Read Te Tusi Tapu I Te Gana Tuvalu Lomiga Lua ESEKIELU 20 Bible Online

ESEKIELU 20 - Te Tusi Tapu I Te Gana Tuvalu Lomiga Lua bible

ESEKIELU 20

¹A te aso tenei ko te po sefulu o te lima o masina i te fitu o tausaga o matou i te tafeaga. E isi ne takitaki o te kau Isalaelu ne o'mai o fesili mai ki a au e uiga ki te loto o te Aliki, tena ne sagasaga mai i ei i oku mua.

²Tena, kae faipati mai te Aliki ki a au,

³ana muna, “Te tagata ola, fai atu ki tagata kona i te Aliki Sili e fai mai penei: A koutou ne o'mai o fesili mai e uiga ki toku loto, ne? Au ko te Atua ola, e se manako au ke o'mai koutou o fesili mai e uiga ki so se mea. Ko au, te Aliki Sili, tena ne faipati atu.

⁴“Te tagata ola, e a, ko toka tau ikuga e uiga ki a latou? Na fai nei sau ikuga. Fakamasaua atu ki a latou a mea mataga kola ne fai ne olotou tamana.

⁵ Fakailoa atu ki a latou aku muna konei. I te taimi ne filifili ei ne au a Isalaelu, ne isi saku tautoga ne fai ki a latou. Ne fakasae atu au ki a latou i Aikupito, kae fai atu au ki a latou penei: Au ko te Aliki te otou Atua.

⁶Ko te taimi tena ne tauto ei au ki a latou ke taki ne au latou keatea mai i Aikupito ki te fenua tela ko oti ne fili ne au mo latou, se fenua maumea kae laukele ola, ko te toe fenua gali eiloa.

⁷Ne fai au ki a latou ke pei keatea olotou tupua masei kola e alofa latou ki ei, kae ke mo a e fakalailai olotou foitino i feitu fakatapuakiga i te ifo atu ki tupua loi a te kau Aikupito, me i a au ko te Aliki te lotou Atua.

⁸Kae ne fakaseaoga ne latou au, kae ita ma fakalogo mai ki a au. E seki pei keatea ne latou olotou tupua mataga io me fakagata te ifo ki tupua. Au ko toka eiloa o fakaoko atu ki a latou a te malosi katoatoa o toku kaitaua i kona i Aikupito.

⁹Kae ne seki fai ne au, i toku igoa ma takuvalea, me i tino o te fenua tena e nofo ei a tino Isalaelu ne logo i te folafolaga ne au ki tino Isalaelu me ka taki keatea ne au latou mai i Aikupito.

¹⁰“Tena ne taki atu ei ne au latou keatea mai i Aikupito ki loto i te toafa.

¹¹ Ne tuku atu ne au aku fakatonuga ki a latou, kae akoako atu latou ki aku tulafono, tela e aumai ei te ola ki so se tino e tautali ki ei.

¹² Ne fai ne au te tausiga o te Sapati mo fakailoga o te feagaiga i te va o matou, ke fakamanatu ki a latou i a au, te Aliki, ne fai ne au latou ke malu.

¹³Kae ne fakaseaoga foki eiloa ne latou a au i te toafa. Ne ofa ne latou aku tulafono kae teke ki aku fakatonuga, kola e aumai ei te ola ki a latou kola e tausi ki ei. Ne soli foki ne latou a te Sapati. Ko toka foki eiloa au o fakaoko atu ki a latou a te malosi o toku kaitaua i kona i te toafa, kae ta fakapalele latou.

¹⁴Kae e seki fai ne au, i toku igoa ma takuvalea ne malo kola ne lavea ne latou te takiga ne au o Isalaelu mai i Aikupito.

¹⁵ Tena ne fai ei taku tautoga i te toafa me ka se ave ne au latou ki te fenua tela ne tuku atu ne au mo latou, te fenua maumea kae laukele ola, te fenua tafasili i te gali.

¹⁶Ne fai taku tautoga tena, me ne teke ki aku fakatonuga, ofa aku tulafono, kae soli te Sapati — e manako eiloa o tapuaki atu ki olotou tupua.

