Read Te Tusi Tapu I Te Gana Tuvalu Lomiga Lua TANIELU 2 Bible Online

TANIELU 2 - Te Tusi Tapu I Te Gana Tuvalu Lomiga Lua bible

TANIELU 2

¹I te lua o tausaga ne fai ei Nepukanesa mo tupu, ne fai ei tena moemiti. Ko oko eiloa i te fakalavelave atu o te moemiti ki a ia, ko se ti moe sale a ia,

²tena, uga ei tena fekau ki ana tino poto i fakamatala mea tupu i aso fakamuli, mo ana tino fakataulaitu ke o'mai o fakamatala te uiga o tena moemiti. Ne o'mai latou kona o tu i mua o te tupu, kae fai atu mo te tupu ki a latou,

³“A toku loto ko oko eiloa i te se toka i taku moemiti ne fai. Au e manako ke taku mai ne koutou me se a tena uiga.”

⁴Ne tali mai latou i te gana Alamaika penei, [1]“Tou Malu, ke ola loa koe! Fakamatala mai tau moemiti kae ka taku atu ne matou tena uiga.”

⁵Muna a te tupu ki a latou, “Ko oti ne iku i toku mafaufau me e tau eiloa o fakaasi mai ne koutou taku moemiti, pela foki mo tena uiga. Kafai e se mafai ne koutou o fakaasi mai taku moemiti mo tena uiga, ka saesae ne au koutou, kae ofa otou fale.

⁶Kae kafai e mafai ne koutou, ka togi ne au koutou ki meaalofa mo ne tulaga fakaaloalogina. Tela la, na taku mai nei me se a taku moemiti pela foki tena uiga.”

⁷Ne tali atu latou ki te tupu penei, “Tou Malu, kafai e fakamatala mai fua ne koe tau moemiti ki a matou, kae ka fakaasi atu ne matou tena uiga.”

⁸Muna a te tupu, “Tela eiloa i oku mafaufauga! A koutou ko taumafai o fakalevaleva te taimi, me ko iloa ne koutou me fakasala katoa koutou ne au i te fakasalaga e tasi manafai e se taku mai ne koutou taku moemiti.

⁹A koutou ne loto fakatasi ke fakamatala mai faeloa ne koutou a mea loi ki a au, me i otou manatu me kafai e tai leva, kaati ko fuli taku ikuga. Fakamatala muamua mai taku moemiti, ko iloa ei ne au me e iloa foki ne koutou tena uiga.”

¹⁰Ne tali mai a te kau fakatonutonu kona a te tupu penei, ‘‘E seai eiloa se tino i te lalolagi tenei e mafai ne ia o fakaasi mai te mea tena e manako koe ki ei. E seki ai eiloa se tupu io me se tagata takutakua kai fai ne ia se mea pena ki ana tino poto i fakamatala mea e tupu i aso fakamuli, mo ana tino fakataulaitu.

¹¹Tou Malu, a te mea tena e manako mai koe ki ei ko oko eiloa i te faigata, e seai eiloa se tino e mafai o iloa ne ia, na ko atua fua, ka ko te fakalavelave, i atua e se nofo tasi mo tino ola.”

¹²Ne kaitaua te tupu i muna a latou kona, tena ne fai ei tena fakatonuga ke tamate katoa a tino fakatonutonu a te tupu i Papelonia.

¹³Tena la, ne fakasalalau atu ei a te fakatonuga ke tamate katoa a tino fakatonutonu, e aofia ei a Tanielu mo ona taugasoa.

¹⁴Tena, ne fanatu ei a Tanielu ki a Alioka, te pule o sotia tausi o te tupu, tela ko ia e fakataunu ne ia te fakasalaga tena.

¹⁵Ne faipati fakalei atu Tanielu ki a Alioka me ai a ne fai ei ne te tupu se vaega fakatonuga fakamataku pena. Tena, ne fakaasi atu ei ne Alioka a te mea tena ne tupu ki a Tanielu.

¹⁶Tena ne fano ei a Tanielu o toe fakamolemole ki te tupu ke toetuku mai se taimi, ke sukesuke aka ne ia a te uiga o te moemiti.

