Read Te Tusi Tapu I Te Gana Tuvalu Lomiga Lua TANIELU 3 Bible Online

TANIELU 3 - Te Tusi Tapu I Te Gana Tuvalu Lomiga Lua bible

TANIELU 3

¹E isi se tupua aulo ne fai te Tupu ko Nepukanesa ke faite, e luasefulu fitu mita te maluga kae tai maua eiloa te tolu mita te lauefa, kae ne fakatu ne ia i te laukele laugatasi o Tula i te itu malo o Papelonia.

²Ne fai te fakatonuga a te tupu ki ana ofisa katoa ke maopoopo atu — ko pelenise, ko kovana, ko sui kovana, ko komesina, ko teutupe, ko famasino, mo nisi ofisa katoa o itu malo. A latou katoa konei e tau o maopoopo mai ki te fakatapuga o te tupua tenei ne fakatu aka ne te Tupu ko Nepukanesa.

³I te taimi ko maopoopo mai katoa ei a ofisa kona o tu i mua o te tupua tena, kae fanake mo te valo mai te tagata valo penei,

⁴“Tino o malo katoa, mo gana valevale!

⁵Ka lagona ne koutou a te tagi o pu mo kitala mo nisi mea fakatagitagi aka, i te taimi eiloa e kamata ei te faka'tagiga o mea kona, e tau mo koutou o ifo kae tapuaki atu ki te tupua aulo tenei ne fakatu aka ne te Tupu ko Nepukanesa.

⁶So se tino e se ifo kae tapuaki ki te tupua tenei e pei ki te afi.”

⁷Tena la, i te taimi eiloa ne lagona ei a te tagi mai o mea fakatagitagi kona, ko tino eiloa o malo valevale mo gana valevale ko ifo kae tapuaki atu ki te tupua tena ne fakatu aka ne te Tupu ko Nepukanesa.

⁸Ko te mea tena ne fai, ne ala ei a nisi tino Papelonia o folafola fakamasei ne latou a tino Iutaia ki te tupu.

⁹Muna a latou ki a Nepukanesa penei, “Tou Malu, ke ola loa koe!

¹⁰E isi sau fakatonuga ne fai ki tino katoa ke ifo kae tapuaki ki te tupua aulo i te taimi e kamata ei o tagi a mea fakatagitagi,

¹¹ka ko te tino e se ifo o tapuaki e pei ki te afi.

¹²A tino Iutaia kola ne faka'sopo ne koe ke pule i te itu malo o Papelonia; ko Satalaka, Mesako mo Apeteniko, ne teke ne latou tau fakatonuga. E se tapuaki latou ki tou atua io me ifo atu ki te tupua ne fakatu ne koe.”

¹³Ko oko eiloa i te kaitaua o te tupu ki te tokotolu kona, tena ne fai ei tena fakatonuga ke aumai latou kona ki ona mua.

¹⁴Muna a te tupu ki te tokotolu kona, “Satalaka, Mesako mo Apeteniko, e tonu te tala i a koutou ne ita ma tapuaki ki toku atua kae ita ma ifo kae tapuaki ki te tupua aulo tela ne fakatu aka ne au?

¹⁵Kiloke, i te taimi tenei, kafai eiloa e lagona ne koutou te tagi o pu mo kitala mo nisi mea fakatagitagi aka, e tau koutou o ifo o tapuaki ki te tupua aulo tena. Kafai se faka'logo koutou, ko koutou ka pei ki te afi. I te otou faka'tau, e isi aka foki se atua fakaatea e mafai ne ia o fakasao koutou?”

¹⁶Ne tali mai Satalaka, Mesako mo Apeteniko penei, “Tou Malu, matou se ma'taku i te afi.

¹⁷Kafai e mafai ne te Atua tenei e tavini matou ki ei o fakasao matou mai te afi, pela foki mai tou malosi, e fakasao eiloa ne ia matou.[2]

¹⁸Kae kafai foki la e se mafai ne ia, ka ko matou e se mafai eiloa o tapuaki atu ki tou atua, io me ifo ki te tupua aulo tena ne fakatu aka ne koe.”

¹⁹Tena la, a Nepukanesa ko kula eiloa i te kaitaua ki a Satalaka mo Mesako mo Apeteniko. Tena ne fai ei tena fakatonuga ki tena kau ke faka'vela te afi, e fakafitu taimi te vela atu i lo te vela e masani ei te afi tena.

²⁰Ne fakatonu ne ia a tagata mafi eiloa i tena kautau ke saisai te tokotolu tamataene konei kae ke pei ki loto i te afi.

²¹Tena ne saisai ei a latou kona mo olotou gatu eiloa e pei mai ki ei, pei ei latou ki loto i te afi.

²²A sotia kola ne olo o pei te tokotolu kona ki loto i te afi ne ka i te ulafaga o te afi tela ko oko eiloa i te ka, e pela eiloa mo te fakatonuga a te tupu ke fai eiloa ke vela malosi.

²³Tena la, ko Satalaka eiloa mo Mesako mo Apeteniko kola koi saisai, ko to atu ki loto i te afi.

²⁴I kona foki eiloa, kae tu aka mo Nepukanesa, ko oko eiloa i ona poi. Muna a ia ki ana ofisa, “E se tokotolu a tino ne saisai ne tatou o pei ki te afi?” Ne tali mai a ofisa penei, “Tou Malu, ao, e tokotolu.”

²⁵Muna a te tupu, “Ai a la e tokofa ei a tino konei e lavea atu ne au e sasale i loto i te afi? A tino konei e se saisai kae se mata 'mae, a te sua tino e pela me se atua.”[3]

²⁶Tena ne fanatu ei a Nepukanesa ki te mataloa o te afi kae kalaga atu penei, “Satalaka! Mesako! Apeteniko! Tavini a te Atua Maluga! Mai ki tua!” Tena ne ulu mai latou kona mai loto i te afi.

²⁷A pelenise, kovana, sui kovana mo ofisa katoa a te tupu ne fakapilipili mai katoa o kilo ki te tokotolu tamataene konei kola e seki ka i te afi. A olotou laulu mo gatu e seai eiloa se mata paku i ei, e seai foki se manogi siau i olotou foitino.

²⁸Muna a te tupu, “Tavae atu ki te Atua o Satalaka, Mesako mo Apeteniko! Ne uga mai ne ia tena agelu o fakasao a tagata konei e tavini kae fakamaoni ki a ia. Ne teke ne latou taku fakatonuga, faitalia fua te mate o latou, kae ke mo a eiloa e ifo io me tapuaki latou ki so se atua na ko te atua eiloa o latou.

²⁹“I te taimi tenei, ko fai taku fakatonuga, me so se tino i so se malo e faipati se 'lei e uiga ki te Atua o Satalaka mo Mesako mo Apeteniko e tau o saesae, ka ko tena fale e ofa likiliki. E seai aka foki se atua e mafai ne ia o fai se mea penei mo te mea ne fai ne te Atua o te tokotolu konei.”

³⁰Tena, ne siki aka ei ne te tupu a Satalaka mo Mesako mo Apeteniko ki tulaga ma'luga i te itu malo o Papelonia.