Read Te Tusi Tapu I Te Gana Tuvalu Lomiga Lua TANIELU 1 Bible Online

TANIELU 1 - Te Tusi Tapu I Te Gana Tuvalu Lomiga Lua bible

TANIELU 1

¹ I te tolu o tausaga o te nofoaiga a Ieoiakimo, te tupu o Iuta, kae vau mo te Tupu o Papelonia ko Nepukanesa o faitaua mai ki te fa'kai o Ielusalema, nikoi ei ne ia.

² Ne fai ne te Aliki ke puke fakapagota ne ia a te Tupu ko Ieoiakimo kae puke foki a nisi koloa o te Faletapu. Ne ave ne ia a nisi pagota ki te faletapu o tena atua i Papelonia, ka ko koloa ne puke mai ne ia ne tuku ne ia ki loto i potu teu koloa o te faletapu.

³Ne fakatonu atu a te tupu ki tena ofisa pule ko Asepenase ke fili mai ne tamataene mai te kau Isalaelu kola ne puke fakapagota, ne tamataene i kaiga maluga o Isalaelu.

⁴A tamataene kona e tau ne tamataene taulekaleka kae poto kae lei te akoakoga, kae vave tauloto, kae seai ne pona, ko te mea ke tavini latou i te palesi o te tupu. Ko Asepenase ke akoako ne ia latou o faitau kae tusitusi i te gana Papelonia.

⁵Ne fai atu foki a te fakatonuga a te tupu ke fagai a tamataene kona ki meakai mo uaina, pela eiloa mo meakai mo uaina e kai ei ana tino ma'luga i te palesi. Kafai ko katoa te tolu o tausaga o te fakamasaniga a latou kona, ko avatu ei ki mua o te tupu.

⁶A tamataene kola ne fili, e aofia ei a Tanielu, Hanania, Misaeli mo Asalia, ne tamataene mai te matakaiga o Iuta.

⁷Ne sui ne te ofisa pule olotou igoa ki a: Peletisala, Satalaka, Mesako mo Apeteniko.

⁸Ne mafaufau ifo Tanielu ke se kai a ia i meakai mo uaina o te palesi, i a ia ma lailai i feitu faka tapuakiga, tena ne fakamolemole ei a ia ki a Asepenase ke fesoasoani atu ki a ia.

⁹Ne fai ne te Atua a Asepenase ke alofa ki te fakamolemole tena a Tanielu.

¹⁰A Asepenase e mataku i te tupu, tena ne fai atu ei a ia ki a Tanielu penei, “A te tupu ko oti ne fai mai ke fagai koutou ki meakai konei, me kafai e se tuputupu malosi otou foitino, pela mo nisi tamataene, ko tena uiga ko au ka tamate ne ia.”

¹¹Tena, ne fanatu Tanielu ki te sotia tela ne tuku mai ne Asepenase ke tausi latou, kae fai atu penei,

¹²“Aumai ne fuaga lakau ke kai ei matou mo ne vai ke inu ei matou, kae ke onoono koe me pefea te tuputupu o omotou foitino i aso e sefulu.

¹³Kafai ko katoa te sefulu o aso, ko faka'pau aka ei matou ki tamataene kola e kai meakai o te palesi, ke onoono koe me ko oi e foitino malosi atu, ko matou me ko latou.”

¹⁴Ne talia ne te sotia tena ke tofotofo aka latou i aso e sefulu.

¹⁵I te katoaga o aso e sefulu kona, e lavea atu ei me e mata malosi atu eiloa a latou i tamataene kola e kai i meakai o te palesi.

¹⁶Tena la, mai te taimi tena, ne talia eiloa ne te sotia tausi o latou ke kai eiloa latou ki fuagā lakau mo lau lakau, kae se ko meakai e aumai ne te tupu.

¹⁷Ne aumai ne te Atua ki tamataene kona e tokofa a te poto mo te atamai mo te mafaufau loto, kae ne tuku atu foki ne ia ki a Tanielu a te poto i te fakamatalaga o fakaasiga mo miti.

¹⁸I te katoaga o te tolu tausaga tela ne fakasino ne te tupu ke fakamasani ei a tamataene kona, ne vau ei a Asepenase o puke atu a tamataene katoa kona o ave ki mua o te tupu.

¹⁹Ne faipati te tupu ki a latou katoa, kae i te kilokiloga a te tupu, e tai isi eiloa ne mu mea o Tanielu, Hanania, Misaeli mo Asalia i lo tamataene katoa. Tena ne fakaofi ei latou ke kau i te kaufono a te tupu.

²⁰Ne pefea eiloa te mafa o fesili a te tupu, pela foki mo fakalavelave e fakaasi aka sale ne ia, ka ko te tokofa eiloa e lasi fakasefulu atu te mea a latou e iloa, i lo so se tino fakamatala mea tupu i aso fakamuli, io me ko tino fakataulaitu i te malo katoa.

²¹Ne nofo eiloa Tanielu i te kaufono i te palesi, ke oko ki te taimi ne fakatakavale ei Papelonia ne te tupu o Pelesia ko Kulesa.