¹⁷Ne foki atu Tanielu ki tena fale, fakaasi atu ei ne ia a te mea tena ne tupu ki ana taugasoa ko Hanania, Misaeli mo Asalia.

¹⁸Ne fai atu a ia ki a latou ke talo latou ki te Atua o te lagi ke alofa mai ki a latou, kae ke fakamolemole ki a ia ke fakamalamalama mai a te uiga o te moemiti a te tupu, ko te mea ke se tamate latou fakatasi mo nisi tino fakatonutonu i Papelonia.

¹⁹I te po eiloa tena, ne fakaasi mai ei ne te Atua ki a Tanielu a te uiga o te moemiti, tena ne vikia ei ne ia a te Atua o te lagi, muna a ia:

²⁰“A te Atua e poto kae mana! Viki atu ki a ia ki te se gata mai, se gata mai eiloa.

²¹E pule a ia i aso mo tau o tausaga, E fai ne ia a tino ke fai mo tupu Kae fai foki ne ia ke se tupu; Ko ia e aumai ne ia te poto mo te malamalama.

²²E fakaasi ne ia a mea funa; E iloa ne ia a mea e funa i te pouliga, Ka ko ia e nikoi ne te mainaga.

²³Te Atua o oku tupuga, e tavae kae fakaaloalo ne au a koe. Ko oti ne aumai ne koe ki a au a te poto mo te malosi; Ne tali mai koe ki taku talo o fakaasi mai a te mea e tau o fakaasi ki te tupu.”

²⁴Ne fanatu Tanielu ki a Alioka, te tagata ne fakatonu ne te tupu ke tamate ne ia a tino fakatonutonu, kae fai atu penei, “Sa tamate mua a tino kona. Avatu au ki te tupu ke fakaasi ne au ki a ia a te uiga o tena moemiti.”

²⁵I kona eiloa, ko Tanielu eiloa ko ave ne Alioka ki mua o te Tupu ko Nepukanesa, kae fai atu penei mo Alioka ki te tupu, “Tenei te tagata Iutaia o te tafeaga e mafai o fakaasi atu ne ia a te uiga o tau moemiti.”

²⁶Muna a te tupu ki a Tanielu tela e fakaigoa foki ko Peletisala, “E mafai ne koe o fakaasi mai taku moemiti mo tena uiga?”

²⁷Ne tali atu Tanielu, “Tou Malu, e seai eiloa se tino poto i fakamatalaga o mea tupu i aso fakamuli, io me se tino fakataulaitu, io me so se tino poto e mafai ne ia o fakaasi atu tau moemiti mo tena uiga.

²⁸E isi te Atua i te lagi e mafai ne ia o fakaasi a mea funa pena. Ko oti ne fakaasi mai ne ia ki a koe a te mea ka tupu i aso fakamuli. Ka fakamatala atu nei ne au a tau moemiti, ko te fakaasiga tena ne oko atu ki a koe i te taimi ne moe ei koe.

²⁹“I te taimi ne moe ei koe, ne moemiti koe e uiga ki mea ka tupu i aso fakamuli; ko te Atua, tela e fakaasi sale ne ia a mea funa, ne fakaasi atu ne ia ki a koe a te mea ka tupu i aso fakamuli.

³⁰A te mea tena ne fakaasi mai ki a au, e se fai pela au e poto atu i tino katoa, kae ne fakaasi mai ko te mea ke iloa ne koe a te uiga o tau moemiti, kae ke malamalama foki koe i mafaufauga kona ko oko atu ki a koe.

³¹“Tou Malu, i tau moemiti, ne matea ne koe a te tupua lasi eiloa e tu i ou mua, e malapulapu kae fakamataku.

³²A tena ulu e faite ki te aulo tafasili i te gali; a tena fatafata mo lima e faite ki siliva, ka ko tena taugasulu mo ona tega e faite ki palasi.

³³A ona vae ne fiti, ka ko ona tapuvae ne faite ki fiti mo one.

³⁴I te taimi koi kilokilo atu koe ki ei, ko te fatu lasi eiloa ko to mai luga o te kaupapa, seai se tino ne fai ne ia; ne to ifo, poko eiloa i tapuvae o te tupua kola ne faite ki fiti mo one, tena maofa likiliki eiloa ona vae.

