Read Te Tusi Tapu I Te Gana Tuvalu Lomiga Lua TANIELU 11 Bible Online

TANIELU 11 - Te Tusi Tapu I Te Gana Tuvalu Lomiga Lua bible

TANIELU 11

¹Ko te tiute o ia[15] o fesoasoani mai ki au, kae 'pulu foki ne ia a au mai fakalavelave.

²A te mea tenei ka fakailoa atu ne au se mea tonu eiloa.” Muna a te agelu, “E toe tokotolu a tupu ka fai mo tupu i Pelesia, kae e isi foki se tupu i te tokofa tela ka fai mo tupu i tua o te tokotolu kona, kae ka maumea atu a ia i tupu katoa i ona mua. Kafai ko tugamalie eiloa tena malosi mo tena maumea, kae ka faitaua atu a ia ki te malo o Eleni.

³“Tena, kae ka tu mai te tupu takutakua. Ka pule a ia i se malo lasi, kae ka pule eiloa a ia i te mea e fai ne ia.

⁴Kae kafai ko tugamalie eiloa tena malosi, kae ka vaevae tena malo ki vaega e fa. A tupu kola e seki o'mai mai tena gafa ka fai mo tupu o sui a ia, kae ka se maua eiloa ne latou a te malosi o ia.

⁵“A te tupu o Aikupito ka fai foki mo tupu malosi. E toko tasi mai ana tino ma'luga ka sili atu tena malosi i a ia, kae ka fai mo tupu i se malo lasi atu.

⁶I tausaga e uke fakamuli ifo, ka fai ne te tupu o Aikupito se feagaiga fakataugasoa mo te tupu o Sulia, kae avatu ki ei tena tama fafine ke fai mo ana avaga. A te va fakataugasoa tena ka se tumau. A te fafine tena mo tena avaga, mo tena tama,[16] mo tavini kola ne olo mo ia ka tamate katoa.

⁷E se leva mai tua ifo, kae ka fai mo tupu se tino e kaiga mo te fafine tena. Ka taua atu a ia tena ki te kautau a te tupu o Sulia, ka ulu atu latou ki loto i te lotou olo, fakatakavale ei ne ia latou.

⁸Ka puke ne ia a fakatusa o olotou atua, mo mea aulo mo siliva kola ko oti ne fakatapu ki atua kona, o ave ne ia ki Aikupito. Ka maua te filemu i te va o malo kona i ne nai tausaga,

⁹kae se leva foki, ko te tupu o Sulia ka taua atu ki Aikupito, kae ka afuli latou ne te kautau a Aikupito.

¹⁰“A tama tagata a te tupu o Sulia ka fakatoka o taua, kae ka fakamaopoopo ne latou se kautau lasi eiloa. E tokotasi mai i a latou ka fanatu e pela me se lofiaga o taua atu ki te fa'kai o te fili tela e isi sena olo.

¹¹Ka fanatu te tupu o Aikupito i tena kaitaua o taua ki te tupu o Sulia, kae ka fakatakavale ne ia tena kautau lasi eiloa.

¹²Ka fakamatamata a ia i tena manumalo mo te uke o sotia ne ta ne ia, kae ka se tumau tena manumalo.

¹³“Ka foki atu te tupu o Sulia o toe fakamaopoopo se kautau e lasi atu i te kautau muamua. Kafai ko oko mai te taimi tonu, ka toe fanatu a ia mo se kautau lasi atu, kae toka atu foki i te kautau muamua.

¹⁴Tena, kae ka tokouke foki a tino ka teke atu ki te tupu o Aikupito. Tanielu, kae ka isi foki ne tino fakasaua mai tou fenua ka teke atu foki, e tusa mo te fakaasiga ne lavea ne latou, kae ka se manumalo latou.

¹⁵Tena, a te tupu o Sulia ka nikoi ne ia se fa'kai e fai tena olo, fakatakavale eiloa ne ia. A sotia o Aikupito ka ita ma taua; ke oko foki eiloa ki sotia ma'losi o latou ka seai ne olotou malosi.

