Read Te Tusi Tapu I Te Gana Tuvalu Lomiga Lua ESEKIELU 36 Bible Online

ESEKIELU 36 - Te Tusi Tapu I Te Gana Tuvalu Lomiga Lua bible

ESEKIELU 36

¹Muna a te Aliki, “Te tagata ola, faipati atu ki mauga o Isalaelu, kae fai atu ki ei ke fakalogo mai ki taku fekau

²ki a latou, ko au ko te Aliki Sili: A fili o Isalaelu e fai olotou muna fakamatamata penei, ‘A mauga taumua kona ko fai nei mo tatou! ’

³“Fai au muna fakapelofeta, kae folafola atu aku muna konei, ko au ko te Aliki Sili. I te taimi ne fakatakavale ei ne malo pili ki Isalaelu a mauga o Isalaelu, ne fakamae ne latou a Isalaelu.

⁴Tela la, fakalogo mai nei ki aku muna, ko au ko te Aliki Sili, e fai ki mauga, ki alia mo vanu, pena foki ki koga ne maofa, mo fa'kai seai ne tino i ei kola ne fao malo a mea i ei kae fakalili ne malo pili mai katoa.

⁵“Au, te Aliki Sili, ko oti ne faipati mo toku kaitaua ki malo pili mai, kae maise eiloa a Etoma. Ne puke ne latou toku fenua mo mouku lau usiusi, kae fakamatamata kae katakata.

⁶“Tela la, fai au muna fakapelofeta ki te fenua o Isalaelu; fai atu ki mauga, alia, mo vanu aku muna ne fai i toku kaitaua ona ko toku loto masei, i faiga a malo o fakaseaoga latou.

⁷Au, te Aliki Sili, ko tauto fakamaoni atu, i malo pili mai ka fakaseaoga ne au.

⁸Ka ko lakau i luga i mauga o Isalaelu ka toe ola ake olotou lau kae fua mai olotou fuataga ma koutou toku fenua ko Isalaelu. E se leva nei kae ka foki mai koutou.

⁹Au e kau i a koutou, kae ka onoono tonu au ke toe fakamalu a otou fatoaga kae ke toki foki a fuataga o otou lakau kaina i kona.

¹⁰Ka fakatokouke ne au otou tino. Ka nofo koutou i fa'kai lasi kae toe faite a mea katoa kola ne maofa.

¹¹Ka fakatokouke ne au a tino mo pulumakau. Ka tokouke atu koutou nei i lo aso mua, kae ka tokouke foki otou tamaliki. Ka fakanofo ne au koutou i kona, i te koga ne nofo sale koutou i ei, kae ka fakamaumea ne au koutou ke silia atu i aso mua. Tena la, ka iloa ei ne koutou i a au ko te Aliki.

¹²Toku fenua ko Isalaelu, ka toe fakafoki mai ne au koutou ke toe nofo i te fenua tenei. Ka fai mo fenua tonu eiloa o koutou, kae ka se toe mate fiakai otou tamaliki i te fenua tena.

¹³“Ko au, te Aliki Sili, ko fai atu penei: E tonu i te fenua tenei e fakaigoa ne tino se fenua kai tino, kae e fai mai foki me e ta ne ia a tamaliki o tena malo.

¹⁴Kae mai i te taimi nei, ka se toe fai mo fenua kai tino tela e ta ne ia au tamaliki. Ko au, te Aliki Sili, tena ne faipati atu.

¹⁵A te fenua ka se toe fakalogo ki muna fakalili a malo, ka se toe kilo foki ki tino e fakalili mai ki ei. A te laukele ka se toe ta ne ia a tamaliki a te malo. Ko au, te Aliki Sili, tena ne faipati atu.”

¹⁶A te Aliki ne faipati mai ki a au,

¹⁷ana muna, “Te tagata ola,” i te taimi ne nofo ei te kau Isalaelu i te lotou fenua, ne fakalailai ne latou i uiga mo faiga o te olaga o latou. E fakapau ne au a te lailai o olotou faiga e pela mo te lailai i feitu fakatapuakiga o te fafine e masaki fakafafine.[39]

¹⁸Ne fai ne au ke lagona ne latou a te malosi o toku kaitaua, ona ko te taga tino ne fai ne latou i te fenua, mo tupua kola ne ala ei o fakalailai ne latou a te fenua.

¹⁹Ne fakamalaia ne au latou ona ko uiga mo faiga a latou, kae ne fakasalalau ne au latou ki malo fakaatea.