³⁵I kona foki eiloa, ko te tupua eiloa tena ko maofa ki lalo, a te fiti, one, palasi, siliva mo te aulo ko maofa valevale kae ko pela mo te pefu i luga i te mea solo saito i te taimi o te tau vela. Ne agi ne te matagi, galo atu eiloa. Ka ko te fatu tena ne tupu aka, ko fai mo mauga lasi eiloa tela ko ufi ei te lalolagi katoa.

³⁶“Tou Malu, tena tau moemiti, kae nei ka fakaasi atu ne au tena uiga.

³⁷Tou Malu, a koe ko te tupu tafasili i te takutakua i lo tupu katoa. A te Atua o te lagi ne fai ne ia koe mo tupu, kae ne avatu ne ia ki a koe te malosi mo se tulaga fakaaloalogia.

³⁸Ne fai ne ia koe mo pule o te lalolagi katoa, ke oko foki eiloa ki manu valevale katoa. A koe ko te ulu aulo o te tupua.

³⁹Ka palele atu a tou malo, kae ka tu aka te sua malo e se takutakua malosi penei mo tou malo, ka oti aka te malo tena kae tu aka te sua malo, se malo palasi, tela ka pule foki ne ia a te lalolagi.

⁴⁰Ka oti te malo tena, kae toetu aka foki te fa o malo, se malo e malosi pela me se fiti, tela ka ofa ne ia so se mea. E pela eiloa mo te fiti e ofa ne ia mea katoa, e pena foki te malo tena me ka nutipala ne ia a malo katoa mai ona mua.

⁴¹Ne lavea foki ne koe i ana tapuvae mo matikao vae ne faite ki fiti mo one; ko tena uiga i te malo tena ka vaelua, kae e isi eiloa te malosi o te fiti i ei, me ne faite ki fiti palu tasi mo te one.

⁴²A matikao vae, nisi matikao e faite ki fiti ka ko nisi ki one; ko tena uiga, a te vaega e tasi o te malo e malosi ka ko te sua vaega e vaivai.

⁴³Ne lavea foki ne koe i te fiti e palu tasi mo te one, ko tena uiga a takitaki o te malo tena ka taumafai o fakasoko olotou kāiga o fakatau fakaa'vaga, kae ka se mafai eiloa o taunu olotou fakamoemoega, e pela eiloa mo te fiti e se mafai o soko tasi mo te one, manafai e palu tasi.

⁴⁴I te taimi o takitaki kona, kae ka fakatu ne te Atua o te lagi a te malo tela ka se toe gata mai. Ka se toe mafai o takavale a te malo tena. Ka fakatakavale ne ia a malo katoa kona, kae ka tumau ki te se gata mai.

⁴⁵Ne lavea ne koe te fatu tela ne to ifo mai luga o te kaupapa, seai se tino ne fai ne ia, tela ne to ki luga i te tupua tena ne faite ki fiti, palasi, one, siliva mo te aulo. Ko te Atua Maluga tena ne fakaasi atu ne ia ki a koe a te mea ka tupu i aso fakamuli. Ko oti ne fakamatala faka'lei atu eiloa ne au ki a koe a tau moemiti mo tena uiga tonu.”

⁴⁶Tena ne punou ifo a Nepukanesa ki lalo i te laukele kae fai tena fakatonuga ke ofo atu ne taulaga ki a Tanielu.

⁴⁷Muna a te tupu, “A tou Atua ko te Atua tafasili i atua katoa, ko te Aliki o tupu katoa, ko ia e fakaasi mai sale ne ia a mea funa. E iloa ne au te mea tena, me tenei ko koe fua e mafai ne koe o fakamalamalama mai a te mea faigata tenei.”

⁴⁸Tena ne fakasopo ei ne ia Tanielu ki se tulaga maluga, tuku atu ne ia ki a ia a meaalofa gali e uke, kae fai ne ia ke pule i te itu malo o Papelonia, kae ke fai mo takitaki o te kau fakatonutonu a te tupu.

⁴⁹Ne fakamolemole Tanielu ki te tupu ke fakasopo aka a Satalaka, Mesako mo Apeteniko ke pulepule ne latou a mea fai o te itu malo o Papelonia. A Tanielu ne tumau eiloa i te palesi a te tupu.