Read Te Tusi Tapu I Te Gana Tuvalu Lomiga Lua ESEKIELU 40 Bible Online

ESEKIELU 40 - Te Tusi Tapu I Te Gana Tuvalu Lomiga Lua bible

ESEKIELU 40

¹A te aso nei ko te sefulu o aso o te tausaga fou, tela ko te luasefulu lima o tausaga o matou i te tafeaga, kae ko sefulufa ei tausaga talu mai te fakatakavalega o Ielusalema. I te aso tena, ne lagona ei ne au a te mana o te fakatasi mai o te Aliki, tena ne puke mai ki a au o ave au.

² I te fakaasiga tena, ne puke au ne te Atua o ave ki te fenua o Isalaelu, kae tuku ne ia au i luga i te mauga maluga. Ne lavea ne au[43] a fale e uke, e pela me se fa'kai.

³ Ne avatu eiloa ne ia au ke pili, lavea ei ne au a te tagata e malipolipo pela me se palasi. E puke mai ne ia a te teipi lino tela e fua ei mea mao, mo te lula lakau, kae e tu mai i tafa o te mataloa.

⁴Muna a ia ki a au, “Te tagata ola, onoono fakalei. Fakalogologo fakalei kae saga tonu mai ki mea katoa konei ka fakaasi atu ne au, me e tena te pogai ne aumai ei koe ki konei. Ka taku atu ne koe ki tino Isalaelu a mea katoa ne lavea ne koe.”

⁵ A te mea ne lavea ne au se Faletapu, kae e isi se pui e fakatamilo mai i tua. Ne puke aka ne te tagata tena a tena lula lakau, tela e tolu mita te loa, fua ei ne ia a te pui; e tusa mo te tolu mita te maluga kae tolu mita te matolu.

⁶Tena, fano ei a ia ki te mataloa tela e fakasaga ki te saegala. Ne kake atu a ia i sitepu o fano ki luga, oko atu a ia ki luga, fua ei ne ia a te mataloa; e tusa mo te tolu mita te poko.[44]

⁷Mai i tua atu e isi se auala, tela e taki tolu a potu tiute i feitu takitasi. A te potu e tasi e fakata'fa lei, e tolu mita i feitu katoa, ka ko pui i va o potu kona e taki lua mo te afā mita te matolu. Mai i tua atu o potu tiute kona e isi foki se auala i ei tela e tolu mita te loa kae e tau atu ki te potu lasi tela e fakasaga ki te Faletapu.

⁸Ne fua ne ia a te potu tena, e tusa mo te fa mita te poko. A te potu tena ko te mata o te mataloa i te feitu tena, ko te auala tena tela e pili ki te Faletapu, kae i te sua mata o ia, a pui i ei e takitasi mita te matolu.

⁹

¹⁰(A potu tiute konei i feitu takitasi o te auala e pau katoa te lasi, mo pui i va o latou e pau katoa foki te matolu.)

¹¹Oti aka, fua ei ne te tagata tena a te lauefa o te auala i te mataloa. E tusa mo te ono mo te afā mita, ka ko te va o mataloa kona e tusa mo te lima mita.

¹²I mua o potu tiute takitasi e isi se pui malalo, e tusa mo te limasefulu senitimita te maluga kae limasefulu foki senitimita te matolu. (A potu kona e taki tolu mita te fakata'fa.)

¹³Tena, fua ei ne ia te mao mai i te pui ki tua o te potu e tasi ki te pui ki tua[45] o te potu i te sua feitu o te auala, e tusa mo te sefululua mo te afa mita.

¹⁴A te potu i te mata e tau atu ki te potu fono. Ne fua ne ia a te potu tena, e tusa mo te sefulu mita te lauefa.

¹⁵A te katoaga o te loa o te auala ki te mataloa, mai i te pui ki tua o te mataloa ke oko ki te mata fakaoti o te toe potu, e tusa mo te luasefulu lima mita.

