Read Te Tusi Tapu I Te Gana Tuvalu Lomiga Lua ESEKIELU 22 Bible Online

ESEKIELU 22 - Te Tusi Tapu I Te Gana Tuvalu Lomiga Lua bible

ESEKIELU 22

¹A te Aliki ne faipati mai ki a au,

²ana muna, “Te tagata ola, e a, ko toka koe o fakamasino a te fa'kai tenei e fonu i tino tatino? Fakaasi atu ke iloa ne ia a mea mataga katoa kola ne fai ne ia.

³Fai atu aku muna konei ki te fa'kai tena: Ona e tokouke a tino o te otou fenua ne tamate ne koutou, kae ne fakalailai foki otou foitino i te tapuaki atu ki tupua, tela la, a te otou taimi ko se mao.

⁴A koutou ko agasala i te taga o tino kona, kae ko lailai foki ona ko tupua ne faite ne koutou, tela la, a te otou aso ko pili mai, ko palele te taimi o koutou! Tena te mea ne talia ei ne au a malo ke fakalili atu ki a koutou, mo fenua katoa ke fakamasei olotou mata ki a koutou.

⁵A fenua pili mo fenua mao ko fakamasei olotou mata ki a koutou ona ko te otou soli tulafono.

⁶A takitaki katoa o Isalaelu e fakatuaga ki te lotou malosi, kae e tatino.

⁷ Ko seai eiloa se tino i te fa'kai e ava ki ana matua. E fakaloiloi ne koutou a tino fakaatea, kae fai fakamasei a fafine ko mate olotou avaga, mo tamaliki seai ne matua.

⁸ E se faka'malu ne koutou a koga tapu, kae e se tausi foki ne koutou a te Sapati.

⁹A nisi o koutou e fai tala loi e uiga ki nisi tino, ko te mea ke ave o tamate. A nisi e kai ki taulaga kola e ofo ki tupua. A nisi e taumafai faeloa o fakamalie olotou manakoga faka‐te‐foitino.

¹⁰ A nisi e moe mo te avaga a tena tamana. A nisi e fai malo ne latou a fafine ke moe latou i te taimi e masaki fakafafine ei a fafine kona.

¹¹A nisi e mulilua, ka ko nisi e taumafai ki avaga a olotou tama tagata io me ko afā tuagaene o latou.

¹² A nisi tino o te otou fenua e tatino ke maua ne tupe ma latou. A nisi e manako ki pasene o mea kola e tuku fakakaitalafu ne latou ki olotou taina Isalaelu, kae e maumea me e fakatogafiti ne latou a tino kona. Ko puli i a latou a au.” Ko te Aliki Sili tena ne faipati atu.

¹³“Ka fakaoko mai toku kaitaua ki otou uiga faomea kae tatino.

¹⁴I te otou fakatau, kafai ko oti taku mea ne fai ki a koutou, e mata koi isi se loto toa e toe i a koutou, io me se malosi ke mafai ne koutou o sau otou lima ki luga? Ko au, te Aliki, tena ne faipati atu, kae e fakataunu eiloa ne au taku muna ne fai.

¹⁵Ka fakasalalau ne au a tino o te otou fenua ki fenua mo malo katoa, kae fakagata otou amioga masei.

¹⁶Tela la, ka se fakaaloalogina koutou ne nisi malo, kae ka iloa ne koutou i a au ko te Aliki.”

¹⁷Muna a te Aliki ki a au,

¹⁸“Te tagata ola, a tino Isalaelu ko se taulia i a au. Ko pela latou mo te kaiga fiti — te palasi, te apa, te fiti, mo te polo mafa — kola ne toe mai i te otiga ne faka'ma o te siliva i te afi.

¹⁹Tela la, au, te Aliki Sili, ko fai atu ki a latou i a latou ko pena i te se taulia. Ka aumai katoa ne au latou ki Ielusalema

²⁰e pela mo te one tela e isi i ei te siliva, te palasi, te fiti mo te apa, tela e tuku ki te afi ke maua mai i ei a fiti taua kona. A toku kaitaua ka fakaliu suavai ne ia latou, e pela mo te afi e fakaliu suavai ne ia a te one.

²¹Ao, ka aumai ne au latou ki Ielusalema, fakaka te afi i lalo o latou, kae fakaliu suavai latou i toku kaitaua.

²²Ka fakaliu suavai latou i Ielusalema, e pela mo te siliva e fakaliu suavai i te afi, tena la, ka iloa ei ne latou i a latou ko fakalogo ki te mae o te kaitaua o te Aliki.”

²³Ne toe faipati mai te Aliki ki a au,

²⁴ana muna, “Te tagata ola, fai ki tino Isalaelu i te lotou fenua ko se malu, tela la, ko fakasala nei ne au latou i toku kaitaua.

²⁵A takitaki[23] ko pela me ne leona kola e fakatau gulu i luga o manu ne tamate ne latou. Ne tamate ne latou a tino, puke a tupe mo mea katoa e mafai o puke ne latou, kae ko te tatino a latou ko ala ei o tokouke a fafine ko mate olotou avaga.

²⁶ A faitaulaga ko ofa ne latou taku tulafono kae ko se ava ki mea kola e malu. Ko se fakakese ne latou a mea kola e tapu mo mea se tapu. Ko se akoako ne latou te kese o mea ma mo mea lailai i feitu fakatapuakiga, kae ko se saga foki ki te Sapati. Tela la, a tino Isalaelu ko se ava mai ki a au.

²⁷A ofisa o te malo ko pela me ne kuli vao kola e saesae olotou manu ne tamate. Ko tatino ko te mea ke maumea latou.

²⁸A pelofeta ne funa ne latou a agasala kona, e pela me se pui tela e vali ne tino ki te lase. E lavea ne latou a fakaasiga loi kae fai valoaga se tonu. E fai latou pela me ko muna a te Aliki Sili kola e faipati atu ne latou, ka ko au, te Aliki, e seki faipati atu eiloa ki a latou.

²⁹A tino maumea e fakaloiloi kae fao ne latou a mea a tino. E fai fakamasei ne latou a tino mativa kae se fai fakalei a tino fakaatea.

³⁰Ne sala ne au se tino e mafai o faite ne ia se pui, tela e mafai o tu i koga o te pui ne maofa o pulu te fenua i te taimi ka fakamasei ei ne au i toku kaitaua, kae e seai se tino ne maua ne au.

³¹Tela la, ka fakaoko atu eiloa toku kaitaua ki a latou, kae ka ta fakapalele ne au koutou pela me se afi, ona ko mea a koutou ne fai.” Ko te Aliki Sili tena ne faipati atu.