Read Te Tusi Tapu I Te Gana Tuvalu Lomiga Lua ESEKIELU 47 Bible Online

ESEKIELU 47 - Te Tusi Tapu I Te Gana Tuvalu Lomiga Lua bible

ESEKIELU 47

¹ Ne toe taki atu au ne te tagata tena ki te mataloa o te Faletapu. E isi te vai e vau mai i lalo o te mataloa kae e tafe ki te saegala, te koga e saga ki ei a te Faletapu. E tafe mai mai i lalo o te feitu ki saute o te Faletapu kae fakaseke atu i te feitu ki saute o te fata-fai-taulaga.

²Tena ne taki ei au ne te tagata tena ki tua mo te lisi o te Faletapu i te mataloa i matu, taki atu eiloa au ke oko ki te mataloa tela e fakasaga ki te saegala. E isi se vaitafe foliki e tafe mai ki tua i te feitu ki saute o te mataloa.

³Ne puke aka te tagata tena ki tena lula lakau, fua ei ne ia e limaselau mita mai i te koga e tafe mai i ei o fano ki lalo i te saegala kae fai mai ki a au ke fanatu au i loto i te vaitafe i te koga tena. A te vai e gata fua i oku fatugugu.

⁴Ne toe fua ne ia te sua limaselau mita, i kona, a te vai ko oko ki oku tuli. E toe limaselau mita o fano ki lalo, a te vai ko oko ki toku taugasulu.

⁵Ne toe fua atu ne ia te sua limaselau mita, i kona ko oko eiloa i te poko ko se mafai ne au o fano ki te sua feitu. Ko se maua o sasale se tino ki te sua feitu me ko to poko, vagana ke 'kau ki te sua feitu.

⁶Muna a ia ki a au,“Te tagata ola, taofi mau ki mea katoa konei.” Ne toe fakafoki atu au ne te tagata tena ki te kaugutu o te vaitafe,

⁷kae i taku okoga ki kona, ne lavea ne au me ko oko eiloa i te uke o lakau i te ava kaugutu o te vaitafe tena.

⁸Muna a ia ki a au,“A te vai tena e tafe i loto i te fenua o fano ki te saegala o fanaifo i te Vanu o Iolitana o fano ki te Tai Mate. Kafai e tafe atu ki loto i te Tai Mate, e sui ne ia a te suatai o te tai tena ki te vai magalo.

⁹I so se koga e tafe ki ei a te vai tena, e isi faeloa ne vaega manu vae fa valevale mo vaega ika valevale. A te vai tena ka fai ne ia a te suatai o te Tai Mate ke magalo, kae i so se koga e tafe ki ei e aumai faeloa ne ia a te ola.

¹⁰Mai i Vaipuna o Eneketi ke oko ki Vaipuna o Enekilaima, e isi faeloa ne tino Fai-ika i te tafatai, kae ka 'fola olotou tili i kona o tauaki ke malo. Ka uke a vaega ika i kona e pela mo vaega ika i te Tai Metitilani.

¹¹Ka ko vai i koga suasua mo taisala i tafa o te tafatai ka se fai ke liu tina vai. Ka tuku eiloa pena ke fai mo koga e maua i ei te masima.

¹² I te ava kaugutu o te vaitafe foliki tena e ola i ei a vaega lakau valevale kola e maua i ei te meakai. A olotou lau e se mafai o mage, kae e se mafai o gata te fua mai o olotou fuataga. Ka fua mai faeloa olotou fuataga fou i masina takitasi, me e fakasusu ne te vai tela e tafe mai i te Faletapu. A lakau kona ka maua mai i ei a meakai, ka ko olotou lau ka fakaaoga mo fakalei a tino masaki.”

¹³Muna a te Aliki Sili, “Konei a tuakoi o te fenua tenei ka vaevae i matakaiga konei e sefululua, ko te matakaiga o Iosefa e lua ona vaega.[62]

¹⁴Au ne tauto fakamaoni eiloa ki otou tupuga me e avatu ne au mo latou a te fenua tenei; tela la, vaevae nei fakapau i a koutou.

¹⁵“A te tuakoi i matu e fano fakatu‐saegala, mai i te Tai Metitilani ki te fa'kai o Hetiloni, ki te Auala o Hamata, ki te fa'kai o Setata, [63]

¹⁶ki fa'kai o Pelota mo Sipilaima (a fa'kai kona e tu i te va o te koga laukele o te malo o Tamaseko mo te malo o Hamata), ke oko ki te fa'kai o Takono (e tu i tafa o te tuakoi o te malo o Haulana).

¹⁷Tela la, a te tuakoi ki matu e fanatu mai i te Metitilani o fano faka‐te‐saegala ki te fa'kai o Enoni, ka ko tuakoi o Tamaseko mo Hamata e tai tu ki matu.

¹⁸“A te tuakoi i te saegala e fano faka saute, mai i te koga koga i te va o te koga laukele o Tamaseko mo Halana, ka ko te vaitafe o Iolitana ko te tuakoi i te va o Isalaelu i te togala mo Kileata i te saegala, ke oko atu eiloa ki Tamala i te Tai Mate.

¹⁹“A te tuakoi i saute e fano faka saute togala, mai i Tamala ki te laukele o Katesa, ko fano ei faka matu togala i te tuakoi o Aikupito ke oko ki te Tai Metitilani.

²⁰“A te tuakoi i te togala ko te Tai Metitilani, kae e fanatu eiloa ki matu ki te kogā koga i te feitu ki te togala o te Auala o Hamata.

²¹“Vaevae a te fenua tenei i otou matakaiga;

²²ko te tofi tumau eiloa o koutou tena. A tino fakaatea kona e nofo tasi koutou kae ne fanafanau i kona, e tau foki o maua se vaega o latou i te fenua manafai ko vaevae ne koutou. E tau o fai ne koutou pela eiloa me ne tino Isalaelu kae e kau foki, fakatasi mo matakaiga o Isalaelu, i te vili tena e fai ne koutou mo te vaevaega o te fenua.

²³A tino fakaatea kona ko nofo tumau, ka maua te vaega o latou fakatasi mo tino i te matakaiga tela e nofo latou i ei. Ko au, te Aliki Sili, tena ne faipati atu.”