Read Te Tusi Tapu I Te Gana Tuvalu Lomiga Lua ESEKIELU 37 Bible Online

ESEKIELU 37 - Te Tusi Tapu I Te Gana Tuvalu Lomiga Lua bible

ESEKIELU 37

¹Ne lagona ne au ki toku foitino a te mana o te fakatasi mai o te Aliki, tena ne puke ake au ne tena agaga o ave o tuku i te vanu tela e fonu i ivi.

²Ne taki ne ia au i loto i te vanu tena, kae ne lavea ne au a ivi e uke kae ko oko eiloa i te malō.

³Ana muna ki a au, “Te tagata ola, e mafai o toe ola ake a ivi konei?” Ne tali atu au penei, “Te Aliki Sili, ko koe fua e mafai o tali ne koe a te fesili tena!”

⁴Muna a ia penei, “Fai au muna fakapelofeta ki ivi kona. Fai ki ivi malō kona ke fakalogo mai ki muna a te Aliki.

⁵Fai ki ei i a au, te Aliki Sili, ko fai atu ki a latou penei: Ka tuku atu ne au a te manava ki a koutou kae toe fakaola mai kou.

⁶Ka tuku atu ne au a kano mo uaua, kae ufi atu mo te pakili mai i tua. Ka tuku atu ne au te manava ki a koutou kae toe fakaola mai koutou. Tena, ka iloa ei ne koutou i a au ko te Aliki.”

⁷Tena, ne fai ei aku muna fakapelofeta, e pela eiloa mo te fakatonuga ki a au. I te taimi ne faipati ei au, kae lagona ne au te leo o mea e gasuesue, tena la, ko ivi ko kamata o soko fakatasi.

⁸Ne onoono atu eiloa au i te pikiga o kano mo uaua ki ivi, kae ufi mai i tua ko te pakili. Kae e seki ai se manava kai oko ki foitino kona.

⁹Muna a te Atua ki a au, “Te tagata ola, fai au muna fakapelofeta ki te matagi.[40] Fai ki te matagi i te Aliki Sili ko fakatonu atu ki ei ke agi mai i feitu katoa, ke manava ki loto i foitino mate kona, ke toe fakaola.

¹⁰ Tena, ne fai eiloa aku muna fakapelofeta e pela eiloa mo te fakatonuga ne fai mai ki a au. Ne ulu atu te manava ki loto i foitino kona, tena ne ola ei, ko te mea eiloa ko tu ki luga. A te tokouke o latou e lava eiloa i ei se kautau.

¹¹Muna a te Atua ki a au, “Te tagata ola, a tino Isalaelu e penei mo ivi konei. E fai mai olotou muna i a latou ko mage valevale, ko seai se fakamoemoega o latou mo aso fakamuli.

¹²Tela la, faipati atu fakapelofeta ki toku fenua ko Isalaelu, kae fai ki ei i a au, te Aliki Sili, ka tala ne au a pono o olotou tanuga. Ka avake ne au latou o toe fakafoki mai ki te fenua o Isalaelu.

¹³Kafai ko tala ne au a tanuga kola e tanu ei oku tino, o aumai latou ki tua, ka iloa ei ne latou i a au ko te Aliki.

¹⁴Ka manava atu au ki a latou, o toe fakaola mai latou, kae tuku ke nofo i te lotou fenua tonu. Tena la, ka iloa ei ne latou i a au ko te Aliki. Au ne tauto me e fai ne au a te mea tenei — e fai eiloa ne au. Ko au, te Aliki, tena ne faipati atu.”

¹⁵A te Aliki ne toe faipati mai ki a au,

¹⁶ana muna, “Te tagata ola,” puke mai se potulakau kae tusi i luga i ei a muna konei, ‘Te malo o Iuta.’ Ka oti ko puke te sua potulakau, kae tusi i ei a muna konei, ‘Te malo o Isalaelu.’

¹⁷Tena la, ko taofi ei ne koe ki ou lima a lakau kona, mo o la mata e fepaki ki loto, tela la, e pela me se lakau e tasi.

¹⁸Kafai e fesili atu tou fenua ke fakaasi atu ki a latou a te uiga o te mea tena,

¹⁹fai ki ei i au, te Aliki Sili, ka puke mai ne au a te lakau tela e tusi i ei a te igoa o Isalaelu o tuku fakatasi mo te lakau tela e tusi i ei a te igoa o Iuta. Ka fai ne au a lakau kona e lua ke tasi, kae taofi ne au ki toku lima.

²⁰“Taofi a lakau kona ki tou lima, ke lavea ne tino.

²¹Tena la, ko fai ei koe ki a latou i a au, te Aliki Sili, ka puke mai ne au a tino o toku fenua mai i malo kola ne olo ki ei latou, kae fakamaopoopo mai latou o fakafoki mai ki te lotou fenua tonu.

²²Ka tuku fakatasi ne au latou ke fai mo malo e tasi i luga i te fenua, i luga i mauga o Isalaelu. Ka tasi te tupu e pule i a latou, kae ka se toe mavae latou o fai mo malo e lua.

²³Ka se toe fakalailai olotou foitino i tupua mataga io me fakapuapuaga latou i agasala. Ka fakasao ne au latou mai i auala masei kola ne masani o agasala mai sale ei latou ki a au kae fulitua mai ki a au. Ka faka'ma ne au latou; ka fai latou mo oku tino ka ko au ka fai mo Atua o latou.

²⁴ Ka fai mo tupu o latou se tupu pela eiloa mo taku tavini ko Tavita. Ka tasi latou i lalo o te pule e tokotasi, kae ka tausi fakamaoni ki aku tulafono.

²⁵Ka nofo latou i te fenua tela ne tuku ne au ki taku tavini ko Iakopo, te fenua ne nofo ei olotou tupuga. Ka nofo tumau latou i kona, pena foki olotou tamaliki mo tino katoa e tupu mai i a latou. Ka pule latou ne se tupu pela mo taku tavini ko Tavita ki te se gata mai.

²⁶Ka fai ne au se feagaiga mo latou tela ka puipui ei latou ke saogalemu ki te se gata mai. Ka fakamautu ne au latou kae fakatokouke, kae fakatu toku Faletapu i te lotou fenua, kae ka tu i kona ki te se gata mai.

²⁷ Ka nofo fakatasi au mo latou i kona; ka fai au mo Atua o latou, ka ko latou ka fai mo oku tino.

²⁸Kafai ko fakatu ne au toku Faletapu i te lotou fenua ki te se gata mai, tena la, ko iloa ei ne malo i a au, te Aliki, ko oti ne filifili ne au a Isalaelu ke fai mo oku fenua tonu.”