga i te fi'ta.

³⁵E iloa foki ne ia manafai ko se maua ne tatou a te saolotoga ki mea ne aumai ne ia ki a tatou;

³⁶Kafai ko piko a te fakamasinoga i te fono, e iloa foki ne Ia.

³⁷Ko te loto o te Aliki tokotasi e tau o fai sale faeloa.[6]

³⁸Ko te Aliki e 'ta ne Ia nisi tino kae fai fakalei nisi.

³⁹Ai a e mui'mui sale ei tatou manafai ko fakasalagia tatou i 'tou agasala?[7]

⁴⁰Tatou ka toe kilokilo ki 'tou amioga kae ke fuli atu tatou ki te Aliki.

⁴¹Ke 'tala atu otou loto ki te Atua i te lagi kae talo penei,

⁴²“Te Aliki, a matou ne agasala kae teke ki a koe, Kae ne seki fakamagalo ne koe matou.

⁴³“Ne afuli ne koe matou o tamate; A tou alofa ko pono ne tou kaitaua,

⁴⁴I te kaumana o te kaitaua tela ko to matolu ko se ulu i ei omotou talosaga.

⁴⁵Ne fai ne koe matou pela me ne koga e laku ei kaiga masei o te lalolagi.

⁴⁶“A matou ne fakaitaita kae fakalili ne omotou fili katoa.

⁴⁷A matou ko oti ne fe'paki mo puapuaga mo te masei valevale; A matou e nofo faeloa i te puapuaga mo te ma'taku.

⁴⁸A oku mata ko tafe fua i ei a vaitafe o loimata, I te taimi ne ta fakamasei ei oku tino.

⁴⁹“A oku loimata ka sali ifo e pela me se vaitafe foliki e se mafai o gata te tafe,

⁵⁰Ke oko ki te taimi e kilo ifo ei a te Aliki mai te lagi Kae lavea ne Ia matou.

⁵¹A toku loto ko oko eiloa i te tagi manafai e kilo au ki te mea ne tupu ki fafine o te fa'kai.

⁵²“Au ko lave i te malei e pela me se manu eva, Te malei a oku fili kola e seai se pogai o te lotou ita mai ki a au.

⁵³Ne pei ola ne latou a au ki loto i te lua kae pono te puga o te lua ki te fatu.

⁵⁴Ne fanake te vai o ufi toku foitino, tena ne mafaufau aka ei au i te mate ko pili mai ki a au.

⁵⁵“Te Aliki, au ne tagi atu ki a koe mai lalo i te lua.

⁵⁶Kae i te taimi ne fakamolemole atu ei au ke fakalogo mai koe ki taku tagi, Kae ne lagona eiloa ne koe.

⁵⁷Ne tali mai koe ki taku tagi kae ne fai mai koe ke se mataku au.

⁵⁸“Te Aliki, a koe ne vau o fakasao au.

⁵⁹Fai tau fakamasinoga mo te alofa ki a au, Me iloa ne koe a mea 'se ne fai mai ki au.

⁶⁰E iloa ne koe te takalialia o oku fili ki a au, Mo olotou togafiti ke ta au.

⁶¹“Te Aliki, ne lagona ne koe a muna fakaitaita a latou ki a au; E iloa foki ne koe olotou togafiti katoa.

⁶²I aso katoa, e faipati faeloa latou e uiga ki a au kae fai olotou aofaga ki a au.

⁶³Mai te taeao ke oko ki te po e mai faeloa o fakaitaita au.

⁶⁴“Te Aliki, fakasala atu latou e tusa mo olotou mea ne fai;

⁶⁵Muna 'tuku atu latou kae faka'fonu latou i te fanoanoa!

⁶⁶Afuli atu latou ki lalo, kae fakaseai latou mai te lalolagi!”