Read Te Tusi Tapu I Te Gana Tuvalu Lomiga Lua TAGIGA A IELEMIA 5 Bible Online

TAGIGA A IELEMIA 5 - Te Tusi Tapu I Te Gana Tuvalu Lomiga Lua bible

TAGIGA A IELEMIA 5

¹Te Aliki, masaua te mea ne tupu ki a matou. Kilo mai ki a matou, ke lavea ne koe te motou masiasi.

²A omotou kope ko i lima o tino fakaatea; A tino o fenua fakaatea ko nofo nei i omotou fale.

³A omotou tamana ne tamate ne omotou fili, Kae nei a omotou matua ko seai ne avaga.

⁴E togi ne matou te vai e inu ei matou; E togi ne matou a fafie e fakaka ei te afi.

⁵A matou e fakagalue malosi eiloa pela me ne asini io me ko kamela, E fita matou kae tapu e malolo.

⁶Ke maua ne meakai e lava mo omotou ola, Ne olo matou o fakamolemole ki Aikupito mo Asulia.

⁷Ne agasala omotou tupuga, kae nei ko galo atu latou, Kae ko puapuaga fāka eiloa matou i olotou agasala.

⁸A matou ko pule ne tino e pau me ne pologa, Kae seai eiloa se tino e maua ne ia o fakasao matou mai te lotou malosi.

⁹A tino tatino ko oloolo sale fua i tua o te fa'kai; Kafai e olo matou o sala meakai, Ko tena uiga ko pau fua i a matou te ola mo te mate.

¹⁰A te likiliki ko fai ne ia matou ke vela pela mo te fiva, Tela la, omotou pakili ko vela eiloa pela mo se ogaumu.

¹¹A omotou avaga ne puke mālo i luga i te Mauga o Siona; A omotou tama fafine ne puke mālo foki i fa'kai katoa o Iuta.

¹²A omotou takitaki ko oti ne ave o noaua; A omotou toeaina e seai se fakaaloalo e fai ki a latou.

¹³A omotou tamataene e fai malo ke solo a saito e pela me ne pologa; A tamaliki tagata ko takasese fua i te amoga o fafie māfa.

¹⁴A tino matua ko se toe lavea atu ke sagasaga sale i te mataloa o te fa'kai, Mo te kautama tuputupu ko se lagona ke usu pese kae tata lakau.

¹⁵Ko seai se fiafia i omotou olaga; Ko te fanoanoa tenei ko sui ne ia te 'saka fiafia o matou.

¹⁶Ko seai eiloa se mea e 'toe mai mai koloa o te motou fenua kola e fakamatamata sale ei matou. A matou ne agasala, kae nei ko malaia matou.

¹⁷Ko masaki matou i omotou loto, Ko se mafai ne matou o lavea se mea me ko pono ne omotou loimata,

¹⁸I te Mauga o Siona ko tu aliali pela me se toafa, mo kuli vao ko olo sale fua i koga ne fakamasei.

¹⁹Te Aliki, a koe ko te tupu ki te se gata mai, Kae ka pule koe ki te se gata mai.

²⁰Kai a ko tiakina ei ne koe matou i se taimi leva penei? Mata koi masaua mai ne koe matou?

²¹Te Aliki! Toe fakafoki mai matou ki a koe! Toe puke atu matou ki a koe! Kae fakafou te olaga takutakua ne nofo muamua matou i ei.

²²Kae a, koi ita eiloa koe ki a matou ki te se gata mai? E a, e seai se gatamaiga o tou kaitaua?