Read Te Tusi Tapu I Te Gana Tuvalu Lomiga Lua ESEKIELU 31 Bible Online

ESEKIELU 31 - Te Tusi Tapu I Te Gana Tuvalu Lomiga Lua bible

ESEKIELU 31

¹I te po muamua o te tolu o masina i te sefulutasi o tausaga o matou i te tafeaga, ne faipati mai te Aliki ki a au,

²ana muna, “Te tagata ola,” fai atu ki te tupu o Aikupito mo tino o tena fenua penei: Ko oko eiloa i tou malosi! Se a te mea e mafai o fakatusa ne au a koe ki ei?

³A koe e pela [34]me se alasi i Lepanona, Mo ona kaula gali kae malumalu, Se lakau e tafasili i te maluga e oko atu ki kaumana.[35]

⁴E isi te vai e fai ne ia ke ola, Mo vaitafe i lalo i te laukele e fagai ne latou a te lakau tena. E fakasusu ne latou a te koga e ola ei te lakau, Kae maga atu foki a vai kona ki lakau katoa o te vao.

⁵Ona ko te mea e lava te vai i ei, Tela la, ne ola ake eiloa o maluga atu i nisi lakau. A ona kaula ne gasolo ake eiloa o fula kae loa.

⁶A vaega manu eva kesekese e faite olotou ofaga i ona kaula; A manu kesekese o te vao e fai olotou ofaga i ana kaula; A malo o te lalolagi e fakamanava i lalo i tena maluga.

⁷Ko oko eiloa i te gali o te lakau — Ko oko eiloa i te maluga kae loa ona kaula. A ona aka e oko ifo ki lalo i vai e tafe i lalo o te laukele.

⁸ E seai se alasi i te fatoaga o te Atua e mafai o fakatusa ki ei, E seai se mati e pena ona kaula, E seai foki se lakau e pena ona kaula. E seai eiloa se lakau i te fatoaga o te Atua e gali pena mo te lakau tena.

⁹Ne fai ne au ke gali, mo ona kaula e salalau i feitu katoa. A lakau katoa i Etena, te fatoaga o te Atua, e loto masei katoa ki ei.

¹⁰“Nei la, a au, te Aliki Sili, ka fakailoa atu ne au ki a koe a te mea ka tupu ki te lakau tena ne ola ake kae oko ki kaumana.[36] E gasolo ake o maluga, kae gasolo ake foki o fakamatamata;

¹¹tela la, ko oti ne tiaki ne au kae tuku atu ke pule ne se tino fakaatea. Ka tuku atu ne ia ki te lakau tena a te taui e tau ki ei ona ko ana amioga masei.

¹²A tino fakasaua mai i fenua fakaatea ka kati ne latou ki lalo kae tiakina. A ona kaula mo ona kaula lasi ka to ki luga i mauga mo vanu katoa i te fenua. A malo katoa kola ne nofo i tena maluga ka olo katoa keatea.

¹³A manu eva ka o'mai o tu i luga i te lakau tena, tela ko siga, ka ko manu vao ka sasale i luga i ona kaula.

¹⁴Tela la, mai i te taimi nei, e se toe ai se lakau e ola ake ke maluga pena mo te lakau tena, ke oko atu tena taulu ki kaumana, faitalia me pefea eiloa te lei o te fakasusuga e fai ki ei. A lakau katoa kona e mate katoa pela me ne tino ola, e iku katoa ki te olo o fakatasi atu ki a latou kola e olo ki lalo i te lalolagi o tino mate.”

¹⁵Konei a muna a te Aliki Sili: “I te aso tela e fanaifo ei te lakau tena ki te lalolagi o tino mate, kae ka fai ne au a vai i lalo o te laukele ke ufi ne latou a te lakau tena ke fai mo fakailoga o te lotou tagi fanoanoa. Ka taofi ne au a vaitafe ke se tafe, pena foki a vaitafe foliki. Ona ko mate a te lakau tena, tela la, ka aumai ne au te pouliga ki luga i Mauga o Lepanona kae fakamage a lakau katoa o te vao.

¹⁶Kafai ko uga atu ne au a te lakau tena ki te lalolagi o tino mate, a te pakū o tena siga ka lūlū ne ia a malo. A lakau katoa o Etena, mo lakau taua o Lepanona kola ne fakasusu fakalei, kola ko oti ne olo ifo ki lalo i te lalolagi i lalo, ka fiafia i tena sigaga.

¹⁷Ka olo tasi latou mo ia ki lalo i te lalolagi o tino mate, o fakatasi atu ki a latou kola ko leva ne i kona. Ka ko latou katoa kola e nofo i lalo o tena maluga, ka salalau atu ki malo.

¹⁸“A te lakau tena ko te tupu o Aikupito mo tino katoa o tena fenua. E seai ne lakau i Etena e loa kae gali pena. Kae nei, pela eiloa mo lakau o Etena, ka fanaifo eiloa a te lakau tena ki lalo i te lalolagi o tino mate o fakatasi atu ki tino fapaupau mo latou kola ne mate i taua. Ko au tena ne faipati atu.” Ko muna kona a te Aliki Sili.