Read Te Tusi Tapu I Te Gana Tuvalu Lomiga Lua TANIELU 4 Bible Online

TANIELU 4 - Te Tusi Tapu I Te Gana Tuvalu Lomiga Lua bible

TANIELU 4

¹E isi se fekau ne avatu ne Nepukanesa ki tino katoa i malo katoa i te lalolagi. E penei tena fekau: “Talofa koutou!

²Faka'logo mai ki taku tala e uiga ki mea fakaofoofogia mo vavega kola ne fakaasi mai ne te Atua Maluga ki a au.

³“Ko oko eiloa i te gali o mea fakaofoofogia ne fakaasi mai ne te Atua ki a tatou! Ko oko eiloa te mana o vavega ne fai ne ia! A te Atua ka fai mo tupu ki te se gata mai; Ka pule a ia ki te se gata mai.

⁴“Au se tagata e ola i te olaga gali i toku palesi, kae fiafia i a au e maumea.

⁵Kae i te taimi e tasi, ne moemiti au, ne lavea ne au a ata fakamataku i te taimi ne moe ei au.

⁶Ne fai taku fakatonuga ki tino fakatonutonu katoa a te tupu ke o'mai o fakamatala mai te uiga o taku moemiti.

⁷Ne o'mai katoa a tino poto i fakamatala o mea tupu i aso fakamuli, pela foki tino fakataulaitu, mo tino poto katoa i vaega poto pena, tena, fakamatala atu ei ne au taku moemiti ki a latou, kae se maua ne latou o fakaasi mai tena uiga.

⁸Tena, kae vau mo Tanielu. Te sua igoa o ia ko Peletisala, se igoa o toku atua e tokotasi. A te agaga o atua malu e i a ia, tena ne fakamatala atu ei ne au taku moemiti ki a ia. Muna a aku penei:

⁹Peletisala, te pule o tino poto i fakamatalaga o mea tupu i aso fakamuli, e iloa ne au i te agaga o atua malu tena e nofo i a koe, kae e iloa ne koe a mea funa katoa. Tenei taku moemiti ka fakamatala atu, kae taku mai me se a tena uiga.

¹⁰“I te taimi ne moe ei au, ne lavea ne au se lakau lasi eiloa i te kogaloto o te lalolagi.

¹¹Ne tupu aka te lakau tena o lasi, oko atu eiloa ki te lagi, kae ko mafai foki o lavea ne tino katoa i te lalolagi.

¹²A ona lau ko oko eiloa i te gali, ka ko fuaga o ia ko oko eiloa i te uke, kaati e lava eiloa i ei a tino o te lalolagi katoa ma kai i ei. A manu vae fa o te vao e nofonofo i lalo i tena maluga, a manu eva e fai olotou ofaga i ona kaula, ka ko fuaga o ia e kai ne mea ola valevale i te lalolagi.

¹³“I te taimi koi mafaufau ei au ki te fakaasiga tena ne lavea ne au, kae matea ne au te agelu e vau mai te lagi, e foitino malielie kae matapulapula.

¹⁴Ne valo te agelu tena penei, ‘Kati te lakau ki lalo kae sepe keatea ona kaula; katikati ona lau kae laku valevale atu ona fuaga. Afuli atu keatea a manu vae fa kona e faka'malu i ei, pena foki a manu eva kona e fai ofaga i ona kaula.

¹⁵Ka ko te tafito ke tuku eiloa ke tu, kae ke sai ki se filifili fiti mo palasi. Tuku i ei ke tu pena fakatasi mo mouku. “‘Tuku ei a te tagata tena ke to ne te sau, kae ke nofo tasi mo manu mo lakau.

¹⁶I tausaga e fitu, a tena mafaufau ka pela eiloa mo te mafaufau o te manu.

¹⁷Tena te ikuga a te agelu foitino malielie kae matapulapula. Tela la, ke malamalama tino katoa i te lalolagi, i te Atua Maluga e pule i malo faka‐te‐lalolagi, kae e mafai o tuku atu ne ia latou ke fakatakavale ne so se tino e loto a ia ki ei, ke oko foki eiloa ki te toe tino malalo eiloa.”

¹⁸Muna a Nepukanesa, “Tena taku moemiti. Peletisala, taku mai me se a tena uiga. E seai se tino fakatonutonu a aku e mafai o taku mai ne ia te uiga, ko koe fua, me i te agaga o atua malu e nofo i a koe.”

¹⁹A Tanielu, tela e fakaigoa foki ko Peletisala, ko oko eiloa i te poi ko se iloa ne ia me se a tena pati ka fai. Muna a te tupu ki a ia, “Peletisala, sa poi ona ko te moemiti.” Muna a Peletisala, “Tou Malu, aku muna eiloa ko te moemiti ke fakauiga ki ou fili kae se ki a koe.

