Read Te Tusi Tapu I Te Gana Tuvalu Lomiga Lua ESEKIELU 32 Bible Online

ESEKIELU 32 - Te Tusi Tapu I Te Gana Tuvalu Lomiga Lua bible

ESEKIELU 32

¹I te po muamua o te sefululua o masina, i te sefululua o tausaga o matou i te tafeaga, ne faipati mai te Aliki ki a au,

²ana muna, “Te tagata ola, tuku atu se muna polopoloki ki te tupu o Aikupito. Tuku atu taku fekau tenei ki a ia: Au faiga e fai, pela eiloa koe me se leona ki malo, kae tela la, a koe e pela fua me se kolokolotaila tela e kapata i loto i se vaitafe. E fakalepu ne koe a te vai ki ou vae, kae fakalailai a vaitafe.

³Kafai ko maopoopo a malo e uke, kae ka po ne au koe ki toku tili kae tuku atu ke toso ne latou a te tili ki te matafaga.

⁴Ka pei ne au a koe ki lalo i te laukele kae aumai a manu eva katoa mo manu vae fa o te lalolagi ke kai ne latou a koe.

⁵Ka fakatofu ne au a mauga mo vanu ki kogā mea pala o tou foitino mate.

⁶Ka ligi keatea ne au tou toto ke salalau i luga i mauga kae fakafonu i ei a vaitafe foliki.

⁷ Kafai ko fakamasei ne au a koe, ka pono ne au a te lagi kae solo keatea a fetu. A te la ka muni mai i tua o kaumana, ka ko te masina ka seai sena mainaga.

⁸Ka tamate katoa ne au a moli o te lagi kae pei atu te otou lalolagi ki te pouliga. Ko au, te Aliki Sili, tena ne faipati atu.

⁹“E uke a malo ka mataku manafai ko fakasalalau atu ne au a te tala o te 'taga o koe ki fenua kola e seki iloa eiloa ne koe.

¹⁰A te mea ka fai ne au ki a koe ka poi i ei a malo e uke. Kafai ko kini taku pelu, kae ka polepole a tupu i te mataku. I te aso e takavale ei koe, kae ka polepole katoa latou i te mataku.”

¹¹Muna a te Aliki Sili ki te tupu o Aikupito, “Ka fakafesagai koe ki te pelu a te tupu o Papelonia.

¹²Ka tuku mai ne au a sotia mai i malo amio masei ke ta ne latou otou tino katoa ki olotou pelu. A tino katoa o te otou fenua mo mea katoa kola e fakamatamata ki ei koutou ka fakamasei katoa.

¹³Ka ta ne au otou pulumakau i tafa o vaikeli takitasi. Ka se toe ai ne tino io me ne pulumakau ke toe fakalepu ne latou a te vai.

¹⁴Ka fai ne au otou vai ke ma te lepuga kae ke ma foki, mo otou vaitafe ke tafe malie. Ko au, te Aliki Sili, tena ne faipati atu.

¹⁵Kafai ko fakamasei ne au a Aikupito kae ta fakapalele a tino kona e nofo i kona, ka iloa ei ne latou i a au ko te Aliki.

¹⁶A te muna polopoloki 'malu tenei, ka fai mo pese o te mate. A fafine o malo ka usu ne latou a te pese tena o tagi fanoanoa ona ko Aikupito mo ona tino katoa. Ko au, te Aliki Sili, tena ne faipati atu.”

¹⁷I te po sefululima o te masina muamua o te sefululua o tausaga o matou i te tafeaga, ne faipati mai te Aliki ki au,

¹⁸ana muna, “Te tagata ola,” “tagi fanoanoa ona ko tino Aikupito. Ave tasi atu latou mo nisi malo takutakua ki te lalolagi o tino mate.

¹⁹Fai atu ki a latou penei: “I tau fakatau a koe e gali atu i tino katoa? A koe ka fanaifo ki lalo i te lalolagi o tino mate Kae takato fakatasi koe i kona mo tino fapaupau.

²⁰“A tino Aikupito ka mate fakatasi mo tino kola ne mate i taua. A te pelu ko toka o tamate latou katoa.

²¹A sotia takutakua mo latou kola ne taua i te kautau a Aikupito ko tali mo te fiafia ne latou a tino Aikupito i te lalolagi o tino mate. E pakalaga latou penei: ‘A tino fapaupau kola ne mate i taua, konei ko o'mai ki lalo nei, kae konei e takato i lalo nei! ’

²²“A Asulia e i kona foki, mo tanuga o ana sotia e salalau i koga katoa kona. Ne mate katoa i taua,

²³ka ko olotou tanuga e tu i te toe koga poko eiloa o te lalolagi o tino mate. Ana sotia katoa ne mate i te taua, ka ko olotou tanuga e tu fakatamilo i tena tanuga. Ko oti aso ne mataku ei te fenua o tino ola i a latou.

²⁴“A Elama e i kona foki, mo tanuga o ana sotia e salalau i koga katoa kona. Ne mate katoa i taua, kae ne oloifo ki lalo i te lalolagi o tino mate seki pilitome. I te taimi ne ola ei latou, ne mataku valevale a tino i a latou, kae nei ko takato kae ko se aoga.

²⁵A Elama ko takato ifo i tafa o latou kola ne mate i taua, ka ko tanuga o ana sotia e tu fakatamilo i ona feitu. Ne mate katoa i taua, kae seki pilitome katoa foki. I te taimi ne ola ei latou, a tino katoa e mataku i a latou, kae nei ko takato kae ko se aoga, ko kau fakatasi i te ikuga o latou kola ne mate i taua.

²⁶“A Mesepa mo Tupalu e i kona foki, mo tanuga o la sotia i o la tafatafa. Ne mate katoa i taua, kae seki pilitome katoa foki. Ne fai latou mo tino fakamataku ki tino ola i aso ne ola ei latou.

²⁷E seki tanu mo te fakaaloalo e pela mo sotia takutakua i aso taumua,[37] kola ne olo mo olotou meatau e katoa fakalei ki te lalolagi o tino mate, a olotou pelu e tuku mai i lalo o olotou ulu, mo olotou talita i luga i olotou foitino. A tagata takutakua konei, i aso koi ola ei latou, e fakamataku ki tino ola.

²⁸“E pena a tino Aikupito me ka takato se aoga fakatasi mo tino seki pilitome kola ne mate i taua.

²⁹“A Etoma e i kona foki, mo ana tupu mo ana takitaki. A latou ne sotia malosi, kae nei, ko takato latou i te lalolagi o tino mate, fakatasi mo tino seki pilitome kola ne mate i taua.

³⁰“A pelenise katoa i matu e i kona, pena foki a tino Saitonu. I aso mua, a tino ne mataku i te lotou malosi, kae nei ko olo ifo mo te masiasi, fakatasi mo tino ne mate i taua kae ko takato o malolo, kae seki pilitome. Ko kau fakatasi latou i te masiasi o tino kola ne olo ifo ki te lalolagi o tino mate.”

³¹Muna a te Aliki Sili, “Ka tai lei te loto o te tupu o Aikupito mo tena kautau manafai e kilo ki tino katoa kona ne mate i taua.

³²“Ne fai ne au a te tupu o Aikupito ke fai ne ia a tino ola ke mataku, ka ko ia mo tena kautau katoa ka mate kae ka takato o malolo fakatasi mo tino seki pilitome kola ne mate i taua.” Ko te Aliki Sili tena ne faipati atu.