Read Te Tusi Tapu I Te Gana Tuvalu Lomiga Lua ESEKIELU 4 Bible Online

ESEKIELU 4 - Te Tusi Tapu I Te Gana Tuvalu Lomiga Lua bible

ESEKIELU 4

¹Muna a te Atua, “Te tagata ola, puke mai se puliki o tuku i ou mua, kae vasevase atu ne laina i ei ke fai pela me ko te fa'kai o Ielusalema.

²Ka oti ko fai ei ne koe ne mea pela me ne lua, mo one e fakatu ki luga, mo ne koga e manava ei a kautau, mo lakau kola e tuki ei a mataloa o fa'kai, ke fai a mea kona fakatamilo i te fa'kai. E fai ne koe a mea kona ke fai pela i te fa'kai ko nikoi ne te fili.

³Puke mai se ulo fiti kae fakatu i te va o koe mo te fa'kai, ke fai pela me se pui. Saga ou mata ki te fa'kai. Ko nikoi ne te fili, ko koe tena e nikoi ne koe. A te mea tena se fakailoga ki tino Isalaelu.

⁴“Ka oti, ko takato ifo ei koe i tou feitu fakamaui,[5] kae ka tuku atu ne au ki luga i a koe a te agasala a te malo o Isalaelu. E tusa mo te 390 aso e nofo ei koe i kona o puapuaga ona ko agasala a latou. Ko oti ne fai ne au tou ikuga, e tasi te aso i te tausaga e puapuaga ei koe, ke oko eiloa ki te taimi e oti ei tausaga o te olotou fakasalaga.

⁶Kafai ko oti tena, ko toe fuli ei koe ki tou feitu fakaatamai ke puapuaga koe i te agasala a Iuta i aso e fasefulu — e tasi te aso i te tausaga, i tausaga katoa o te lotou fakasalaga.

⁷“Kilo ou mata ki te nikoiga o Ielusalema. Fakatutu tau fusu ki te fa'kai kae fai au muna fakapelofeta ki ei.

⁸Ka saisai ne au a koe ko te mea ke se mafai ne koe o fuli mai i te sua feitu ki te sua feitu, ke oko ki te taimi e oti ei te pukega o te fa'kai.

⁹“Puke nei ne mu saito, kalite, pini, pi, Mileta, mo ne sipele. Palu fakatasi a mea katoa kona o faite ki ei se falaoa fakafete. Tena te mea e kai ne koe i aso e 390 kola e takato ei koe i tou feitu fakamaui.

¹⁰E tusa mo te 230 kalame o falaoa fakafete ma koe i te aso; kona eiloa au mea ke oko ki te sua aso.

¹¹A tau meainu foki e fua eiloa, e lua ipu i te aso.

¹²Ka fakaka tau afi ki fafie kola ne fekau pakupaku o te tino ola, ka tunu tau falaoa i te afi tena, ko kai ei ne koe i te koga e lavea ei koe ne tino katoa.”

¹³Muna a te Aliki, “A te mea tena se ata o meakai kola ka kai ne tino Isalaelu, kola e tapu i te tulafono, [6] i te taimi e fakasalalau ei ne au latou ki fenua fakaatea.”

¹⁴Kae ne tali atu au penei, “Ikai, te Aliki Sili! E seki fakalailai eiloa ne au toku foitino. Talu mai taku folikiga, e seki kai eiloa au i kano o se manu tela ne mate eiloa i a ia, io me se manu tela ne ta ne manu fekai. E seki kai eiloa ne au se meakai tela e lailai i feitu fakatapuakiga.”

¹⁵Tena ne fai mai ei te Atua penei, “Ko lei. Ka tuku atu ne au ke fakaaoga ne koe a fekau o pulumakau, kae ka mafai o tao au falaoa i luga i te afi tena.”

¹⁶Kae ne toe fai mai a ia penei, “Te tagata ola, ka fakagata ne au a falaoa fakafete kola e aumai sale ki Ielusalema. A tino i kona ka fanoanoa kae ka pole olotou loto i te taimi e fua ei ne latou a meakai e kai ei latou, mo vai e inu ei latou.

¹⁷Ka palele olotou falaoa fakafete mo vai; ka fanoanoa latou kae gasolo ifo eiloa o vaivai ona ko olotou agasala.”