¹⁶E isi ne fakamalama foliki i pui tafa ki tua o potu katoa, pena foki i pui tafa ki loto i va o potu takitasi. E isi foki ne ata o lakau ko pama e koli i feitu ki loto o pui kola e fakasaga ki te auala.

¹⁷Ne ave au ne te tagata tena i te mataloa ke oko ki te potu fono. E tusa mo te tolusefulu a potu e piki ki te pui tafa ki tua, kae i mua o potu kona e isi se koga e fola ki fatu,

¹⁸tela e silia atu i feitu katoa o te potu fono. A te potu fono tafa ki tua tenei e tai tu i te malologa i lo te potu fono tafa ki loto.

¹⁹E isi se mataloa i te koga tai maluga, tela e fano ki te potu fono tafa ki loto. Ne fua ne te tagata tena te mao o te ava mataloa kona, e tusa mo te limasefulu mita.

²⁰Tena, fua foki ei ne te tagata tena a te mataloa i te feitu ki matu tela e fano ki te potu fono tafa ki tua.

²¹A potu tiute e takitolu i feitu takitasi o te auala, a pui i te va o potu kona, mo te potu lasi, e pau katoa te fua pela mo potu i te mataloa ki te saegala. A te loa o te auala o te mataloa tena e tusa mo te luasefulu lima mita, ka ko te lauefa e sefululua mo te afa mita.

²²A te potu lasi, famalama mo ata o lakau ko pama, e pela eiloa mo mea kola i te mataloa ki te saegala. I konei, e fitu a sitepu ki te mataloa, ka ko te potu lasi e tu i te mata kae fakasaga ki te potu fono.

²³Mai i te mataloa ki matu tenei o fanatu ki te potu fono, e isi foki se mataloa tela e fano ki te potu fono tafa ki loto, e pela eiloa mo te mataloa i te feitu ki te saegala. Ne fua ne te tagata tena te va o te ava mataloa kona, e tusa mo te limasefulu mita.

²⁴Fakamuli ifo, ne ave foki au ne te tagata tena ki te feitu ki saute, i kona ne lavea foki ne maua te sua mataloa. Ne fua ne ia, kae e pau eiloa mo nisi mataloa muamua.

²⁵E isi ne fakamalama o potu i te mataloa tena, e pela eiloa mo mataloa muamua. A te loa o te auala o te mataloa tena e tusa mo te luasefulu lima mita, ka ko te lauefa e sefululua mo te afa mita.

²⁶E fitu a sitepu ki luga i te mataloa tena, mo tena potu lasi e tu foki i te mata kae fakasaga ki te potu fono. E isi foki ne ata o lakau ko pama kola e koli i feitu ki loto o pui kola e fakasaga ki te auala.

²⁷I konei foki, e isi se mataloa tela e fano ki te potu fono. Ne fua ne te tagata tenei a te mao ki te mataloa tenei, e tusa mo te limasefulu mita.

²⁸Ne avatu au ne te tagata tena i loto i te mataloa i saute, oko atu ei ki te potu fono tafa ki loto. Ne fua ne ia a te mataloa tena, kae e pau eiloa mo mataloa i te pui tafa ki tua.

²⁹A ona potu tiute, tena potu lasi, mo ona pui ki loto e pau katoa eiloa mo nisi mataloa. E isi foki ne fakamalama i potu o te mataloa tenei. A te loa e luasefulu lima mita, ka ko te lauefa e sefululua mo te afa mita.

³⁰

³¹A tena potu lasi e fakasaga ki te sua potu fono, ka ko ata o lakau ko pama e koli i pui i feitu o te auala. E valu a sitepu ki luga i te mataloa tena.

³²Ne ave au ne te tagata tena i loto i te mataloa ki te saegala, oko atu ei ki loto i te potu fono tafa ki loto. Ne fua ne ia te mataloa, e pau eiloa mo nisi mataloa.

³³A ona potu tiute, tena potu lasi, mo ona pui ki loto e pau katoa te lasi mo potu pena i nisi mataloa. E isi ne fakamalama i kona, pela foki i te potu lasi. A te loa e luasefulu lima mita, ka ko te lauefa e sefululua mo te afā mita.

