Read Te Tusi Tapu I Te Gana Tuvalu Lomiga Lua ESEKIELU 12 Bible Online

ESEKIELU 12 - Te Tusi Tapu I Te Gana Tuvalu Lomiga Lua bible

ESEKIELU 12

¹A te Aliki ne faipati mai ki a au,

² ana muna, “Te tagata ola,” “a koe nei e nofo tasi mo tino loto teke. E isi ne olotou mata, kae seai se mea e lavea ne latou; e isi ne olotou taliga kae se mafai o lagona se mea, me i a latou ne tino loto teke.

³“Te tagata ola, fakatoka sau tamā saitaga foliki, e pela eiloa me se tino ka fai o sola, kae na fano tau malaga koi tuai o pouli, ko te mea ke lavea koe ne tino i a koe ka fano ki se koga fakaatea. E se taumate kaati ka lavea koe ne tino loto teke kona.

⁴Kafai koi tai maina eiloa, fakatoka tau saitaga tena mo te tafeaga, ko te mea ke lavea ne latou a koe, tena la, ko tuku ei ke kilokilo mai i a koe ko fano i te afiafi; e pela eiloa koe ko fano ki te tafeaga.

⁵I te taimi koi kilokilo atu eiloa latou, fakapu te pui o tou fale kae ulu atu mo tau saitaga i te pu tena, o ulu ki tua.

⁶Tuku eiloa ke kilokilo atu i te taimi e na ei tau taga i tou tuauma, kae fanatu i te pouliga mo ou mata e pono, ko te mea ke se lavea ne koe a te koga e fano koe ki ei. A te mea tena e fai ne koe se faka'iloaga ki tino Isalaelu o mea ka oko mai.

⁷Ne fai eiloa ne au a te mea ne fai mai ei te Aliki ke fai ne au. I te aso tena, ne fakatoka taku saitaga, e pela me se tino ka sola, kae i te afiafi tena ka fai o pouli, ne fakapu ne au te pui o te fale ki oku lima, ulu atu eiloa au i ei ki tua. I te taimi koi kilokilo mai ei a tino, kae ne na aka ne au taku taga ki toku tuauma, ko au eiloa ko fano.

⁸I te taeaoakega, ne faipati mai te Aliki ki a au penei,

⁹“Te tagata ola, a tino Isalaelu loto 'teke kona ko fesili atu me ne a au mea e fai;

¹⁰fai la ki ei a muna a te Aliki Sili konei ki a latou. A te fekau tenei e mo te pelenise tena e pule i Ielusalema, mo tino katoa i ei.

¹¹Fai ki ei i tau mea tena ne fai se ata o te mea ka tupu ki a latou — ka nofo fakaalofa kae fakapagota a latou i nisi fenua.

¹²A te pelenise tena e pule i a latou ka amo tena taga ki tena tuauma i te po, ko ulu atu ei i te pu ne keli ne latou i te pui ke sola i ei a ia. Ka pono ona mata kae ka se lavea ne ia a te koga e fano a ia i ei.

¹³ Ka fola ne au toku tili o fakalave a ia. Tena la, ko ave ei ne au a ia ki te fa'kai o Papelonia, i kona ka mate ei a ia kae seki kilo eiloa ona mata ki te fa'kai tena.

¹⁴Ka fakasalalau ne au ki koga katoa a te kau ofisa a ia, mo ana tino fakatonutonu, mo tena sotia tausi, ka ko tino ka olo o sala latou o tamate.

¹⁵“Kafai ko fakasalalau ne au latou ki nisi malo mo fenua fakaatea, ka iloa ei ne latou i a au ko te Aliki.

¹⁶Ka faka'sao ne au ne nai tino o latou mai i te taua, te famai mo te fiakai, ko te mea kafai ko nofo tasi latou mo tino o malo fakaatea, kae ka iloa ne latou a te mataga o olotou mea ne fai, ka iloa foki ei ne latou i a au ko te Aliki.”

¹⁷Ne faipati mai te Aliki ki a au,

¹⁸ana muna, “Te tagata ola, polepole manafai e kai koe, kae ke polepole foki koe i te mataku manafai e inu koe.

¹⁹Fai atu ki te malo katoa me e tenei te fekau a te Aliki Sili ki tino Ielusalema konei koi nofo i te lotou fenua: ka polepole latou manafai e kai, kae polepole i te mataku manafai e inu. A te lotou fenua ka ave keatea a mea katoa i ei, me i tino katoa e nofo i kona ne tino amio masei katoa.

²⁰A fa'kai konei e fonu nei i tino ka fakamasei, ka ko te fenua ka pela me se vao. Tena la, ka iloa ei ne latou i a au ko te Aliki.”

²¹A te Aliki ne faipati mai ki a au,

²²ana muna, “Te tagata ola, ai a e fai soko ei ne tino Isalaelu a te fataoto tenei: ‘A te taimi e gasolo, ka ko valoaga ko se taunu’?

²³Fai nei ki a latou i a au, te Aliki Sili, e isi ne aku muna e fia fai e uiga ki te mea tena. Ka fakagata ne au a te fataoto tena. Ka se toe takutaku eiloa i Isalaelu. Fai ki a latou me e tenei te sui o te fataoto tena: ko oko mai te taimi, a valoaga ko taunu!

²⁴“Ka se toe ai ne fakaasiga loi mo muna fakapelofeta se tonu i luga i Isalaelu.

²⁵Ko au, te Aliki Sili, ka faipati ki a latou, ka ko te muna e fai ne au e taunu eiloa. Ka se toe ai se mea e 'lave ei. I te otou olaga katoa, koutou tino teke, ka fai eiloa ne au a mea kola ne folafola atu ne au me e fai ne au ki a koutou. Au ko oti ne faipati,” ko muna kona a te Aliki Sili.

²⁶Muna a te Aliki ki a au,

²⁷“Te tagata ola, a tino Isalaelu e leake nei i au fakaasiga mo muna fakapelofeta e faka'tau mo aso koi tai mao fakamuli.

²⁸Tela la, fai ki a latou, i a au, te Aliki Sili, e fai atu ki a latou penei: E se toe fakatalave eiloa. A taku muna ne fai, e taunu eiloa. Ko au, te Aliki Sili, tena ne faipati atu!”