Read Te Tusi Tapu I Te Gana Tuvalu Lomiga Lua ESEKIELU 30 Bible Online

ESEKIELU 30 - Te Tusi Tapu I Te Gana Tuvalu Lomiga Lua bible

ESEKIELU 30

¹Ne toe faipati mai a te Aliki,

²ana muna, “Te tagata ola,” fai atu au muna fakapelofeta kae folafola atu i au, te Aliki Sili, ko faipati atu penei. E tau o valo atu ne koe a muna konei: A te aso fakamataku ko pili mai!

³Ko pili mai te aso, te aso tela e gasue ei te Aliki, Se aso o kaumana kae se aso puapuaga foki ki malo.

⁴Ka isi a te taua i Aikupito Mo te fanoanoa lasi i Sutana. E tokouke ka mate i Aikupito; A te fenua ka ta ne te fili kae fao a mea i ei Kae tiakina ke maofa valevale.

⁵“A te taua tena ka mate foki i ei a sotia ne togi mai i Sutana, Litia, Lipia, Alapi, Kupa, pela foki a sotia mai i tino o toku fenua.”

⁶Muna a te Aliki Sili, “A tino katoa kola e pulu ne latou a Aikupito, mai i Mikitolo i matu ki Asiuana i saute, ka mate katoa i te taua. A te kautau fakamatamata a Aikupito ka ta fakapalele. Ko au, te Aliki Sili, tena ne faipati atu.

⁷A te fenua ka fai mo fenua tafasili i te se aoga i te lalolagi, ka ko ana fa'kai ka maofa valevale.

⁸Kafai ko sunu ne au a Aikupito kae mate a tino katoa kola ne taumafai o pulu a te fenua, tena la, ka iloa ei ne latou i a au ko te Aliki.

⁹“Kafai e oko mai a te aso tena, kae ko fakamasei a Aikupito, kae ka uga ne au a avefekau i vakamutu ke olo o fakapoi a tino Sutana kola e seai se lotou mea e iloa, kae ka mataku latou. A te aso tena ko pili mai!”

¹⁰Muna a te Aliki Sili, “Ka uga atu ne au a te tupu o Papelonia ko Nepukanesa ke fakagata ei te maumea o Aikupito.

¹¹Ka vau a ia mo tena kautau o fakamasei a te fenua. Ka ta ne latou a te fenua ki pelu, kae ka fonu te fenua i foitino o tino mate.

¹²Ka fakamasa pakupaku ne au a te Naila kae tuku atu a Aikupito ki te pulega a tino amio masei. A tino fakaatea ka fakamasei ne latou a te fenua. Ko au, te Aliki, tena ne faipati atu.”

¹³Muna a te Aliki Sili, “Ka ofa ne au a tupua mo atua loi i Mefisi. Ka seai se tino e pule i Aikupito, kae ka fai ne au a tino ke mataku.

¹⁴Ka fakaseaoga ne au Aikupito ki saute, kae sunu a te fa'kai o Soani i matu. Ka fakasala ne au a te laumua ko Tepesi.

¹⁵Ka fai ne au a te fa'kai ko Pelusiuma, te olo malosi o Aikupito, ke lagona ne ia te mae o toku kaitaua fakamataku. Ka fakaseaoga ne au a te maumea o Tepesi.

¹⁶Ka sunu ne au a Aikupito, kae ka puapuaga a Pelusiuma. A pui o Tepesi ka maofa ki lalo, ka ko te fa'kai ka lofia.

¹⁷A tamataene o fa'kai ko Heliopolisi mo Pupasitisa ka mate i te taua, ka ko nisi tino ka ave fakapagota.

¹⁸A te pouliga ka oko mai ki luga i Tafanese i te taimi e ofa ei ne au a te malosi o Aikupito kae fakagata te malosi o latou tela e masani o fakamatamata sale latou i ei. A Aikupito ka ufi ne te kaumana, ka ko tino o ona fa'kai katoa ka ave fakapagota.

¹⁹Kafai ko fakasala ne au a Aikupito pena, kae ka iloa ne latou i a au ko te Aliki.”

²⁰I te po fitu o te masina muamua, i te sefulutasi o tausaga o matou i te tafeaga, ne faipati mai te Aliki ki a au,

²¹ana muna, “Te tagata ola, ko oti ne fati ne au a te lima o te tupu o Aikupito. E seai se tino ne fusi ne ia ki se litaga io me fakatautau ki se laugatu ko te mea ke lei, kae ke toe mafai o puke ne ia a te pelu.

²²Konei la aku muna, ko au ko te Aliki Sili: Au ko te fili o te tupu o Aikupito. Ka fati ne au te ava lima o ia — ko te lima lei mo te lima tela ko leva ne fati — kae ka to keatea te pelu mai i tena lima.

²³Ka fakasalalau ne au a tino Aikupito i te lalolagi.

²⁴Ka oti, ko fai ei ne au a lima o te tupu o Papelonia ke malosi, ko tuku atu ei ne au taku pelu ki ona lima. Ka ko te tupu o Aikupito ka fati ne au ona lima, kae ka tagi a ia i te mae kae mate i mua o tena fili.

²⁵Ao, ka fakavaivai ne au a ia kae fakamalosi a te tupu o Papelonia. Kafai ko tuku atu ne au ki a ia a taku pelu kae e tusi ne ia te mata o te pelu ki Aikupito, ka iloa ei ne tino katoa i a au ko te Aliki.

²⁶Ka fakasalalau ne au a tino Aikupito i te lalolagi. Tena la, ka iloa ei ne latou i a au ko te Aliki.”