Read Te Tusi Tapu I Te Gana Tuvalu Lomiga Lua TANIELU 5 Bible Online

TANIELU 5 - Te Tusi Tapu I Te Gana Tuvalu Lomiga Lua bible

TANIELU 5

¹I te po e tasi, ne kami mai ne te Tupu ko Pelesala e tusa mo te toko afe tagata ma'luga ki te kaiga ne fakatoka ne ia, tena ne inu uaina fakatasi ei latou.

²I te taimi koi inu ei latou, kae fai te fakatonuga a Pelesala ke aumai a ipu aulo mo ipu siliva pela foki a pōla kola ne puke mai ne tena tamana[5] ko Nepukanesa mai te Faletapu i Ielusalema. Ne uga te fekau a te tupu ke aumai a mea kona, ke inu i ei a ia mo ana tino maluga mo ana avaga tonu mo ana avaga fakasalasala.

³Tena, ne aumai a ipu mo pōla aulo kona, fakaaoga ei ne latou o inu uaina i ei,

⁴kae vikia ne latou a atua ne faite ki aulo, siliva, palasi, fiti, lakau mo fatu.

⁵I kona eiloa, kae sae aka mo te tapulima o te tagata o kamata o tusitusi i te 'pui o te palesi, ko te koga tena e tai maina malosi i te mainaga o moli. Ne lavea ne te tupu a te tapulima tena e tusitusi i te pui.

⁶Tena, kae poko mai mo te mataku ki a ia, tela la, ko lau'tea faka eiloa a ia mo ona tuli ko kamata pole'pole.

⁷Ne kalaga atu a ia ke aumai a tino poto katoa i mea taulaitu. I te okomaiga a latou ki loto, muna a te tupu ki a latou penei, “So se tino e mafai ne ia o faitau a muna kona e tusi mai kae fakamatala tena uiga, ka fakapei ki gatu o tupu, lanu kulakula, kae sai te malele aulo i tena ua, kae ka tokotolu ki te tupu i te malo.”

⁸Ne o'mai a tino fakatonutonu ki mua, kae seai eiloa se tino e mafai ne ia o faitau a muna kona, io me iloa ne ia te uiga o muna kona.

⁹A te tupu ko Pelesala ko gasolo eiloa o lau'tea tena foitino i te fanoanoa, ka ko ana tino maluga ko se iloa o fai se mea.

¹⁰Ne lagona ne te matua o te avaga a te tupu a te logoa mai o te tupu mo ana tino ma'luga, tena ne ulu atu ei a ia ki loto i te fale tena e fai ei te kaiga. Muna a ia penei, “Ke ola leva Tou Malu! Fakamolemole sa to fanoanoa, i a koe ko lau'tea faka eiloa.

¹¹E isi se tagata i loto i tou malo e nofo i ei a te agaga o atua malu katoa. I te taimi ne tupu ei tou tamana, ne lavea atu ei te poto mo te mafaufau o te tagata tenei, e pela eiloa mo te poto o atua. Tela la, ne fakasopo a ia ne Nepukanesa, tou tamana, ke pule i ana tino fakatonutonu katoa.

¹²A te tagata tenei e tafasili te poto i fakamatalaga o moemiti mo mea funa. Uga tau fekau ki a Tanielu, tela ne fakaigoa ne te tupu ki a Peletisala, kae ka fakaasi atu ne ia a uiga o muna kona e tusi i te pui.”

¹³Ne aumai fakavave a Tanielu ki mua o te tupu, kae fai atu mo te tupu ki a ia penei, “A koe ko Tanielu, te Iutaia tela ne puke fakapagota mai ne toku tamana mai i Iuta?

¹⁴Au ne logo i te agaga o atua malu e nofo i a koe, ka ko koe foki se tagata poto kae atamai.

¹⁵A tino fakatonutonu mo tino fakataulaitu ne aumai ne au ki loto i konei, ke fakamatala mai te uiga o muna kola ne tusi i te pui, kae se mafai ne latou.