¹⁶Ka pule eiloa te kau Sulia i te mea e fai ne latou ki te kau Aikupito, kae ka seai eiloa se tino e teke. Ka tu a ia i te Fenua o te Feagaiga kae pule katoatoa eiloa a ia i ei.

¹⁷“A te tupu o Sulia ka mafaufau ke fano tena malaga ki te fenua o tena fili, kae ave ne ia tena kautau katoa. Ka avatu ne ia tena tama fafine [17] ke avaga mo te tupu o te malo tela e fai fili mo ia, ke fai se va fakataugasoa o laua, ko tena togafiti tena ke ta fakapalele ne ia te malo tena e fai fili mo ia; ka se taunu tena togafiti masei tena.

¹⁸Ka oti i kona, ka taua atu a ia ki malo kola e pili ki te tai, kae ka fakatakavale eiloa ne ia a malo e uke i malo kona. Kae ka fakatakavale a ia ne se takitaki mai se fenua fakaatea, ko fakagata ei tena fakamatamata; ka toe faka'foki atu eiloa ne ia a muna fakamatamata a te tupu o Sulia ki a ia.

¹⁹Ka foki atu te tupu ki olo o tena fenua, kae ka takavale a ia, tena foki eiloa tena gataga.

²⁰“Ka vau se tupu mai ana tua, tela ka uga ne ia se ofisa ke fakapuapuaga a tino i faiga o lafoga, ko te mea ke mumea aka te maumea o tena malo. E se leva foki kae ka mate te tupu tena, e se mate i se taua io me i mua o tino.”

²¹Ne fakamatala eiloa te agelu, ana muna: “A te tupu o Sulia tenei ka tao mai nei se tagata masei kae se ko ia e tau o fai mo tupu. Ka vau a ia i se auala fakapoi o puke te malo ki tena malosi mo te fai togafiti.

²²So se tino eiloa e teke ki a ia, ke oko foki eiloa ki te Faitaulaga Sili a te Atua, e tamate.

²³Ka fakatogafiti ne ia a nisi malo o fai feagaiga mo latou, tena ka gasolo eiloa a ia o malosi e ui eiloa e foliki tena malo.

²⁴Ka taua atu a ia ki te itu malo maumea, seai se fakailoaga, kae fai ne ia a mea e seki fai eiloa ne ona tupuga. Ka vaevae ne ia i tino kola e tau'tali i a ia, a koloa mo mea kola ne fao ne ia i nisi malo. Ka fai ana fuafuaga o taua atu ki nisi fa'kai kola e isi ne olo, ka ko tena taimi ko pili fua nei o palele.

²⁵“Ka taumafai eiloa a ia o fakamaopoopo se kautau lasi o taua atu ki te tupu o Aikupito tela e fakatoka foki o taua mai ki ei mo tena kautau lasi kae malosi. A te tupu o Aikupito ka fakaloiloigina, tena ka se manumalo ei.

²⁶Ko tino fakatonutonu totino eiloa a ia ka fakamasei ne latou a ia. Ka tokouke eiloa ana sotia ka mate, ka ko tena kautau ka fulu faka'ma.

²⁷Tena, ka kai tasi te tokolua tupu kona i te taipola e tasi, ka ko manatu o laua ne manatu ma'sei, kae ka fakatau fakaloiloi eiloa laua i a laua. Ka se maua ne laua a mea e manako laua ki ei me seki oko mai a taimi o mea kona.

²⁸A te tupu o Sulia ka foki atu ki tena fenua mo mea katoa ne fao ne ia mai nisi malo, mo tena fakamoemoega ke ofa ne ia te lotu a tino o te fenua o te Atua. Ka fai eiloa ne ia a te mea e loto a ia ki ei, ka oti ko foki atu ei a ia ki tena fenua.

²⁹“Fakamuli ifo, ka toe taua atu a ia ki Aikupito, kae i te taimi tenei, ka se pau mo te taimi muamua.

³⁰Ka o'mai a tino Loma i olotou vakamutu o teke a ia, kae ka mataku a ia. “Tena, ka foki atu a ia mo te kaitaua, ko taumafai ei o ofa a te lotu a tino o te fenua o te Atua. Ka tautali a ia i muna a tino kola ne tiaki ne latou te lotu tena.

