Read Te Tusi Tapu I Te Gana Tuvalu Lomiga Lua ESEKIELU 11 Bible Online

ESEKIELU 11 - Te Tusi Tapu I Te Gana Tuvalu Lomiga Lua bible

ESEKIELU 11

¹Ne sau aka au ne te agaga o te Atua, ave ei ne Ia au ki te mataloa ki te saegala o te Faletapu. I kona, i tafa o te mataloa, ne lavea ne au e tinolua mo te tokolima tagata, e aofia i ei a Iasania te tama tagata a Asula, mo Pelatia te tama tagata a Penaia, ne takitaki e tokolua o te malo.

²Muna a te Atua ki a au, “Te tagata ola, a tagata konei e fai ne latou a fuafuaga masei, kae fai ne latou a manatu fakatonutonu se lei i te fa'kai tenei.

³Muna a latou,‘E se leva nei kae ka toe galue matou ki te faitega o fale.[16] A te fa'kai e pela me se ulo tunu meakai, ka ko matou e pela me ne kano manu i loto i te ulo tena, kae e tai isi se lei e maua, me e puipui matou ne te ulo mai i te afi.’

⁴Te tagata ola, na fulitua atu nei ki tagata kona.”

⁵Ne ulufia au ne te agaga o te Aliki, tena ne fai mai ei te Aliki ki a au ke avatu te fekau tenei ki tino: “Tino Isalaelu, e iloa ne au otou muna kona e fai, mo otou fuafuaga kona e fakatoka.

⁶Ko oko eiloa i te lasi o te tāga tino a koutou i te fa'kai nei, tenei ko fonu ei auala i foitino mate.

⁷“Tela la, konei aku muna e fia fai atu ki a koutou, ko au ko te Aliki Sili. A te fa'kai tenei se ulo tunu meakai eiloa, kae se a te kano manu e tau o tunu i ei? Ko foitino mate o tino kola ne tamate ne koutou! A koutou ka se nofo i konei — ka pei koutou ne au ki tua mo te fa'kai!

⁸A koutou e mataku i te pelu? Ka aumai ne au se potukau mo olotou pelu o ta koutou.

⁹Ka ave ne au koutou keatea mai i te fa'kai kae tuku atu koutou ki tino fakaatea. Ko oti ne fai taku ikuga i a koutou e tamate,

¹⁰Kae ka mate eiloa koutou i te taua i te otou fenua eiloa. Tena la, ka iloa ei ne tino katoa i a au ko te Aliki.

¹¹A koutou e se 'pulu ne te fa'kai tenei, pela mo te kano manu tela e 'pulu ne te ulo mai i te afi. Ka fakasala ne au koutou i so se koga e nofo ei koutou i luga i te fenua o Isalaelu.

¹²Ka iloa ne koutou i a au ko te Aliki, kae i te taimi e tausi ei ne koutou a tulafono a malo i otou tafa, ko tena uiga ko ofa ne koutou aku tulafono kae se fakalogo ki aku fakatonuga.”

¹³I te taimi koi fai ei aku muna fakapelofeta, kae siga ifo a Pelatia, mate eiloa. Ne fakasiga ifo au mo oku mata e fuli ki lalo i te laukele, kae pakalaga au penei, “Te Aliki Sili, sa faigina te mea tena! E a, ka tamate ne koe a tino katoa e toe i Isalaelu?”

¹⁴A te Aliki ne faipati mai ki a au,

¹⁵ana muna, “Te tagata ola,” a tino i Ielusalema ko faipati e uiga ki a koe mo ou taina Isalaelu kona i te tafeaga. Olotou muna penei,‘A te kau o te tafeaga ko to mao, ko se tau o tapuaki atu ki te Aliki. Ko oti ne aumai ne te Aliki a te fenua tenei mo tatou.’

¹⁶“Fai atu ki ou taina i te tafeaga aku muna konei. Ko au ne uga ne au latou ke olo o nofo i malo mao, kae fakasalalau ne au ki nisi fenua. Kae nei, au ka fakatasi atu ki a latou i fenua kola ne olo latou ki ei.

¹⁷“Tela la, fai ki ei aku muna konei e fai atu. Ka toe fakamaopoopo mai ne au latou mai i fenua ne fakasalalau ne au ki ei latou, kae ka toe fakafoki atu te fenua o Isalaelu ki a latou.

¹⁸Kafai ko 'foki mai latou, e tau o ave keatea ne latou a tupua fakafoufou kae mataga kola e maua atu ne latou.

¹⁹ Ka avatu ne au ki a latou se loto fou mo te mafaufau fou. Ka ave keatea ne au olotou loto makeke pela me ne fatu, kae tuku atu ki a latou a loto fakalogo.

²⁰Tena, kae ka tausi latou ki aku tulafono kae tausi fakamaoni ki aku fakatonuga. Ka fai latou mo oku tino, ka ko au ka fai mo Atua o latou.

²¹Kae ka fakasala eiloa ne au a tino kola e fia tapuaki ki atua fakafoufou kae masei. Ka fakasala ne au latou ona ko mea ne fai ne latou.” Ko te Aliki Sili tena ne faipati atu.

²² Ne masagi aka a manu kona o eva, ka ko teka ne olo tasi atu eiloa mo manu kona. A te mainaga o te Atua o Isalaelu e nofo mai i luga o latou.

²³Ne tiaki ne te mainaga tena a te fa'kai, fanatu ei ki mauga i te feitu ki te saegala o te fa'kai.

²⁴I te fakaasiga tena, ne sapai ake au ne te agaga o te Atua, kae toe fakafoki mai au ki te kau o te tafeaga i Papelonia. Tena la, ko te fakaasiga eiloa ko fano o matafi,

²⁵kae ne taku atu eiloa ne au ki te kau i te tafeaga a mea katoa kola ne fakaasi mai ne te Aliki ki a au.