¹⁶Au ne logo me mafai ne koe o fakamatala a uiga o mea funa pena. Kafai e maua ne koe o faitau a te tusitusiga tena kae taku mai tena uiga, ko koe ka fakapei ki gatu o tupu lanu kulakula, kae ka fakamau i tou ua se malele aulo, se fakailoga o tou tulaga fakaaloalogia, kae ka tokotolu koe ki te tupu i te malo.”

¹⁷Ne tali mai Tanielu penei, “Au meaalofa kona ke tausi eiloa ne koe io me tuku atu ki se tino fakaatea. Ka faitau atu ne au ki Tou Malu a muna kona ne tusi i te pui, kae fakaasi atu foki tena uiga.

¹⁸“A te Atua Maluga ne fai ne ia a Nepukanesa tou tamana mo tupu takutakua, kae avatu foki ne ia ki ei te tulaga maluga kae fakaaloalogina.

¹⁹A ia se tagata tafasili i te takutakua, tela la, a tino o malo katoa e ma'taku i a ia. Kafai e loto a ia o tamate se tino, e tamate eiloa ne ia; kafai e manako a ia o fakaola se tino, e fakaola eiloa ne ia. E mafai ne ia o fakamasiasi so se tino e manako a ia o fakamasiasi, io me avaka ne ia so se tino e loto a ia ki ei, ki se tulaga maluga.

²⁰Kae ona ne maua ne ia te loto fakamatamata mo te loto ita, mo te amio masei, tena ne ave keatea ei a ia mai tena nofogaaliki.

²¹Ne afuli keatea a ia mai te koga e nofo ei a tino; a tena mafaufau ko pela mo se mafaufau o te manu. E nofo tasi a ia mo asini vao, e kai ki mouku e pela me se pulumakau, kae moe fakasau i te matafale, e seai se mea e 'pulu ei a ia mai te sau o te po. Fakamuli ifo, ne talitonu ei a ia i te Atua Maluga e pule i malo faka‐te‐lalolagi katoa, kae e mafai fua o tuku ne ia ki so se tino e loto a ia ki ei.

²²“Ka ko koe, tena tama, e ui eiloa ko oti ne iloa ne koe a mea kona, kae se fakamala'lalo ifo eiloa koe.

²³Ne teke koe ki te Aliki o te lagi i te aumaiga ne koe o ipu mo pola kola ne aumai mai tena Faletapu. A koe mo au tino maluga, mo au avaga tonu mo au avaga fakasalasala, ne inu uaina i ipu kona kae vikia ne koutou a atua ne faite ki aulo, siliva, palasi, fiti, lakau mo fatu, ne atua e seai se lotou mea e mafai o lavea io me lagona, kae seai se lotou mea e iloa. Kae e seki fakaaloalo ne koutou a te Atua tela e pule i otou ola mo mea katoa e fai ne koutou.

²⁴Tena te mea ne uga mai ei ne te Atua a te lima tena ke tusi ne ia a muna kona.

²⁵“Konei a muna ne tusi ne te lima tena: ‘Numela, numela, mafa, vaevae.’

²⁶A te uiga tenei: numela a te Atua ko oti ne numela ne ia te aofaki o aso ka fakagata ei ne ia tou malo;

²⁷mafa a tou mafa ko oti ne fua ki te fua mea mafa, kae iloa aka nei i a koe ko to mama;

²⁸vaevae a tou malo ka vaevae kae tuku atu ki tino Metai mo tino Pelesia.” [6]

²⁹Tena, fai eiloa te fakatonuga a Pelesala ki ana tavini ke fakapei Tanielu ki gatu loa faka‐tupu lanu kulakula, kae safe atu se malele aulo ki tena ua, te fakailoga tena i a ia ko maluga; kae ne fakasopo a ia ne te tupu ke tu i te tokotolu i tena malo.

³⁰I te po eiloa tena, ko Pelesala eiloa, te tupu o Papelonia ko mate;

³¹kae sopo ei Taliu, te tagata Metai tela ko tusa mo te onosefulu lua ona tausaga, o fai mo tupu.