³¹ A nisi o ana sotia ka fakaseaoga ne latou te Faletapu. Ka fakagata ne latou a taulaga fai i aso takitasi, kae fakatu aka ne latou a te Mea Fakamataku.

³²Ka fakatogafiti ne te tupu a tino kola ko oti ne tele keatea mai te lotou lotu, ke kau atu ki a ia, ka ko tino kola e talitonu ki te Atua e taua mai eiloa ki te tupu.

³³A takitaki poto o te fenua ka fakasalalau atu te lotou poto ki nisi tino. I se taimi, ka mate a nisi o latou i te taua io me mate i te afi, ka ko nisi ka fao malo olotou mea kae pei ki falepuipui.

³⁴I te taimi e fakatau ta'tino ei a tino, ka ko tino o te Atua ka maua ne latou se fesoasoani foliki e ui eiloa a te tokoukega kola e kau atu ki a latou e kau fua ke 'sao latou.

³⁵A nisi o takitaki poto kona ka mate, kae e lei me ka faka'ma ei a tino i feitu faka tapuakiga. Ka tumau eiloa te mea tena ke oko ki te taimi e oko mai ei te gataga, te taimi tela ko oti ne fakasino ne te Atua.

³⁶ “A te tupu o Sulia ka pule eiloa i te mea e manako a ia o fai. Ka fai ana muna fakamatamata i a ia e sili atu i so se atua, ke oko foki eiloa ki te Atua Maluga. Ka mafai eiloa ne ia o fai te mea tena ke oko ki te taimi e fakasala ei a ia ne te Atua. A te Atua ka fai eiloa ne ia a te mea ko oti ne fuafua ne ia ke fai.

³⁷A te tupu tena ka se saga ki te atua tela e tapuaki ki ei ona tupuga, pela foki te atua tela e fia'fia ki ei a fafine. Ka se saga eiloa a ia ki so se atua me i ona manatu, me e sili atu a ia i so se atua.

³⁸Ka fakaaloalo ne ia a te atua tela e puipui ne ia a olo o fa'kai. Ka ofo atu ne ia ne aulo, siliva, mo fatu taua mo nisi meaalofa ki se atua e seki tapuaki ki ei ona tupuga.

³⁹Ka fakaaoga ne ia a tino e tapuaki ki atua fakaatea ke puipui ne latou ona olo. Ka taui fakalei ne ia a tino kola e talia ne latou tena pule, ka fakasopo ne ia latou ki tulaga maluga, kae avatu foki ne ia a laukele e taui ei te lotou fakamaoni ki a ia.

⁴⁰“Kafai ko pili mai a te toe taimi o te tupu o Sulia, kae ka vau a te tupu o Aikupito o fai taua ki ei, ka ko te tupu o Sulia ka taua mai foki ki te tupu o Aikupito mo tena malosi katoa, mo kaliota, solofanua mo vakamutu e uke. Ka taua atu a ia ki fenua e uke, e pela me se lofiaga.

⁴¹Ka taua mai foki a ia ki te Fenua o te Feagaiga, kae ta ne ia i taki sefulu afe, ka ko tino Etoma, Moapi mo tino e toe o Amoni ka sola keatea.

⁴²Kafai ko taua atu a ia ki fenua katoa kona, kae e aofia foki i ei a Aikupito.

⁴³Ka ave keatea ne ia a koloa funa o Aikupito, ko siliva mo aulo mo nisi koloa taua. Ka fakatakavale ne ia a te fenua o Lipia mo Sutana.

⁴⁴Ka oko mai a tala mai te saegala mo matu, kae ka mataku a ia, taua atu eiloa a ia, ta valevale eiloa a tino e tokouke.

⁴⁵Ka fakatu aka ne ia ana faleie lasi i te va o te tai mo mauga, te koga e tu ei te Faletapu. Kae ka mate eiloa a ia, ka seai se tino e fesoasoani ki a ia.”