Read Te Tusi Tapu I Te Gana Tuvalu Lomiga Lua ESEKIELU 46 Bible Online

ESEKIELU 46 - Te Tusi Tapu I Te Gana Tuvalu Lomiga Lua bible

ESEKIELU 46

¹Muna a te Aliki Sili, “A te mataloa i te saegala ki loto i te potu fono tafa ki loto, e tau o pono i aso galue kola e ono, kae ke tala i te Sapati, pela foki i te aso fakamanatu o te Kaiga o te Masina Tu.

²A te pelenise pule e tau o fanatu mai i te potu fono tafa ki tua ki te potu lasi i te mataloa, kae ke tu i tafa o pou o te mataloa i te taimi e sunu kātoa ei ne te faitaulaga a tena taulaga, kae ofo atu mo tena taulaga fakafetai. E tau mo ia o fai tena tapuakiga i kona i te mataloa, ka oti ko foki atu ei a ia ki tua. A te mataloa e se tau o pono ke oko eiloa ki te afiafi.

³I Sapati takitasi, pela foki aso fakamanatu o Masina Tu takitasi, a tino katoa e tau o ifo kae tapuaki atu ki te Aliki i mua o te mataloa.

⁴I te Sapati, e tau o aumai ne te pelenise ki te Aliki e ono tama mamoe kae tasi te mamoe tagata, kae ke seai ne pona, mo fai te taulaga sunu katoa.

⁵E tau o ofo mai ne ia e sefulufitu mo te afā lita o te saito ke fakatasi ki te mamoe tagata e tasi, kae ke ofo mai ne ia so se mea e manako a ia o aumai ke fakatasi ki tama mamoe takitasi. I taulaga saito takitasi, e tau o fakatasi ki ei e tolu lita o te sinu olive.

⁶I te aso o te Masina Tu, e tau o ofo mai ne ia se tama pulumakau tagata, e ono tama mamoe, mo te mamoe tagata, kae seai katoa ne pona o manu kona.

⁷A te mea e ofo fakatasi mai mo pulumakau tagata takitasi, pela foki mo mamoe tagata takitasi, e tau o sefulufitu mo te afā lita o te saito, ka ko te mea e ofo fakatasi mo tama mamoe takitasi ko so se mea e fia aumai ne te pelenise. E tolu lita o te sinu olive e fakatasi ki taulaga saito takitasi.

⁸A te pelenise e tau o tiakina ne ia a te potu lasi o te mataloa kae fano ki tua i te auala foki tela ne ulu mai ei a ia.

⁹“I te taimi e o'mai ei a tino o tapuaki ki te Aliki i so se aso fakamanatu, a tino kola ne ulu ki loto i te mataloa i matu e tau o olo ki tua i te mataloa i saute manafai ko oti ne fai olotou tapuakiga, ka ko latou kola ne ulu ki loto i te mataloa i saute e olo ki tua i te mataloa i matu. E tapu se tino e ulu ki tua i te mataloa tela ne ulu mai ei a ia ki loto, kae e tau o ulu ki tua i te sua mataloa.

¹⁰A te pelenise e ulu mai ki loto manafai a tino e o'mai ki loto, e ulu atu foki ki tua i te taimi e ulu ei a tino ki tua.

¹¹I aso e fai ei a kaiga, pela foki i taimi o kaiga fiafia, a te taulaga saito e tau o sefulufitu mo te afā lita ke fakatasi ki se pulumakau tagata io me se mamoe tagata, ka ko tama mamoe takitasi, e faitalia eiloa te tino tapuaki i te mea e fia fakaopoopo atu ne ia ki ei. E tolu lita o te sinu olive e tau o ofo tasi mo taulaga saito takitasi.

¹²“Kafai ko manako te pelenise pule o fai sena peti ki te Aliki, me se taulaga sunu katoa io me se taulaga fakafetai, e mafai a ia o ulu atu i te mataloa i te saegala ki te potu fono tafa ki loto, me e matala te mataloa tena mo ana ulu. E tau o fai tena taulaga tena e pela eiloa mo te faiga e fai sale ne ia i Sapati, kae ka pono te mataloa manafai ko oti ne ulu atu a ia ki tua.”

¹³Muna a te Aliki,“I taeao takitasi, e tau o sunu katoa se tama mamoe ko tasi tena tausaga kae seai se pona, ke fai mo taulaga ki te Aliki. A te taulaga tena e tau o fai i aso takitasi.

¹⁴E tau foki o ofo mai e lua kilokalame o te falaoa i taeao takitasi, fakatasi mo te lita o sinu olive mo palu te falaoa. A tulafono mo te taulaga tena ki te Aliki e tau o fakamautakitaki ki te se gata mai.

¹⁵A te tama mamoe, te falaoa, mo te sinu olive e tau o ofo atu faeloa ki te Aliki i taeao takitasi ke oko eiloa ki te se gata mai.”

¹⁶A te Aliki Sili ne fakatonu mai penei:“Kafai te pelenise pule ne tuku ne ia se vaega o tena laukele ke fai mo meaalofa ki sena tama tagata, ka puke eiloa ma te tamaliki tena ko fai ei mo vaega i tofi o tena kaiga.

¹⁷ Kae kafai te pelenise pule e tuku atu ne ia se vaega o tena manafa ki so se tino tela e galue i a ia, ka toe foki mai eiloa ki te pelenise manafai e oko ki te Tausaga o te Fakafokiga o Mea.[60] E o te pelenise te laukele, tela la, ko ia fua mo ana tama tagata e mafai o nofo tumau mo laukele kona.

¹⁸A te pelenise pule e se tau o puke ne ia ne laukele o ne tino. A laukele kola e tuku ne ia ki ana tama tagata e tau ko laukele kola ne tuku ki a ia, ko te mea ke mo a e fakapuapuaga ne ia oku tino o puke olotou laukele.”

¹⁹Ne ave foki au ne te tagata tena ki te mataloa ki potu kola e saga ki matu, i tafa o te mataloa i te feitu ki saute o te potu fono tafa ki loto. A potu kona ne potu tapu mo faitaulaga. Ne tusi tena lima ki te koga i te feitu ki te togala o potu kona,

²⁰kae fai mai penei, “Tenei te koga e tau o tunu ei ne faitaulaga a kano manu kola e ofo mo fai taulaga mo agasala, io me ko taulaga o te toe togiga o te agasala, kae palu foki i ei a taulaga falaoa, ko te mea ke seai se mea tapu e ave ki te potu fono tafa ki tua i tino ma pakia i ei.”

²¹Tena la, ne taki ne ia au ki te potu fono tafa ki tua kae fakaasi mai ne ia ki a au me i ona matulimanu e fa, e isi ne tama potu fono foliki,[61] e taki luasefulu mita te loa kae sefululima mita te lauefa.

²³A potu takitasi e isi ne pui fatu fakatamilo i ei, ko koga fakaka afi e piki ki luga i pui.

²⁴Ne fai mai te tagata tena ki a au,“Kona a potu kuka kola e tunu i ei a taulaga a tino ne tavini o te Faletapu.”