¹⁷“Kae ne alofa foki eiloa au ki a latou. Ne iku i toku mafaufau ke se tamate latou i kona i te toafa.

¹⁸Kae ne fai aku muna polopoloki ki te kau koi tupu aka i a latou penei: Sa tautali ki tulafono ne fai ne otou tupuga; sa tautali i olotou tu, io me fakalailai koutou i olotou tupua.

¹⁹Au ko te Aliki te otou Atua. Fakalogo mai ki aku tulafono mo aku fakatonuga.

²⁰Ke fai ne koutou te Sapati mo aso e tapu, ko te mea ke fai mo fakailoga o te feagaiga a tatou ne fai, kae fakamanatu atu foki ki a koutou i a au ko te Aliki te otou Atua.

²¹“A te tupulaga tena ne fakaseaoga foki ne latou a au. Ne ofa ne latou aku tulafono kae seki tausi ki aku fakatonuga, kola e aumai ei te ola ki so se tino e tausi ki ei. E soli ne latou a te Sapati. Au ko toka eiloa o fakaoko atu ki a latou a te malosi o toku kaitaua i kona i te toafa, kae tamate latou katoa.

²²Kae ne seki fai ne au, i toku igoa ma takuvalea ne malo kola ne lavea ne latou te aumaiga ne au a Isalaelu mai i Aikupito.

²³ Tena, ne toe fai ei ne au te sua tautoga a aku i te toafa. Ne tauto au me ka fakasalalau ne au latou i te lalolagi katoa.

²⁴Ne fai ne au a te mea tena me ne teke ne latou aku fakatonuga, ofa aku tulafono, soli te Sapati, kae tapuaki atu ki tupua kola ne tapuaki sale foki ki ei olotou tupuga.

²⁵“Tena la, ne tuku atu ei ne au ki a latou a tulafono se lei, mo fakatonuga kola e se maua se ola i ei.

²⁶Ne tuku eiloa ne au ke fakalailai olotou foitino i olotou taulaga, kae ne tuku foki eiloa ne au ke ofo atu olotou tama tagata toekimua ke fai mo taulaga. E fai te mea tena mo fakasala latou, ke iloa ne latou i a au ko te Aliki.

²⁷“Nei la, e te tagata ola, fai atu ki tino Isalaelu i a au, te Aliki Sili, ko fai atu ki a latou penei. Tenei te sua auala ne fakaitaita ei au ne olotou tamana i olotou uiga se fakamaoni.

²⁸Ne aumai ne au latou ki te fenua ne tauto au o tuku atu mo latou. I te laveaga ne latou a mauga maluga mo lakau lau usiusi, ne ofo olotou taulaga i koga katoa kona. Ne fai ne latou au ke kaitaua i olotou taulaga ne sunu mo te taulaga uaina e aumai ne latou.

²⁹Ne fesili atu au penei: Ne a koga maluga konei e olo koutou ki ei? Tena la, ne fakaigoa eiloa ko ‘Koga Maluga’[20] talu mai te taimi tena.

³⁰Fai atu ki tino Isalaelu a muna a te Aliki Sili konei: Ai a e fai ei ne koutou a agasala kola ne fai foki ne otou tamana, kae tele i tua o olotou tupua?

³¹Ke oko mai eiloa ki te aso nei, e ofo atu foki eiloa ne koutou a meaalofa pela eiloa mo meaalofa a otou tamana, kae fakalailai foki otou foitino ki tupua foki pela mo olotou tupua, o sunu otou tamaliki o fai mo taulaga ki tupua kona. Kae e o'mai faeloa koutou o fesili me se a toku loto! E pela eiloa mo te iloa tonu i a au, te Aliki Sili, ko te Atua ola, e iloa tonu foki me e se manako au ke o'mai koutou o fesili mai e uiga ki so se mea.

³²Ko oti ne iku i otou mafaufau i a koutou e manako ke fai koutou pela mo nisi malo, pela mo tino kola e nofo i nisi fenua, kola e tapuaki ki lakau mo kaupapa. Kae e se mafai eiloa o fai pena.

