Read Te Tusi Tapu I Te Gana Tuvalu Lomiga Lua ESEKIELU 8 Bible Online

ESEKIELU 8 - Te Tusi Tapu I Te Gana Tuvalu Lomiga Lua bible

ESEKIELU 8

¹I te po lima, i te one o masina, i te ono o tausaga o matou i te tafeaga, a takitaki o te kau Iuta kona ne fakatafea e sagasaga fakatasi matou i loto i toku fale. I kona eiloa, ko te mana eiloa o te Aliki Sili ko oko mai ki a au.

² Ne kilo ake au ki luga, lavea ei ne au te fakaasiga e uiga ki te tagata afi. Mai i te taugasulu o fano ki lalo i ona vae, e pela me se afi, kae mai i te taugasulu o fano ki luga e malapulapu pela me se palasi ne fakamalapulapu.

³Ne fola mai tena lima, puke eiloa ne ia au i oku laulu. I te fakaasiga tenei, au ne avake ne te agaga o te Atua i luga i te ea, ave ei ne ia au ki Ielusalema. Ne ave ne ia au ki te auala i loto o te mataloa ki matu o te Faletapu, te koga tena e isi i ei se tupua tela e se fiafia ki ei te Atua.

⁴ I Kona ne lavea ei ne au a te mainaga malosi, tela e fakaasi mai i ei i te Atua o Isalaelu e nofo i kona, e pela eiloa mo te laveaga ne au i tafa o te Vaitafe ko Kepa.

⁵Muna a te Atua ki a au, “Te tagata ola, kilo ki matu.” Ne kilo atu au, lavea ei ne au a te tupua tela e takalialia i ei te Atua, e tu i tafa o te fata-fai-taulaga, i tafa o te auala ki te mataloa o te Faletapu.

⁶Muna a te Atua ki a au, “Te tagata ola, e lavea ne koe te mea tena e tupu? Kilo atu ki mea se lei a tino Isalaelu kona e fai i konei, ko fai ne latou au ke gasolo eiloa o fakamao mai i toku nofoaga tapu. Ka lavea ne koe a mea e tafasili atu i te mataga i lo te mea tena.”

⁷Ne ave ne ia au ki te mataloa o te potu fono tafa ki tua, kae fakaasi mai ne ia ki a au a te puga i te pui.

⁸Muna a ia penei, “Te tagata ola, ofa te pui i te koga tenei.” Ne ofa ne au a te pui i kona, maua ei ne au a te mataloa.

⁹Muna a ia ki a au, “Fano ki loto o onoono ki amioga masei mo amioga mataga kona e fai ne latou i kona.”

¹⁰Tena, ne fanatu au ki loto o onoono. A pui e fonu i ata o gata mo nisi manu lailai i feitu fakatapuakiga,[9] mo nisi mea kola e tapuaki ki ei a tino Isalaelu.

¹¹E tinofitu a takitaki o tino Isalaelu e nofo mai i kona, e aofia ei a Iasania te tama tagata a Safana. E tofu eiloa latou mo mea sunu mea manogi, ka ko te au e fanake mai i olotou mea manogi kona.

¹²Ne fesili mai te Atua ki a au penei, “Te tagata ola, e lavea ne koe a mea a takitaki o Isalaelu kona e fai funa? E fai olotou tapuakiga i te potu e fonu i ata fakatusa. E penei te fakamasakoga a latou:‘A matou e se lavea ne te Aliki! Ko oti ne tiaki ne ia a te fenua.’ ”

¹³Tena, kae fai mai te Aliki ki a au penei, “Ka lavea ne koe e fai ne latou a mea e tafasili atu i te mataga i lo mea kona ne fai ne latou.”

¹⁴Ne ave ne ia au ki te mataloa i matu o te Faletapu, kae fakaasi mai ne ia ki a au a fafine e tagi i te mate o te atua ko Tamusa.[10]

¹⁵Ne fesili mai a ia penei, “Te tagata ola, e lavea ne koe a te mea tena? Ka lavea ne koe a mea e tafasili atu i te mataga.”

¹⁶Tena, ne ave ei ne ia au ki te koga ki loto o te potu fono o te Faletapu. I kona, i tafa o te mataloa ki te koga tapuaki, i te va o te fata-fai-taulaga mo te auala, e nofo mai i ei e tusa mo te tinolua mo te tokolima tagata. E fuli olotou tua ki te koga tapuaki, kae e ifo ki te saegala, o tapuaki atu ki te la tela ko fanake.

¹⁷Muna a te Aliki ki a au, “Te tagata ola, e lavea ne koe a te mea tena? A tino Iuta konei e se malie foki i te fai ne latou o amioga mataga konei ne lavea ne koe i konei, mo te fakasauaga ne fai ne latou i te fenua katoa. Ikai, e manako eiloa ke o'mai o fai olotou amioga kona i loto i te Faletapu o fai au ke atili kaitaua malosi eiloa. Kiloke ki te salaga ne latou o te toe mea mataga eiloa, ke fai ei au ke kaitaua![11]

¹⁸Ka lagona eiloa ne latou a te malosi katoatoa o toku kaitaua. Ka se fakasao ne au latou, se alofa foki eiloa ki a latou. Ka pakalaga latou o talo mai ki a au i te mea e mafai ne latou, kae ka se fakalogo eiloa au ki a latou.”