Read Te Tusi Tapu I Te Gana Tuvalu Lomiga Lua ESEKIELU 5 Bible Online

ESEKIELU 5 - Te Tusi Tapu I Te Gana Tuvalu Lomiga Lua bible

ESEKIELU 5

¹Muna a te Aliki, “Te tagata ola, puke mai se pelu mata kai o vele ki ei tou talafa mo ou laulu. Ka oti ko fua ei ne koe ou laulu kona ki se mea fua mea mafa, ko vaevae ei ne koe ki vaega e tolu.

²Kafai ko oti a te nikoiga o te fa'kai, ko sunu ei ne koe te vaega e tasi i loto i te fa'kai. Puke te sua vaega o katikati ki tau pelu i te taimi e fanofano sale ei koe i tua o te fa'kai. Pei atu te sua vaega ke agi ne te matagi, kae ka afuli ne au o katikati ki taku pelu.

³Taofi ne koe ne mu laulu, kae kofu ki te kapakapa o tou gatu.

⁴Ka oti ko toe tapale aka ne koe ne mu laulu, ko pei ei ki te afi ke ka ne te afi. A te ulaga tena ka salalau atu ki te malo katoa o Isalaelu.”

⁵Muna a te Aliki Sili penei, “Kilo ki Ielusalema. Ne tuku ne au a ia ki te kogaloto o te lalolagi, mo fenua katoa e tu i ona tafatafa.

⁶Ka ko Ielusalema ne teke ki aku fakatonuga, kae ko lavea atu me e silia atu te masei i lo nisi malo, e silia atu tena se fakalogo i lo fenua kola i ona tafatafa. A Ielusalema ne teke ki aku fakatonuga kae ita ma tausi aku tulafono.

⁷Ielusalema, fakalogo mai nei ki aku muna konei e fai atu. Ko silia atu te fakalavelave tenei ko fai ne koe i lo malo i ou tafa, ona eiloa ko te se fakalogo o koe ki aku tulafono mo fakatonuga. A koutou ne tautali i tu a nisi malo.

⁸Tela la, au, te Aliki Sili, ko fai atu i a au nei se fili o koutou. Ka fai ne au te fakamasinoga o koutou i te koga e mafai o matea ne malo katoa.

⁹Ona ko mea ne fai ne koutou, kola e se fiafia au ki ei, tena la, ka fakasala ei ne au a Ielusalema ke silia atu te māfa i lo taimi mua, ka silia atu foki i lo fakasalaga i aso fakamuli.

¹⁰ A te ikuga o te fakasalaga tena, a matua i Ielusalema ka kai ne latou olotou tamaliki, ka ko tamaliki ka kai ne latou olotou matua. Ka fakasala ne au koutou, kae fakasalalau ki koga katoa a tino kola e toe mai.

¹¹“Tela la, ona ko au ko te Atua ola — tenei la te muna a te Aliki Sili — ona ne fakalailai ne koutou toku Faletapu i otou amioga masei, ka ta ne au koutou mo te se alofa.

¹²E tasi vae tolu o tino o te otou fenua ka mate i te famai mo te fiakai i te fa'kai; a te sua tasi vae tolu ka katikati ki pelu i tua o te fa'kai; ka ko te tasi vae tolu fakaoti ka fakasalalau ne au ke agi ne te matagi, kae ka afuli ne au o ta ki te pelu.

¹³“Ka lagona ne koutou te malosi o toku kaitaua mo toku kaitaua fakamataku, ke oko eiloa ki te taimi e malie ei au. Kafai ko 'tupu a mea katoa konei, kae ka iloa ne koutou i a au, te Aliki, ne faipati atu ki a koutou me i a au ko oko eiloa i toku kaitaua i te otou se fakamaoni.

¹⁴A tino katoa i malo i otou feitu, kola e fakasili aka i te otou fa'kai, ka fakalili atu ki a koutou kae fakamao keatea mai i a koutou.

¹⁵“Kafai ko kaitaua au ki a koutou kae fakasala koutou, a malo i otou feitu ka mataku katoa. Ka kilo atu ki a koe mo te fakatakalialia, kae fakalili atu ki a koe.

¹⁶Ka taofi ne au a koga e maua mai i ei otou meakai kae tiakina koutou ke mate fiakai.[7] Ka fakalogo koutou ki te mae o te fiakai, pela me ne matasana mata 'kai kola e eva mai o ta fakapalele koutou.

¹⁷ Ka aumai ne au te mate fiakai mo manu vao ke tamate otou tamaliki, kae aumai te famai, te fakasaua, mo te taua ke ta ei koutou. Ko au, te Aliki, tena ne faipati atu.”