³³“Ona ko au, te Aliki Sili, ko te Atua ola, ko fakailoa atu ne au me i toku kaitaua, ka pule ei ne au koutou i toku lima malosi, mo toku malosi katoa.

³⁴Ka fakaasi atu toku malosi mo toku kaitaua, manafai ko fakamaopoopo mai ne au koutou, kae toe faka'foki mai mai i fenua katoa kola ne salalau koutou ki ei.

³⁵Ka aumai ne au koutou ki loto i te ‘Toafa o Malo,’ i kona ka muna toka ei ne au koutou i otou mua.

³⁶Ka fakamalaia ne au koutou, e pela mo te fakamalaiaga ne au o otou tamana i te Toafa o Sinai.” Ko muna kona a te Aliki Sili.

³⁷“Ka pule malo ne au koutou, kae fai koutou ke fakalogo mai ki taku feagaiga.

³⁸Ka ave keatea ne au mai i a koutou a tino teke kae fai agasala. Ka ave keatea ne au latou mai i fenua konei e nofo nei i ei latou, kae se talia ne au ke foki ki te fenua o Isalaelu. Ka iloa ei ne koutou i a au ko te Aliki.”

³⁹Muna a te Aliki Sili, “Kae nei, koutou tino Isalaelu, fai te mea e loto koutou ki ei! Tavini atu ki otou tupua! Kae e fai atu au penei, me ka oti aka a mea konei, ko koutou eiloa ka fakalogo mai ki a au, kae fakagata te fakatakuvaleaga ne koutou toku igoa i te ofo atu o otou meaalofa ki tupua.

⁴⁰A koutou tino Isalaelu ka tapuaki mai ki a au i luga i toku mauga tapu,[21] te mauga maluga o Isalaelu. Ka fiafia au ki a koutou, kae fakamoemoe ke ofo mai otou taulaga, taulaga tafasili i te lei, mo otou meaalofa tapu.

⁴¹Kafai ko oti ne aumai ne au koutou mai i fenua kola ne salalau ki ei koutou, kae fakamaopoopo koutou, ka talia ei ne au a taulaga sunu a koutou, kae ka lavea ne malo i a au e malu.

⁴²Kafai ko fakafoki mai ne au koutou ki Isalaelu, te fenua ne tauto au ke tuku ki otou tupuga, tena la, ka iloa ei ne koutou i a au ko te Aliki.

⁴³Ka manatua foki ei ne koutou a mea mataga a koutou ne fai, mo te fakalailaiga ne koutou o koutou eiloa. Ka ita koutou ki a koutou eiloa ona ko mea masei katoa a koutou ne fai.

⁴⁴Kafai ko gasue au o puipui toku igoa, kae ka iloa ne koutou i a au ko te Aliki, me e se fakasala ne au koutou e tusa mo otou amioga masei.” Ko te Aliki Sili tena ne faipati.

⁴⁵A te Aliki ne faipati mai ki a au,

⁴⁶ana muna, “Te tagata ola, kilo ki saute. Fai au muna teke ki saute kae fai atu foki au muna fakapelofeta o teke atu ki te vao i saute.

⁴⁷Fai atu ki te vao i saute ke fakalogo mai ki muna a te Aliki Sili: Kiloke! Ka fakaka ne au se afi, kae ka sunu ne ia a ou lakau katoa, faitalia me ne lakau ko mage io me ne lakau lau usiusi. E seai se mea e mafai o fakagata ne ia a te afi tena. Ka solo atu mai i saute ki matu, kae ka lagona katoa ne tino a te vela o te afi.

⁴⁸Ka lavea katoa ne latou me ko au, te Aliki, ne fakaka ne au a te afi, kae e seai se tino e mafai o tamate ne ia.”

⁴⁹Kae ne fai atu au penei, “Te Aliki Sili, sa faigina ke fai ne au a te mea tena! A tino katoa e muimui faeloa i a au e faipati sale ki tala fakatusa.”