Read Te Tusi Tapu I Te Gana Tuvalu Lomiga Lua ESEKIELU 41 Bible Online

ESEKIELU 41 - Te Tusi Tapu I Te Gana Tuvalu Lomiga Lua bible

ESEKIELU 41

¹Mai tua ifo, ne toe ave au ne te tagata tena ki te potu i te kogaloto, ko te Potu Tapu. Ne fua ne ia a te auala tela e fano ki ei: e tusa mo te tolu mita te poko

²kae lima mita te lauefa, mo pui i ona feitu takitasi e taki lua mo te afā mita te matolu. Ne fua foki ne ia a te potu: e luasefulu mita te loa, kae sefulu mita te lauefa.

³Tena ne fanatu foki a ia ki te potu tafa eiloa ki loto. Ne fua ne ia te auala ki ei: e tasi te mita te poko kae tolu mita te lauefa, mo pui i ona feitu e taki tolu mo te afā mita te matolu.[48]

⁴Ne fua ne ia te potu tena, e sefulu mita te fakata'fa. Tena ne fai mai ei a ia ki a au penei, “Tenei te Potu Tafasili i te Tapu.”

⁵Ne fua ne te tagata tena a te matolu o te pui loto o te Faletapu, e tusa mo te tolu mita. E isi ne potu foliki e taki lua mita te lauefa e faite ki luga i te pui tena.

⁶A potu konei e fogafale tolu, e tolusefulu potu i te fogafale e tasi. A te pui tua o te Faletapu e tai manifi i te fogafale ki luga, kae e gasolosolo o matolu i fogafale ki lalo, ko te mea ko potu ke lago fua ki luga i pui kae se tuki ki ei.

⁷Tela la, a pui o te Faletapu e pela eiloa me e tasi te matolu mai i lalo ke oko ki luga manafai e kilo atu mai i tua. E isi ne sitepu ne faite i te pui i tua o te Faletapu, i tua o potu, ke mafai o olo a tino mai i te potu ki lalo ki te potu i te kogaloto ke oko eiloa ki te potu tafa ki luga.

⁸A te pui tua o potu konei e taki lua mo te afā mita te matolu; e tasi te mataloa ki potu i te feitu ki matu o te Faletapu, kae tasi foki ki mataloa i te feitu ki saute. E lavea foki ne au me e isi se fakaosoga e lua mo te afā mita te lauefa e fakatamilo i te Faletapu.

¹²I te feitu atu o te koga ateatea i te feitu ki te togala o te Faletapu, e isi se fale i ei e tusa mo te fasefulu lima mita te loa, kae tolusefulu lima mita te lauefa; a ona pui e tusa mo te lua mo te afā mita te matolu i feitu katoa.

¹³Ne fua ne te tagata tena a te feitu ki tua o te Faletapu, e tusa mo te limasefulu mita te loa. Kae mai i te feitu ki tua o te Faletapu, o fano i loto i te koga ateatea ki te sua feitu o te Faletapu ki te togala, a te mao e tusa foki mo te limasefulu mita.

¹⁴A te mao i te feitu ki mua o te Faletapu, e aofia ei a avanoaga i feitu e lua, e limasefulu mita foki.

¹⁵Ne fua ne ia a te loa o te fale ki te togala, e aofia ei ona pui i feitu e lua, e limasefulu mita foki. A te potu o te mataloa o te Faletapu, te Potu Tapu, mo te Potu Tafasili i te Tapu,

¹⁶e fola ki laupapa, mo pui foki e fai ki laupapa ke oko ki fakamalama. A fakamalama konei e mafai o pono.

¹⁷A feitu ki loto o pui o te Faletapu, ke oko ki te gataga o mataloa ki luga, e fonu i ata e koli i ei,

¹⁸ko ata o lakau ko pama mo manu vae fa fai kapakau. A ata o pama mo manu e fakasolosolo fakalei eiloa, ko te ata o te pama, tao atu ki ei ko te manu, ko te pama ko te manu, e pena eiloa fakatamilo i loto i te potu. A manu kona e taki lua olotou foliga:

¹⁹ko foliga o te tino tela e fakasaga ki te lakau ko te pama i te sua feitu, mo foliga o te leona tela e fakasaga ki te sua pama. E pena eiloa i te pui katoa,

²⁰mai i te fola ke oko ki te gataga ki luga o mataloa.

²¹A pou mataloa o te Potu Tapu e fakata'fa. I mua o te mataloa o te Potu Tafasili i te Tapu, e isi se mea pela

²²me se fata-fai-taulaga laupapa. E tasi mo te afā mita te maluga kae tasi te mita te lauefa. A ona pou i matulimanu, tena tulaga,[49] mo ona feitu katoa ne faite ki lakau. Muna a te tagata tena ki a au, “Tenei te taipola tela e tu i mua o te Aliki.”

²³E isi se mataloa i te fakaotiga o te auala ki te Potu Tapu, kae e isi foki i te fakaotiga o te auala ki te Potu Tafasili i te Tapu.

²⁴A mataloa kona ne tapolo mataloa kola e tala i kogaloto.

²⁵E isi foki ne ata o lakau ko pama mo manu vae fa fai kapakau i luga i mataloa o te Potu Tapu, e pela eiloa mo ata i te pui. Kae e isi foki se ufi laupapa i luga o te mataloa i te feitu ki tua o te fapaologa.

²⁶E isi ne fakamalama i feitu o te potu tenei, ka ko pui e teu fakagaligali ki ata o lakau ko pama.