Read Te Tusi Tapu I Te Gana Tuvalu Lomiga Lua ESEKIELU 44 Bible Online

ESEKIELU 44 - Te Tusi Tapu I Te Gana Tuvalu Lomiga Lua bible

ESEKIELU 44

¹Ne taki au ne te tagata tena ki te mataloa tafa ki tua i te feitu ki te saegala o te lisi o te Faletapu. A te mataloa e pono,

²kae ne fai mai te Aliki ki a au,“A te mataloa tenei ka pono faeloa kae se toe tala. E seai se tino ola e talia ke fakaaoga ne ia me i a au, te Aliki te Atua o Isalaelu, ne ulu i ei. E tau o pono faeloa.

³A te pelenise tela e pule i te taimi tena e mafai o fano ki kona o kai i se kaiga tapu i oku mua. A ia e tau o ulu ki loto kae ulu ki tua i te mataloa i loto i te potu lasi i te mata ki loto.”

⁴Tena ne avatu au ne te tagata tena i loto i te mataloa ki matu, ki mua o te Faletapu. Ne kilo atu au, lavea ei ne au i te Faletapu o te Aliki ko fonu i tena mainaga. Ne fakasiga ifo au ki lalo i te laukele mo oku mata e fuli ki lalo,

⁵kae ne fai mai te Aliki ki a au penei,“Te tagata ola, saga tonu ki mea e lavea kae lagona ne koe. Ka fakaasi atu ne au a tulafono mo fakatonuga o te Faletapu. Onoono fakalei ki tino kola e tau o olo ki loto kae olo ki tua mo te Faletapu, mo tino kola e se tau.

⁶“Fai atu ki tino Isalaelu loto teke kona me i a au, te Aliki Sili, ko se toe talia ne au a olotou amioga masei kola ne fai.

⁷Ne fakalailai ne latou toku Faletapu i te talia ne latou a tino fakaatea seki pilitome, ko tino kola e se fakalogo mai ki a au, ke ulu ki loto i te Faletapu i te taimi e ofo mai ei ki a au a gako mo toto o taulaga. Tela la, ne ofa ne toku fenua a taku feagaiga i olotou amioga masei katoa ne fai.

⁸Ko se takitaki ne latou a sauniga tapu i loto i toku Faletapu, kae ko tuku ne latou ke takitaki ne tino fakaatea.

⁹“Au, te Aliki Sili, ko fai atu me e seai se tino fakaatea seki pilitome, seai se tino e se fakalogo mai ki a au, e tau o ulu ki loto i toku Faletapu, ke oko foki eiloa ki tino fakaatea kola e nofo tasi mo oku tino Isalaelu.”

¹⁰Muna a te Aliki ki a au, “Ko fakasala nei ne au a tino sa Levi fakatasi mo tino Isalaelu kola ne fulitua mai ki a au o tapuaki atu ki tupua.

¹¹E mafai ne latou o tavini mai ki a au o tausi a mataloa kae fai a galuega o te Faletapu. E mafai ne latou o tamate a manu kola e ofo mai ne tino mo fai taulaga sunu pela foki mo taulaga, kae e tau foki mo latou o fakasolosolo o tautua ki tino.

¹²Kae ona ne takitaki ne latou a tapuakiga ki tupua mo tino Isalaelu, ko ala ei o taki ne latou a tino ki te agasala, tela la, a au, te Aliki Sili, ko tauto atu me e tau eiloa latou o fakasala.

¹³Ko se tau latou o tavini mai ki a au i te tofi faitaulaga, io me fakapilipili ki so se mea tela e tapu, e se tau foki o ulu ki te Potu Tafasili i te Tapu. Tena te fakasalaga ona ko mea masei kola ne fai ne latou.

¹⁴Ko tuku atu ne au ke fai ne latou a galuega mafa kola e tau o fai i loto i te Faletapu.”

