Read Te Tusi Tapu I Te Gana Tuvalu Lomiga Lua ESEKIELU 10 Bible Online

ESEKIELU 10 - Te Tusi Tapu I Te Gana Tuvalu Lomiga Lua bible

ESEKIELU 10

¹Ne kilo atu au ki te afā pukupuku i luga o ulu o manu fai kapakau kona,[14] kae ne lavea ne au te mea pela me se nofogaaliki ne faite ki te fatu taua ko te safaila.

² Muna a te Atua ki te tagata tela e pei ki gatu lino, “Ulu atu i va o teka kola mai lalo o manu kona, kae aku mai ne malala ka. Tena la, ko laku atu ei ne koe a malala ka kona i luga o te fa'kai.” Ne kilokilo atu eiloa au i te fanoga a te tagata tena.

³A manu fai kapakau kona e tu i te feitu ki saute o te Faletapu i te taimi ne fanatu ei a ia ki loto, kae ne fonu te potu fono tafa ki loto i te kaumana.

⁴A te mainaga o te Aliki ne fanake mai i manu kona, o fanatu ki te mataloa o te Faletapu. Tena la, ko te Faletapu eiloa ko fonu i te kaumana, ka ko te potu fono ko maina faka eiloa i te mainaga.

⁵A te logoa o kapakau o manu kona, e lagona mai eiloa i te potu fono tafa ki tua. E pela eiloa mo te leo o te Atua Malosi.

⁶I te taimi ne fakatonu ei ne te Aliki a te tagata tela e pei ki gatu lino ke fano o puke mai ne malala ka i te va o teka kola i lalo o manu kona, ne fanatu te tagata tena o tu i tafa o te teka e tasi.

⁷E tasi te manu i manu kona ne velo atu tena lima ki loto i te afi tela i te va o latou, aku aka ne ia ne malala ka, tuku atu ei ne ia ki lima o te tagata tena e pei ki gatu lino. Ne puke ne te tagata tena a malala ka kona, ko te mea eiloa ko fano.

⁸Ne lavea ne au i manu takitasi e isi ne lima o latou, pela mo lima o te tino, mai i lalo o te ava kapakau.

⁹ E lavea atu foki ne au a teka e fa, e pau katoa, e takitasi eiloa i tafa o manu takitasi; kae ko foliga o teka e maina mai pela mo fatu taua. A teka kona e pela eiloa me ne fatu taua i te malapulapu, ka ko teka takitasi e tofu mo teka e fakalava i kogaloto.

¹¹Kafai ko gasue a manu kona, e mafai o olo ki so se feitu kae se mafuli olotou foitino. E olo tasi katoa i te koga e fia olo latou ki ei, kae e se fuli eiloa olotou foitino o fakatonu ki te koga ka olo latou ki ei.

¹² A olotou foitino, olotou tua, olotou lima, olotou kapakau, mo teka, e fonu katoa i mata.

¹³A teka konei e pau mo teka kola ne lavea ne au i te fakaasiga muamua.

¹⁴ A manu takitasi e taki fa olotou foliga. Ko foliga o te pulumakau, te tino ola, te leona, mo foliga o te aeto.

¹⁵(Ko manu foki eiloa kona ne lavea ne au i tafa o te Vaitafe ko Kepa.) Kafai ko eva ake a manu kona ki te ea,

¹⁶o olo ki se koga, a teka kona e olo tasi eiloa mo latou. Kafai ko fola olotou kapakau o eva, a teka kona e olo eiloa mo latou.

¹⁷Kafai ko se gasue a manu kona, kae se gasue foki a teka kona; kafai ko eva a manu, e olo tasi eiloa mo teka, me i teka e pule ne latou.

¹⁸Ne fanatu a te mainaga o te Aliki mai i te mataloa o te Faletapu, o fano o nofo i se koga mai i luga o manu kona.

¹⁹Ne fola aka olotou kapakau o eva ki luga ka ko au e kilokilo atu eiloa, kae ne olo tasi eiloa mo teka kona. Ne manava latou i te mataloa ki te saegala o te Faletapu, ka ko te mainaga e i luga o latou.

²⁰Ne matea ne au me ko manu kona kola ne lavea ne au e nofo mai i lalo o te Atua o Isalaelu, i te Vaitafe o Kepa.

²¹E taki fa olotou foliga, fa kapakau, mo lima pela mo lima o te tino mai i lalo o kapakau takitasi.

²²A olotou foliga e pela eiloa mo foliga[15] kola ne lavea ne au i tafa o te Vaitafe o Kepa. A manu takitasi e olo tonu eiloa ki mua.