²⁰A te lakau tela e oko tena taulu ki te lagi e mafai o lavea ne tino katoa o te lalolagi.

²¹A ona lau ko oko eiloa i te gali, ka ko ona fuaga e lava ei a te lalolagi katoa mafai e kai ki ei. A manu vae fa o te vao e takato i tena malūga, ka ko manu eva e fai ofaga i ona kaula.

²²“Tou Malu, a koe ko te lakau tena, e maluga kae malosi. A tou igoa ko oko eiloa i te takutakua tela ko oko atu ki te lagi, ka ko tou malosi ko salalau i te lalolagi katoa.

²³I te taimi ne kilokilo atu ei Tou Malu, kae vau te agelu mai te lagi kae fai mai penei, ‘Kati keatea te lakau tena kae tuku ei tena tafito i kona. Sai atu se filifili fiti palasi ki ei, kae tuku ei i kona fakatasi mo mouku. Tuku atu ei te tagata tena i kona ke siu i te sau o te po, kae ke nofo tasi mo manu vae fa i kona i tausaga e fitu.’

²⁴“Tou Malu, tenei la te uiga o tau moemiti, ko te mea tela ne folafola ne te Atua Maluga me ka tupu ki a koe.

²⁵A koe ka afuli keatea mai te koga e nofo ei a tino, kae ka nofo tasi koe mo manu. I tausaga e fitu, ka kai koe i mouku e pela mo te pulumakau, kae moe i tafafale kae ka siu faeloa koe i te sau o te po. Kafai ko katoa tausaga kona e fitu kae ka iloa ne koe i te Atua Maluga e pule i malo faka‐te‐lalolagi katoa, kae e mafai foki ne ia o tuku ki so se tino e loto a ia ki ei.

²⁶A agelu ne fakatonu mai ke tuku malie ei a te tafito ke tu i te laukele; ko tena uiga, a koe e toe fai mo tupu i te taimi e talitonu ei koe i te Atua e pule i te lalolagi katoa.

²⁷Tela la, Tou Malu, fakalogo mai ki aku muna fesoasoani; sa toe agasala, fai faeloa te mea tonu kae alofa ki tino ma'tiva, [4] kae ka tumau faeloa tou manuia.”

²⁸A mea katoa kona ne tupu katoa ki a Nepukanesa.

²⁹E sefululua masina fakamuli ifo, i te taimi ne sasale ei a ia i te tuafale o tena palesi i Papelonia,

³⁰kae fai mo ana muna penei, “Kiloke ki te gali o Papelonia! Ne faite ne au ke fai mo laumua o toku malo, e fakaasi ei toku malosi mo toku maluga mo toku takutakua.”

³¹E seki motu atu ana pati, kae vau mo te leo mai te lagi penei, “Nepukanesa, fakalogo mai ki aku pati konei ka fai atu! A tou malu fakatupu ko ave nei ne au keatea.

³²A koe ka afuli keatea mai te koga e nofo ei a tino; ka nofo tasi koe mo manu vae fa o te vao, kae ka kai koe i mouku e pela me se pulumakau i tausaga e fitu. Ka iloa ei ne koe i te Atua Maluga e pule i malo faka‐te‐lalolagi, kae e mafai fua ne ia o tuku ki so se tino e loto a ia ki ei.”

³³I kona eiloa, te mea eiloa ko taunu a muna kona mai te lagi. Ne afuli keatea a Nepukanesa mai te koga e nofo ei a tino, kae kai mouku e pela me se pulumakau. Ne to te sau o te po ki tena foitino, ka ko ona laulu ko loa eiloa pela mo fulu o te aeto, ka ko ona ma'nia ko loa eiloa pela mo mania o se manu eva.

³⁴Muna a te tupu, “I te katoaga o te fitu tausaga, ne kilo oku mata ki te lagi, ko au eiloa ko se fakavalevale. Ne viki au ki te Atua Maluga kae fakaaloalo ne au a ia tela e ola ki te se gata mai. “Ka pule a ia ki te se gata mai, Ka ko tena malo ka tumau ki te se gata mai.

³⁵A tino o te lalolagi e pela me ne leai i a ia; A agelu o te lagi mo tino o te lalolagi e i lalo o tena pulega. E seai se tino e mafai o teke ki tena loto, Io me sukesuke ki ana mea e fai.

³⁶“I te taimi ne lei ei toku fakavalevale, tena kae toe fakafoki mai ne ia ki a au toku malu mo te takutakua o toku malo. Ne talia fakalei au ne aku ofisa mo tino maluga, kae ne toe fakafoki mai ki a au toku malosi faka tupu, kae ko silia atu i te taimi muamua.

³⁷“Tela la, ko au ko Nepukanesa, ko viki kae fakaaloalo ne au a te Tupu o te lagi. A mea katoa e fai ne ia e tonu katoa, kae e mafai fua ne ia o fakamalalo so se tino e uiga fakamatamata.”