²⁰I so se koga e olo ki ei latou, e fakamasiasi faeloa ne latou toku igoa tapu, me i tino i koga kona e fai ake penei, ‘A tino konei ko faimalo ke tiaki ne latou a te fenua tela ne tuku atu ne te lotou Atua mo latou’

²¹Ko fai te mea tena mo mea e manatu mafa ei au ki toku igoa tapu, me i toku igoa tapu e fakamasiasi faeloa ne tino Isalaelu i so se koga e olo latou ki ei.

²²“Tuku atu nei ki tino Isalaelu a te fekau a te Aliki Sili ki a latou: A te mea tenei ka fai ne au e se fai ona ko koutou, kae fai ne au ona ko toku igoa tapu, tela ne fakatakuvalea ne koutou i fenua katoa ne olo koutou i ei.

²³Kafai ko fakaasi ne au ki malo a te tapu o toku igoa takutakua — te igoa tela ne fakatakuvalea ne koutou i olotou fenua — tena la, ka iloa ei ne latou i a au ko te Aliki. Ko au, te Aliki Sili, tena ne faipati atu. Ka fakaaoga ne au a koe o fakaasi atu ki malo i au e tapu.

²⁴Ka puke mai ne au koutou mai i malo mo fenua katoa, kae toe fakafoki mai koutou ki te otou fenua.

²⁵Ka ligiligi atu ne au ne vai ki luga i a koutou kae fakama koutou mai i otou tupua mo mea katoa kola ne fakalailaigina ei koutou i feitu fakatapuakiga.

²⁶ Ka avatu ne au se loto fou mo se mafaufauga fou. Ka ave keatea ne au a tou loto makeke pela me se fatu, kae tuku atu se loto fakalogo gofie.

²⁷Ka tuku atu toku agaga ki a koutou, kae ka onoono tonu au ke tautali koutou i aku tulafono kae tausi aku fakatonuga katoa kola ne tuku atu ne au.

²⁸Tena, ka nofo ei koutou i te fenua ne tuku atu ne au ki otou tupuga. A koutou ka fai mo oku tino, ka ko au ka fai mo Atua o koutou.

²⁹Ka fakasao ne au koutou mai i mea katoa kola ne lailai koutou i ei. Ka fakatonu ne au a te saito ke uke, ko te mea ke se toe ai ne oge.

³⁰Ka fakauke ne au a fuataga o otou lakau kaina, mo fuataga o otou fatoaga, ko te mea ke se toe ai ne oge e fakatauemugina ei koutou ne malo.

³¹Ka manatua ne koutou otou uiga masei mo mea se ne fai ne koutou, kae ka takalialia koutou i a koutou eiloa ona ko otou agasala mo otou mea se ne fai.

³²Isalaelu, au e manako ke iloa ne koutou me e se fai ne au a mea katoa konei ona ko koutou. Au e manako ke lagona ne koutou te ma mo te masiasi i mea ne fai ne koutou. Ko au, te Aliki Sili, tena ne faipati atu.”

³³Muna a te Aliki Sili, “Kafai ko oti ne faka'ma ne au koutou mai i otou agasala katoa, ko toetuku atu ei ne au koutou ke toe nofo i otou fa'kai, o toe faite a koga ne masei.

³⁴A tino kola ne masani o fakasili sale i otou fatoaga ne lavea ne latou me ko oko eiloa i te pupu kae fonu i mouku, kae ka toetuku ne au ke toe fai fakalei ne koutou.

³⁵A tino katoa ka lavea ne latou a te fenua tenei, tela se toga vao i aso mua, ko pela eiloa mo te Fatoaga i Etena, mo fa'kai kola ne maofa, puke a mea taua i ei, kae ofa fakamasei, ko isi nei ne tino i ei kae ko pui fakamalosi foki.

³⁶Tena la, ka iloa ei ne malo pili mai kola ne sao, i a au, te Aliki, e toe faite sale ne au a fa'kai ne maofa kae toe toki a laukele ne fakamaseigina. Au, te Aliki, ne tauto me e fai ne au a te mea tena — kae e fai eiloa ne au.”

³⁷Muna a te Aliki Sili, “Ka toe talia ne au a tino Isalaelu ke kalaga mai ki a au mo se fesoasoani, kae ka fakatokouke eiloa ne au latou e pela me se lafu mamoe.

³⁸A fa'kai konei e maofa ka fonu i tino i te taimi tena, e pela mo Ielusalema i aso mua tela ne fonu i mamoe kola ne ofo mo fai a taulaga i aso fakamanatu. Tena la, ka iloa ei ne latou i a au ko te Aliki.”