¹⁵Muna a te Aliki Sili,“A faitaulaga i te matakaiga o Levi kola ne tupu mai i a Satoka ne tumau eiloa o tavini fakamaoni mai ki a au i te Faletapu, i te taimi ne fulitua mai ei a te fenua o Isalaelu ki a au. Tela la, ko latou ka tavini mai ki a au kae o'mai ki oku mua, o ofo mai a gako mo toto o taulaga.

¹⁶Ko latou fua eiloa e ulu mai ki loto i toku Faletapu, o tavini mai i taku fata-fai-taulaga, kae takitaki a sauniga i te Faletapu.

¹⁷ Kafai ko ulu atu latou i te mataloa ki te potu fono tafa ki loto o te Faletapu, e tau o pei ki gatu lino. E se tau mo latou o pei ki so se mea ne faite ki vulu i te taimi e galue ei latou i te potu fono tafa ki loto io me i te Faletapu.

¹⁸E tau latou o pulou ki pulou laugatu lino mo tivae lino, kae seai ne fusi, ke mo a latou e tauta.

¹⁹ Koi tuai latou o ulu atu ki te potu fono tafa ki tua, i te koga e nofo ei a tino, e tau o tapale ne latou a gatu ne fakaaoga ne latou i loto i te Faletapu kae tuku i potu tapu. E tau o pei a nisi gatu o latou ke mo a e pakia a tino i olotou gatu tapu.[55]

²⁰ “A faitaulaga e se tau o vele olotou ulu io me fakaloa olotou laulu. E tau o fakatumau ne latou i te fua lei.

²¹ A faitaulaga e se tau o inu i ne uaina koi tuai o olo ki loto i te potu fono tafa ki loto.

²² E tapu se faitaulaga e avaga ki se fafine ne mavae mo tena avaga; e tau eiloa o avaga ki se taupou Isalaelu io me se avaga a te sua faitaulaga tela ko oti ne mate.

²³ “A faitaulaga e tau o akoako ne latou ki toku fenua a te kese o mea tapu mo mea se tapu, pela foki mea ma mo mea lailai.

²⁴Kafai e tupu se kinauga i te fono, ko faitaulaga e fakatoka ne latou a te mataupu e tusa eiloa mo aku tulafono. E tau o tausi ne latou a kaiga fakamanatu faka‐te‐lotu e pela mo aku tulafono mo fakatonuga, kae tau o tausi ne latou a te Sapati ke malu.

²⁵ “A te faitaulaga e se tau o fakalailai tena foitino o fakapatele ki se tino mate, vagana se tamana io me se matua o ia, io me se tamaliki a ia, io me se taina, io me se tuagaene seki avaga.

²⁶Kafai ko toe ma a ia, e tau mo ia o fakatali i aso e fitu,

²⁷ka oti ko fano ei a ia ki te potu fono tafa ki loto o te Faletapu, o ofo se taulaga e fakama ei a ia, ko te mea ke mafai ne ia o tavini mai ki a au i te Faletapu. Ko au, te Aliki Sili, tena ne faipati atu.

²⁸ “A te vaega o faitaulaga i mea kola ne tuku ne au ki tino Isalaelu ke fakasolo ifo i tupulaga takitasi, ko te tofi tena o faitaulaga. E se tau o isi ne lotou mea i Isalaelu; ko au ko te vaega o latou.

²⁹ A taulaga saito, taulaga mo agasala, mo taulaga o te toe togiga o te agasala, ko meakai kona ma faitaulaga, kae e tau o maua katoa ne latou a mea i Isalaelu kola ne vae fakaatea ma aku.

³⁰A faitaulaga e maua ne latou a te vaega tafasili i te lei o te vaega muamua o te taukai, pela foki mo mea katoa kola e aumai ma aku. I so se taimi e fakafete falaoa ei a tino, e tau o tuku atu ne latou ki faitaulaga a te falaoa muamua ke fai mo taulaga, kae ka iluga i olotou kaiga a taku fakamanuiaga.

³¹ A faitaulaga e se tau o kai ne latou se manu eva io me se manu vae fa tela ne mate eiloa i a ia, io me ne ta ne nisi manu.”