Read Te Tusi Tapu I Te Gana Tuvalu Lomiga Lua ESEKIELU 19 Bible Online

ESEKIELU 19 - Te Tusi Tapu I Te Gana Tuvalu Lomiga Lua bible

ESEKIELU 19

¹A te Atua ne fai mai ki a au ke usu ne au a te pese fanoanoa tenei ona ko pelenise e tokolua o Isalaelu:

²A tou matua se leona fafine! Ne puti aka ne ia ana tama i te koga E nofo i ei a leona tagata fakamataku.

³Ne puti aka ne ia tena tama, kae akoako ke iloa o sala ana meakai; Ne kaitino eiloa a ia.

⁴Ne logo a malo i tala o ia, Tena ne malei ei ne latou a ia i te lua. Ne fakalave ne latou a ia ki kafilo kae toso ki Aikupito.

⁵Ne fakatalitali eiloa a ia ke oko ki te taimi ko seai eiloa i ei sena fakamoemoega. Tena ne toe puti aka ne ia tena sua tama, Tupu aka ei o fai mo leona fakamataku.

⁶I te taimi ko matua lei ei a ia, Ne teka tasi sale eiloa mo nisi leona. Ne apo foki a ia i te sala meakai kae ne kaitino foki eiloa a ia.

⁷Ne ofa ne ia a olo malosi, kae fakamasei a fa'kai. A tino o te fenua e mataku i taimi katoa e gulu ei a ia.

⁸A malo ko maopoopo fakatasi o taua ki a ia; A tino ne o'mai mai i koga valevale. Ne fola olotou tili, Po ei ne latou a ia i olotou malei.

⁹Ne fao ne latou a ia i te pa uaea Kae ave a ia ki te tupu o Papelonia. Ne leoleo ne latou a ia, Ko te mea ke se toe lagona tena gulu i luga i mauga o Isalaelu.

¹⁰A tou matua e pela me se vine tela ne toki i tafa o se vaitafe foliki. Ona e uke a vai i kona, Tela la, a te vine ko fonu eiloa i lau mo fuagavine.

¹¹A ona kaula e malosi, Kae ne tupu ake eiloa o fai mo tokotoko a tupu. Ne gasolo ake eiloa o maluga a te vine tena, Tela ko oko atu eiloa ki kaumana; E lavea katoa ne tino te ola o ona lau Kae ko oko eiloa i te maluga.

¹²Kae ne unu te vine tena mai i lalo i ona aka ne lima o se tino kaitaua Kae pei ki lalo i te laukele. Ne mage ona fuagavine ne fai ne te matagi mai i te saegala. A ona kaula ko fati ki lalo; Ko mage kae 'paku valevale.

¹³Nei, ko toki i te toafa, I te laukele malo kae seai ne vai i ei.

¹⁴Ne ka te foitino o te vine; Ne ka i te afi a ona kaula mo fuagavine. A kaula ko se toe malosi eiloa, Se toe fai mo tokotoko a tupu. A te mea nei se pese fanoanoa; ne masani o usu soko faeloa.