³⁴A te potu lasi e fakasaga ki te potufono tafa ki tua. A ata o lakau ko pama e koli i pui i feitu o te auala. E valu a sitepu ki luga i te mataloa tena.

³⁵Tena, ne ave foki au ne te tagata tena ki te mataloa ki matu. Ne fua ne ia, e pau eiloa mo nisi mataloa.

³⁶E isi foki ne potu tiute i ei, mo te potu lasi, mo pui ne fakagaligali, mo fakamalama i feitu katoa. A te loa e luasefulu lima mita, ka ko te lauefa e sefululua mo te afā mita.

³⁷A te potu lasi e fakasaga ki te potu[46] fono tafa ki tua. A ata o lakau ko pama e koli i pui i feitu o te auala. E valu a sitepu ki luga i te mataloa tena.

³⁸I te potu fono tafa ki tua, e isi se potu fakaopoopo tela e piki ki te mataloa ki loto, i te feitu ki matu. E matala ki loto i te potu lasi tela e fakasaga ki te potu fono, i kona ne fulu ei ne latou a foitino mate o manu vae fa kola e fai o sunu katoa mo fai a taulaga.

³⁹I te potu lasi tenei, e fa taipola i ei, e taki lua i feitu takitasi o te potu. Kona a taipola e tamate saale ne latou i ei a manu vae fa ke fai mo taulaga; me e sunu katoa, io me fai mo taulaga mo agasala, io me ko taulaga o te toe togiga o te agasala.

⁴⁰E isi foki ne taipola pena i tua o te potu, e taki lua i feitu takitasi o te auala o te mataloa ki matu.

⁴¹E tusa mo te valu te aofaki katoa o taipola kola e tamate i ei a manu mo taulaga: e fa i loto i te potu kae e fa i tua i te potu fono.

⁴²A taipola e fa i te fakaosoga, kola e fakatoka i ei a taulaga ke sunu katoa, ne faite ki fatu. E taki limasefulu senitimita te maluga, ka ko koga i luga e taki fitusefulu lima senitimita te sikuea. A mea katoa kola e fakaaoga mo tamate saale ei a manu o te taulaga e teu i luga i taipola kona.

⁴³E isi ne patini e taki fitusefulu lima milimita te lauefa e 'tele i kaugutu o te taipola. A kano manu katoa kola e fai o ofo mo fai te taulaga e tuku i luga i taipola.

⁴⁴Tena, ne avatu foki ne ia au ki loto i te potu fono tafa ki loto. E lua potu e matala ki loto i te potu fono tafa ki loto, e tasi e fakasaga ki saute i tafa o te mataloa i matu, ka ko te sua potu e fakasaga ki matu i tafa o te mataloa ki saute.

⁴⁵A te tagata tena ne fai mai i te potu tela e fakasaga ki saute ko te potu o faitaulaga kola e galue i te Faletapu,

⁴⁶ka ko te potu tela e fakasaga ki matu ko te potu o faitaulaga kola e galue i te fata-fai-taulaga. A faitaulaga katoa ne tupu mai i a Satoka; ko latou fua kona i te matakaiga o Levi e saoloto o olo ki mua o te Aliki o tavini atu ki a ia.

⁴⁷Ne fua ne te tagata tena a te potu fono tafa ki loto, e tusa mo te limasefulu mita te sikuea. A te Faletapu e tu i te feitu ki te togala, ka ko te fata-fai-taulaga e tu i ona mua.

⁴⁸Tena ne ave ei ne ia au ki te fapaologa o te Faletapu. Ne fua ne ia a te mataloa tena: e tusa mo te lua mo te afā mita te poko kae e fitu mita te lauefa, mo pui i feitu e takitasi mo te afā mita te matolu.

⁴⁹E isi ne sitepu e oloake ki te fapaologa tena, tela e tusa mo te sefulu mita te lauefa kae ono mita te poko.[47] E lua a pou, e takitasi i feitu takitasi o te mataloa.