Read Te Tusi Tapu I Te Gana Tuvalu Lomiga Lua ESEKIELU 45 Bible Online

ESEKIELU 45 - Te Tusi Tapu I Te Gana Tuvalu Lomiga Lua bible

ESEKIELU 45

¹Kafai ko vaevae te fenua i matakaiga takitasi, e tau o isi se vaega e fakatapu mo te Aliki. E tau o sefululua mo te afā kilomita te loa, kae sefulu kilomita te lauefa.[56] A te laukele katoa tena e tapu.

²I te koga tena, e tau o isi se koga laukele sikuea mo te Faletapu, e 250 mita i feitu takitasi, kae e tau o avanoa ona feitu katoa e tusa mo te luasefulu mita te lauefa i feitu takitasi.

³A te afā o te koga tena, e sefululua mo te afā kilomita te loa kae lima kilomita te lauefa, e tau o fua keatea; a te Faletapu e tu i kona, ko te toe koga tapu eiloa i koga katoa.

⁴A te koga tena ko te vaega tapu o te fenua, ne tuku fakaatea mo faitaulaga kola e tavini ki te Aliki i tena Faletapu. A olotou fale ka tu i kona, pela foki mo te lisi o te Faletapu.

⁵A te sua afā o te koga tena e tau o tuku fakaatea ke fai mo tofi o te kau sa Levi, kola e fai ne latou a galuega i loto i te Faletapu. Ka isi ne fa'kai i kona mo olotou nofo.[57]

⁶Tafa atu ki te laukele tapu tena, e tau o isi se isi vaega e sefululua mo te afā kilomita te loa, kae lua mo te afā kilomita te lauefa. A te koga tena e faite i ei te fa'kai tela e mafai o nofo i ei so se tino Isalaelu.

⁷E tau foki o fili se laukele mo te pelenise tena e pule i te taimi tena. E kamata mai i te tuakoi ki te togala o te laukele tapu, o fanatu ki te Tai Metitilani i te togala; kae mai i te tuakoi ki te saegala o te laukele tapu o fanatu ki te tuakoi ki te saegala o te fenua, ko te mea ke pau mo te loa o te vaega e tasi o se matakaiga i matakaiga o Isalaelu.

⁸Tena te vaega o te pelenise pule, i te fenua o Isalaelu, ko te mea ke mo a e fakapuapuaga ne ia a tino, kae ke tuku te toega o te fenua ki matakaiga o Isalaelu.

⁹Muna a te Aliki Sili, “Koutou takitaki o Isalaelu, ko to leva te nofo agasala o koutou! Fakagata te otou fakasauaga mo te otou pule fakasaua. Fai te mea tonu kae lei. E se toe tau o afuli keatea ne koutou oku tino mai i te lotou fenua. Ko au, te Aliki Sili, ko fai atu ne au a te mea tenei.

¹⁰ “E tau mo tino katoa o fakaaoga a fua mea 'mafa mo fua lula kola e tonu lei:

¹¹“Te efa te fua o mea malo e tau o pau mo te pata te fua o mea sua vai. A te fua taulia ko te oma.[58] = 10 efa = 10 pata.

¹²“A otou fua mea mafa e tau o fakasolo penei: 20kela = 1 te Sekema[59] 60 Sekema = 1 temina.

¹³“Tenei te fua o otou taulaga: Te saito: 1/60 o te otou taukai Te kalite: 1/60 o te otou taukai

¹⁴Sinu olive: 1/100 o te fua o otou olive. (Fua ki tepata: 10 pata = 1 te oma = 1 te koli.)

¹⁵Mamoe: 1 te mamoe mai loto o te 200 mamoe mai i malae kai'kai o Isalaelu. “E tau o aumai ne koutou a taulaga saito, manu vae fa ke sunu katoa, mo manu vae fa mo taulaga fakafetai, ko te mea ke fakamagalo otou agasala. Ko au, te Aliki Sili, ne fai ne au a te fakatonuga tena.

¹⁶“A tino katoa o te fenua e tau o avatu ne latou a taulaga kona ki te pelenise pule o Isalaelu.

¹⁷Ko te tiute o ia o fakatoka a manu ke sunu katoa, taulaga saito, mo taulaga uaina mo te malo katoa o Isalaelu i Aso Fakamanatu o te Masina Tu, te Sapati, mo nisi aso fakamanatu aka foki. Ko ia foki e fakatoka ne ia a taulaga mo agasala, taulaga saito, taulaga ke sunu katoa, mo taulaga fakafetai, ko te mea ke ave keatea ei a agasala a te fenua o Isalaelu.”

¹⁸Muna a te Aliki Sili, “I te po muamua o te masina muamua, e tau o ofo atu ne koutou se pulumakau tagata seai se pona ke fakama ei te Faletapu.

¹⁹A te faitaulaga ka puke aka ne ia ne mu toto o te taulaga mo agasala, kae vali ki pou mataloa o te Faletapu, ki matulimanu e fa o te fata-fai-taulaga, pela foki ki pou o mataloa i loto i te potu fono tafa ki loto.

²⁰I te po fitu o te masina, e tau o toe fai ne koutou a te mea tena mo so se tino tela ne agasala kae se ko tena loto o fai te agasala, io me ne agasala i te se malamalama. I te faiga tena e fakatumau ei ne koutou te malu o te Faletapu.

²¹ “I te po sefulufa o te masina muamua, ka kamata ei koutou o fakamanatu te kaiga o te Paseka. E fitu aso e kai ei tino ki falaoa se palu ki te mea fakafete.

²²I te aso muamua o te kaiga fiafia, a te pelenise pule e tau o ofo atu ne ia se pulumakau tagata ke fai mo taulaga mo ana agasala pela foki mo tino katoa.

²³I aso takitasi o aso e fitu o te kaiga fiafia, e tau o ofo ne ia ki te Aliki e fitu pulumakau tagata kae fitu mamoe tagata kola e seai ne pona, kae sunu katoa. E tau foki o ofo ne ia se kouti tagata i aso takitasi ke fai mo taulaga mo agasala.

²⁴I pulumakau tagata takitasi, mo mamoe tagata takitasi, e tau o fakatasi ki ei e sefulufitu mo te afā lita o saito kae tolu lita o te sinu olive.

²⁵ “I te Kaiga o Fale Fakamalumalu, tela e kamata i te po sefululima o te fitu o masina, a te pelenise e ofo foki ne ia i aso takitasi o aso e fitu, a te aofaki o te taulaga mo agasala pela mo te taulaga i te Paseka, e pena foki a taulaga ke sunu katoa, e pena foki a taulaga saito mo sinu olive.”