Read Te Tusi Tapu I Te Gana Tuvalu Lomiga Lua ESEKIELU 25 Bible Online

ESEKIELU 25 - Te Tusi Tapu I Te Gana Tuvalu Lomiga Lua bible

ESEKIELU 25

¹ A te Aliki ne faipati mai ki a au,

²ana muna, “Te tagata ola, fakamalaia atu a te fenua o Amoni.

³Fai atu ki ei ke fakalogo mai ki aku muna konei e fai atu: A koutou ne fiafia ke kilo koutou ki toku Faletapu ko fakalailai, ne fiafia foki koutou ke fakamasei a te fenua o Isalaelu, mo tino Iuta ke ave fakapagota.

⁴Ona ko koutou ne fiafia, tela la, ka tuku atu ne au a matakaiga mai i te feitu ki te saegala o te toafa ke o'mai o fakatakavale koutou. Ka fakatu olotou faleie i te otou fenua, ko nofo tumau ei i kona. Ka kai latou ki fuaga lakau kae inu ki susu kola ne tau o maua ne koutou.

⁵Ka fai ne au a te fa'kai o Lapa ke fai mo koga e tausi ei a kamela, ka ko te fenua katoa o Amoni ke fai mo koga e tausi i ei a mamoe, ko te mea ke iloa ne koutou i a au ko te Aliki.

⁶“Konei a muna a te Aliki Sili: E pati ou lima kae eva mo te fiafia. A koe e takalialia i te fenua o Isalaelu.

⁷Ona ko koe e takalialia i Isalaelu, tela la, ka tuku atu ne au a koe ki nisi malo, ke fao ne latou otou mea kae ta koutou. Ka ta fakapalele eiloa ne au koutou ke se toe taku koutou se malo, ke se toe ai se fenua o koutou. Tena la, ka iloa ei ne koutou i a au ko te Aliki.”

⁸ Muna a te Aliki Sili, “Ona ko Moapi[27] ne fai pela i a Iuta e pau eiloa mo nisi malo katoa,

⁹tela la, a fa'kai o Moapi kola e pulu ne latou a te tuakoi o Moapi ka taua mai ki ei a te fili, a fa'kai kona e aofia i ei a fa'kai gali foki eiloa — ko Peta Ielimota, Paala Meono, mo Kiliataima.

¹⁰Ka tuku atu ne au a matakaiga o te feitu ki te saegala o te toafa ke puke ne latou a Moapi, fakatasi mo Amoni,[28] ko te mea ke se toe taku a Moapi se malo.

¹¹Ka fakasala ne au a Moapi, kae ka iloa ne latou i a au ko te Aliki.”

¹² Muna a te Aliki Sili, “A tino Etoma ne taua fakamasei ki a Iuta, o taui te mea a Iuta ne fai ki a latou, tena la, a te mea tena a Etoma ne fai ko agasala ei latou ki te se gata mai.

¹³Ko fakaasi atu nei ne au me ka fakasala ne au a Etoma, kae tamate a tino mo manu katoa i ei. Ka fakamasei ne au, mai i te fa'kai o Timanu ke oko ki te fa'kai o Titana, ka ko tino ka mate i te taua.

¹⁴A tino o toku fenua ko Isalaelu ka taui atu ne latou a te mea a Etoma ne fai, kae ka fai ne latou ke lagona ne Etoma a te malosi o toku kaitaua fakamataku. Ka iloa ne Etoma a te mae o taku fakasalaga.” Ko te Aliki Sili tena ne faipati atu.

¹⁵ Muna a te Aliki Sili, “A tino Filisitia ko oti ne ta fakamasei ne latou a te fili taumua o latou, kae ta fakapalele ne latou i te lotou kaitaua.

¹⁶Tela la, ko fakailoa atu nei ne au me ka ta ne au a te kau Filisitia kae fulu fakama. Ka ta fakapalele ne au a tino katoa kola e toe i te kogā koga laugatasi o Filisitia.

¹⁷Ka fakasala malosi eiloa ne au latou, kae taui fakamasei eiloa e tusa mo te lotou mea ne fai. Ka lagona ne latou toku kaitaua, tena la, ka iloa ei ne latou i a au ko te Aliki.”