Read Te Tusi Tapu I Te Gana Tuvalu Lomiga Lua ESEKIELU 27 Bible Online

ESEKIELU 27 - Te Tusi Tapu I Te Gana Tuvalu Lomiga Lua bible

ESEKIELU 27

¹Muna a te Aliki ki a au,

²“Te tagata ola, usu mai se pese o te mate mo Tulo,

³te fa'kai tena e tu i tafa o te tai kae fai mea togi mo tino katoa kola e nofo pili ki te tai. Fai atu ki ei a muna a te Aliki Sili konei: Tulo, a koe e fakamatamata i tou gali.

⁴A tou koga nofo ko te tai. A tino ne faite ne latou a koe, Ne faite ne latou ke pela me se vakamutu gali;

⁵Ne fakaaoga ne latou a lakau ko Mati mai i te Mauga o Helemoni mo fai a laupapa, Ka ko te alasi mai i Lepanona mo fai tou tila.

⁶Ne aumai ne latou a laupapa o lakau Ko oka mai i Pasana mo fai a foe; Ne faite ne latou a tou fola ki Laupapa o lakau ko pelosi mai i Kupelu. Kae faite a koga i loto ki nifo o elefane.

⁷A ou la ne faite ki lino, Ne lino ne sui fakagaligali mai i Aikupito, Kola e iloa gofie manafai e lavea mao atu. A ou onigi ne faite ki laugatu tafasili i te lei, Ne laugatu lanu kulakula mai i te fenua o Kupelu.

⁸A ou tino ālo ne tagata mai i fa'kai o Saitonu mo Avata. Ko ou tino poto ko kauvaka.

⁹A kamuta o te vaka Ne tagata ne akoako fakalei mai i Pipilosi. A kauvaka mai i vaka katoa kola e folau i te tai E togi olotou mea i ou fale koloa.

¹⁰“A sotia mai i Pelesia, Litia, mo Lipia e kau i tau kautau. E fakatautau olotou talita mo pulou tau i fale o au sotia. Ko latou kona ne fai ne latou a koe ke takutakua.

¹¹Ko sotia mai i Avata e leoleo ne latou ou pui, ka ko tagata mai i Kamata e leoleo ne latou ou taoa. E fakatautau olotou talita i ou pui. Ko latou ne fai ne latou a koe ke gali.

¹²“E fai mea togi foki koe i Sepania, e aumai ne koe a siliva, fiti, apa mo polo 'mafa mai i ei, kae togi ne koe ki au koloa e uke.

¹³E fai mea togi foki koe i Eleni, Tupalu, mo Mesepa, kae avatu ne koe au koloa taua o togi mai ki ei ne pologa mo mea ne faite ki palasi.

¹⁴E togi atu ne koe au koloa taua ke maua mai i ei a solofanua galue, solofanua tau, mo miula mai i Peta Tokalama.

¹⁵E fai mea togi foki koe mo tino Lotesi;[30] a tino i fenua pili ki te tai e avatu ne latou ki a koe a nifo o elefane mo laupapa malosi kae togi ne koe ki au koloa e uke.

¹⁶A tino Sulia e togi ne latou au vaega mea togi, mo mea ne faite i tou fenua. E avatu ne latou a fatu taua ko emela, gatu lanu kulakula, laugatu ne sui fakagaligali, laugatu lino gali, kamu, mo lupi, kae e togi ne koe ki mea ne faite i tou fenua.

¹⁷A Iuta mo Isalaelu e togi ne latou au koloa ki saito, hani, sinu olive, mo mea fakamanogi.

¹⁸A tino Tamaseko e togi mai ne latou a koloa mai i tou fenua ki uaina mai i Helepone mo vulu mai i Sahala. E avatu ne latou a fiti malosi mo mea fakamanogi, ke sui ki au koloa e uke.

²⁰A tino o Titana e togi mai ne latou a mea mai i a koe ki laugatu o nofoga.

²¹A tino Alapi mo takitaki o te fenua o Ketala e togi mai ne latou au koloa ki tama mamoe, mamoe, mo kouti.

²²A tino fai mea togi o Seepa mo Lama e togi ne latou au mea togi ki fatu taua, aulo, mo mea fakamanogi gali.

²³A fa'kai o Halana, Kane, mo Etena, a tino fai mea togi o Seepa, a fa'kai o Asula mo Kilimata — a latou katoa kona e fai mea togi mo koe.

²⁴E togi mai ne latou ki a koe a laugatu gali, laugatu lanu kulakula, mo mea ne sui fakagaligali, ko kapeti o fale e gali a lanu, mo uka mo lopu ne faite fakalei.

²⁵ A mea togi a koe e ave i fua vaka kako. A koe e pela me se vaka i te tai E fonu i kako mafa.

²⁶I te taimi ko aumai ei koe ne ou tagata alo ki te tai, Kae agi mai te matagi mai i te saegala O fakamasei koe ka ko koe ko mao mai i te fenua.

²⁷A mea togi katoa a koe, A kauvaka katoa a koe, A kamuta o tou vaka mo au tino fai mea togi, A sotia katoa i luga i te vaka — A latou katoa kona ne galo i te tai I te taimi ne masei ei tou vaka.

²⁸A te pakalaga o kauvaka ko malemu E tuafoki mai eiloa i te tafatai.

²⁹“A vaka katoa ko seai ne tino i ei, A kauvaka katoa ko oti ne olo ki uta.

³⁰Ko oko eiloa i te tagi fanoanoa ona ko koe Kae pei a pefu i olotou ulu, kae takafilifili i lalo i te lefu.

³¹E vele olotou ulu ona ko koe, Kae pei ki gatu lautaga. A olotou loto ko oko eiloa i te mae i te taimi e tagi ei latou.

³²E usu ne latou te pese o te mate mo koe: ‘Ko oi e mafai o fakatusa ki a Tulo, Tulo tenei ko filemu i te vasa?

³³Kafai ko ave au mea togi ki nisi fenua, E fakamalie ne koe a mea e manako mai ki ei a malo katoa. A tupu ko maumea Ona ko au mea togi.

³⁴A koe ko maofa i te vasa; Ko goto ifo koe ki koga poko o te moana. Au koloa, mo latou katoa kola ne galue mo koe Ko galo fakatasi mo koe i te moana.’

³⁵“A tino katoa kola e nofo pili ki te tai ko poi i te ikuga ko oko ki a koe. Ke oko foki eiloa ki olotou tupu ko oko eiloa i te mataku, a te mataku ko lavea atu eiloa i olotou mata.

³⁶A koe ko galo atu, ko galo atu eiloa ki te se gata mai, ka ko tino fai mea togi i te lalolagi katoa ko mataku, ko mataku i a latou ma iku foki ki te ikuga tena ne oko ki a koe.”