Read Te Tusi Tapu I Te Gana Tuvalu Lomiga Lua TANIELU 10 Bible Online

TANIELU 10 - Te Tusi Tapu I Te Gana Tuvalu Lomiga Lua bible

TANIELU 10

¹I te tolu o tausaga o te nofoaiga a Kulesa i Pelesia, kae oko mai te fekau ki a Tanielu, te sua igoa o ia ko Peletisala. A te fekau tena e tonu kae ko oko eiloa i te faigata o malamalama a tino i ei.[13] Ne fakamaina atu a te fekau tena ki a ia i te moemiti.

²I te taimi tena, au ne tagi fanoanoa i vaiaso e tolu.

³Au seki kai eiloa ki ne meakai, seki inu ki ne uaina, seki selu foki toku ulu i vaiaso kona e tolu.

⁴I te po luasefulu fa o te masina muamua i te tausaga tena, au e tu i kaugutu o te Vaitafe ko Taikelise.

⁵ Ne kilo aka oku mata, lavea ei ne au te tino e pei mai ki gatu lino, kae fusi ki te fusi aulo.

⁶A tena foitino e malapulapu mai pela me se fatu taua malapulapu. A ona foliga e maina mai e pela me se 'lapaga o te uila, ka ko ona kanomata e ka pela me se afi. A ona lima mo vae e malapulapu pela me se palasi tela ne mulu ke malapulapu, ka ko tena leo e pela mo leo o tino e tokouke.

⁷Ko au tokotasi eiloa ne lavea ne au a te fakaasiga tena. A tagata kola e nofo i oku tafa e seai se mea e lavea ne latou, kae ne mataku eiloa latou, tele ei o muni.

⁸Tena, nofo mai fua ei au tokotasi o kilokilo ki te fakaasiga tena. Ko seai eiloa soku malosi e toe, mo oku foliga ko mafuli eiloa, kafai se tino e lavea ne ia au ko se iloa ne ia me ko oi a au.

⁹I te lagonaga ne au tena leo, ne siga ifo au, matapo eiloa au, takato eiloa au i kona mo oku mata e fuli ki lalo.

¹⁰Tena, kae puke mai tena lima o apai aka au, totuli ei au mo oku lima e toko ki lalo o taofi toku foitino, ka ko au koi polepole eiloa.

¹¹Muna a te agelu ki a au, “Tanielu, a te Atua e alofa ki a koe. Tu ki luga o fakalogo mai ki aku muna konei ka fai atu. Au ne uga mai ke vau au ki a koe.” I te otiga o ana muna kona, tu ei au ki luga kae koi polepole eiloa.

¹²Tena, ne toe fai mai penei, “Tanielu, sa mataku. Ne lagona eiloa ne te Atua au talosaga, talu mai te taimi ne kamata ei koe o mafaufau ke fakamalalo tou loto ke malamalama koe i mea konei. Au nei ne vau mo te tali o tau talo.

¹³ A te agelu tausi o te malo o Pelesia ne teke mai ki a au i aso e luasefulu tasi. Tena, kae vau mo te agelu e igoa ki a Mikaeli, se takitaki tokotasi i te kau agelu, o fesoasoani mai ki a au, i au ne nofo tokotasi i Pelesia.

¹⁴Au nei ne vau o fakaasi atu ki a koe a te mea ka tupu ki ou tino i aso fakamuli. A te mea tenei se fakaasiga e uiga ki mea ka tupu i aso fakamuli.”

¹⁵I te faimaiga ne ia o muna kona, ne pula toka au ki lalo i te laukele, seai eiloa saku pati ne fai.

¹⁶Tena, kae fola mai te lima o te agelu tela e pela me se tagata, o fakapatele ki oku laugutu. Aku muna ki a ia penei, “Tou malu, a te fakaasiga tenei ko fai ne ia a au ke vaivai, ko se mafai ne au o taofi toku polepole.

¹⁷Au ko pela me se tavini e tu i mua o tena pule. E mafai pefea ne au o faipati atu ki a koe? Ko seai soku malosi e toe, toku manava foki ko seai.”

¹⁸Ne toe puke mai a ia ki a au, tena kae lagona ifo ei ne au toku foitino ko malosi.

¹⁹Muna a ia, “A te Atua e alofa ki a koe, tela la, sa fanoanoa io me mataku i so se mea.” I te otiga o ana muna kona, kae ko gasolo aka eiloa au o malosi, kae fai atu au penei, “Tou malu, fakaasi mai te fekau ne vau koe o fakailoa mai ki a au. Au ko gasolo o malosi ne fai ne koe.”

²⁰Muna a ia penei, “E iloa ne koe te pogai tenei ne vau ei au ki a koe? Au ne vau o fakaasi atu a te mea tela e tusi i te Tusi o te Munatonu. Ko tau nei au o foki o taua ki te agelu tausi o Pelesia. Ka oti, kae toe sae mai te agelu tausi o Eleni. E seai se tino e fesoasoani mai ki a au, na ko Mikaeli fua, te agelu tausi o Isalaelu.[14]