Read Te Tusi Tapu I Te Gana Tuvalu Lomiga Lua ESEKIELU 42 Bible Online

ESEKIELU 42 - Te Tusi Tapu I Te Gana Tuvalu Lomiga Lua bible

ESEKIELU 42

¹Ne avatu au ne te tagata tena ki loto i te potu fono tafa ki tua, taki ei ne ia au ki te fale i te feitu ki matu o te Faletapu, e se mao mai i te fale i te mata ki te togala o te Faletapu.

²A te fale tenei e tusa mo te limasefulu mita te loa kae luasefulu lima mita te lauefa.

³A tena feitu e tasi e fakasaga ki te koga ateatea tela e sefulu mita te lauefa i tafa o te Faletapu, ka ko te sua feitu e fakasaga ki te auala ki tua o te potu fono tafa ki tua. Ne faite fakafogafale tolu, a te fogafale ki luga e tai silia atu ki tua mo te fogafale ki lalo, pena foki te fogafale i te lua e fakasilia foki mo te fogafale ki lalo.

⁴I te feitu ki matu o te fale tena, e isi se auala e lima mita te lauefa kae limasefulu mita te loa, [50] kae isi foki ne mataloa i te feitu tena.

⁵A potu i te fogafale ki luga o te fale tena e tai lauliki atu i te fogafale i te kogaloto mo te fogafale ki lalo, me ne tai fakasilia ki tua.

⁶A potu i fogafale katoa kona e tolu e tu i luga i fakaosoga o te Faletapu, kae e se lago i luga i pou e pela mo nisi fale i te potu fono tena.

⁷I te fogafale ki lalo, a te pui tafa ki tua o te fale, seai ne potu i ei ke oko ki te luasefulu lima mita, ko te afā tena o tena loa; kae e isi ne potu i te sua luasefulu lima mita. I te fogafale tafa ki luga e isi katoa ne potu i ei.

⁹Mai i lalo ifo o te ava potu kona i te feitu ki te saegala o te fale, i te koga e kamata ei a te pui,[51] e isi i ei se mataloa ki te potu fono tafa ki tua. I te feitu ki saute[52] o te Faletapu, e isi foki se fale pena e se mao mai i te fale i te mata ki te togala o te Faletapu.

¹¹I mua o potu kona, e isi se auala e pela mo te auala i te feitu ki matu. E pau te loa mo te lauefa, e pau te faitega, kae pau foki o la mataloa.

¹²E isi se mataloa i lalo o potu i te feitu ki saute o te fale, i te feitu ki te saegala tela e kamata i ei a te pui.

¹³Muna a te tagata tena ki a au, “A fale konei e lua e 'malu. A faitaulaga kola e olo ki mua o te Aliki, e kai ne latou a taulaga tafasili i te tapu i kona. Ona ko potu kona e tapu, tela la, a faitaulaga e tuku ne latou a taulaga tafasili i te tapu i kona: ko taulaga saito, mo taulaga mo agasala io me ko taulaga o te toe togiga o te agasala.

¹⁴Kafai ko oti mai a faitaulaga i te Faletapu, kae ko fia olo ki tua i te potu fono tafa ki tua, e tau o tuku ne latou i potu kona a gatu tapu kola ne pei ei latou i te taimi ne tavini atu ei latou ki te Aliki. E tau o pei ki ne gatu fakaatea koi tuai o olo ki te koga e nofo mai i ei a tino.”

¹⁵I te otiga ne fua ne te tagata tena a te koga i loto o te Faletapu, avatu ei ne ia au i loto i te mataloa ki te Saegala o ave ki tua, tena fua ei ne ia a te koga i tua.

¹⁶Ne puke ne ia a te lula lakau, fua ne ia a te feitu ki te saegala, e tusa mo te 250 mita.

¹⁷Oti aka, fua ei ne ia a te feitu ki matu, te feitu ki saute mo te feitu ki te togala; e pau katoa te loa o feitu katoa kona, e taki 250 mita.

²⁰A te pui e vae ne ia a mea tapu mo mea se tapu.