Read Te Tusi Tapu I Te Gana Tuvalu Lomiga Lua ESEKIELU 34 Bible Online

ESEKIELU 34 - Te Tusi Tapu I Te Gana Tuvalu Lomiga Lua bible

ESEKIELU 34

¹A te Aliki ne faipati mai ki a au,

²ana muna, “Te tagata ola,” “muna toka atu a takitaki o Isalaelu. Fai atu au muna fakapelofeta ki a latou, kae fai atu ki a latou i a au, te Aliki Sili, ko fai atu ki a latou penei: Koutou ko malaia, koutou leoleo mamoe o Isalaelu! E saga eiloa koutou ki a koutou, kae se onoono fakalei ki mamoe.

³E inu koutou ki susu, pei ki gatu ne faite ki vulu, kae tamate ne koutou a mamoe tafasili i te gali o kai. Kae e se mafai ne koutou o onoono fakalei ki mamoe.

⁴E seki tausi fakalei ne koutou a mamoe vaivai, seki fakalei a mamoe masaki, seki fusi ne koutou ki litaga a mamoe ne pakia, e seki fakafoki mai ne koutou ki te lafu a mamoe kola ne olo keatea mai i te lafu. E seki olo foki koutou o sala a mamoe ne galo. E seki fai ne koutou a mea kona, kae ne fai fakamasei fua ne koutou a mamoe kona.

⁵ Ona ko seai se leoleo mamoe o mamoe kona, tela la, ko salalau valevale, kae ko ta kae kai ne manu o te vao.

⁶Tena la, aku mamoe ne tekateka atu i luga i mauga. Ko salalau atu latou i te lalolagi, kae seai se tino e fano o sala latou io me taumafai o onoono ki a latou.

⁷“Koutou leoleo mamoe, fakalogo mai nei ki aku muna konei e fai atu.

⁸Au ko te Atua ola, e tau eiloa mo koutou o fakalogo mai ki a au. Aku mamoe ne ta kae kai ne manu o te vao me ko seai ne leoleo mamoe. Aku leoleo mamoe e seki taumafai o sala a mamoe. E saga eiloa ki a latou, kae ko se saga ki mamoe.

⁹Tela la, koutou leoleo mamoe, fakalogo mai nei ki a au.

¹⁰Au, te Aliki Sili, ko fai atu i a koutou ko oku fili. Ka ave keatea ne au aku mamoe mai i a koutou, kae se toe fai koutou mo leoleo mamoe o latou; ka se toetuku atu ne au koutou ke saga fua ki a koutou eiloa. Ka fakasao ne au aku mamoe mai i a koutou, kae se toetuku atu ke kai ne koutou.

¹¹“Au, te Aliki Sili, ko fai atu i a au ka fano o sala aku mamoe o tausi fakalei,

¹²e pela eiloa mo te leoleo mamoe tela e tausi fakalei ana mamoe kola ne galo, kae ko oti ne toe fakamaopoopo mai ne ia. Ka toe fakafoki mai ne au latou mai i koga katoa kola ne salalau ki ei latou i te aso pouli kae puapuaga tela ne oko ki a latou.

¹³Ka puke mai ne au mai i fenua fakaatea, fakamaopoopo mai ne au, kae toe fakafoki mai ki te lotou fenua tonu. Ka toe taki atu ne au latou ki mauga mo vaitafe foliki o Isalaelu, kae fagai latou i laukele moukua gali.

¹⁴Ka tuku atu ne au ke kaikai mo te saogalemu i mouku i luga i mauga, pela foki i vanu mo koga mouku lau usiusi katoa o Isalaelu.

¹⁵Ko au eiloa ka fai mo leoleo mamoe o aku mamoe, kae ka sala ne au se koga mo fakamanava latou. Ko au, te Aliki Sili, tena ne faipati atu.

¹⁶“Ka sala ne au a latou kola ne galo, toe fakafoki mai latou kola ne takasese ki koga fakaatea, fusi a pakiaga o latou kola e pakia, kae fakalei a latou kola e masaki; ka ko latou kola e puta kae malosi ka ta ne au, me i a au se leoleo mamoe tela e fai ne au a te mea tonu.

¹⁷“Nei la e taku lafu, a au, te Aliki Sili, ko fai atu me ka fakamasino ne au a koutou taki tokotasi, kae vae a mamoe lei mai i mamoe masei, pena foki a mamoe mai i kouti.

¹⁸A nisi o koutou e se malie i te kai ki mouku tafasili i te lei; e lakalaka foki eiloa ne koutou a mea kola e se kai ne koutou! E inu ne koutou a te vai ma, kae fakalepu a vai kola e se inu koutou i ei!

¹⁹A nisi mamoe a aku e kai ne latou a mouku kola e lakalaka ne koutou, kae inu a vai kola e fakalepu ne koutou.

²⁰“Tela la, au, te Aliki Sili, ko fai atu me ka fakamasino ne au koutou mamoe malosi mo mamoe vaivai.

²¹E fakatafa keatea ne koutou a mamoe masaki kae ave keatea mai i te lafu.

²²Ka fakasao ne au aku mamoe ke mo a e toe fai fakamasei ne tino. Ka fakamasino ne au aku mamoe takitasi kae vae keatea a mamoe lei mai i mamoe masei.

²³ Ka tuku atu ne au se tupu ki a latou pela mo taku tavini ko Tavita, ke fai mo leoleo mamoe o latou, kae ka tausi fakalei eiloa ne ia latou.

²⁴ Ko au, te Aliki, ka fai mo Atua o latou, kae aumai ne au se tupu pela mo taku tavini ko Tavita ke fai mo takitaki o latou. Ko au ne faipati atu.

²⁵Ka fai ne au se feagaiga mo latou tela e mautinoa tonu ei i a latou e saogalemu faeloa. Ka ave keatea ne au a manu fakamataku i te fenua, ko te mea ke mafai o ola aku mamoe mo te saogalemu i tua o te fa'kai, kae moe i te vao.

²⁶“Ka fakamanuia ne au latou kae tuku ke nofo i tafatafa o toku mauga tapu. I kona ka fakamanuia ei ne au latou ki vaiua manafai e manako mai ki ne vaiua.

²⁷A lakau ka fua mai olotou fuataga, a fatoaga ka fua mai, ka ko tino katoa ka ola mo te saogalemu i luga i olotou manafa taki tokotasi. Kafai ko motumotu ne au a filifili kola e saisai ei oku tino, kae fakasaoloto latou mai i tino kola e olo o fakapologa latou, tena la, ka iloa ei ne latou i a au ko te Aliki.

²⁸A malo fapaupau ka se toe o'mai o ta kae fao olotou mea, pena foki a manu fekai ka se toe o'mai o ta kae kai latou. Ka ola latou mo te saogalemu, kae ka se toe ai se tino e vau o fakamatakutaku latou.

²⁹Ka tuku atu ne au ki a latou a laukele ola, kae fakagata te mate fiakai i luga i te fenua. A nisi malo ka se toe o'mai o fakalili latou.

³⁰Ka iloa ne tino katoa me e puipui ne au a Isalaelu, me ko oku tino. Ko au, te Aliki Sili, tena ne faipati atu.”

³¹Muna a te Aliki Sili, “A koutou aku mamoe, te lafu tela e fagai ne au, koutou ko oku tino, ka ko au ko te otou Atua.”