Read Te Tusi Tapu I Te Gana Tuvalu Lomiga Lua TANIELU 8 Bible Online

TANIELU 8 - Te Tusi Tapu I Te Gana Tuvalu Lomiga Lua bible

TANIELU 8

¹I te tolu o tausaga o te nofoaiga a Pelesala, kae toe lavea ne au te lua o fakaasiga. [8]

²I te fakaasiga tenei, au e poi i au e nofo i te fa'kai o Susa i te itu malo o Elama. I te taimi ne takatutu ei au i tafa o te Vaitafe o Ulai,

³kae lavea ne au i tafa o te vaitafe tena a te mamoe tagata kae lua ona sau, te sau e tasi e tai loa kae fou atu i te sua sau.

⁴Ne kilokilo atu au ki te mamoe tagata tena e sua ki te feitu ki te togala, e sua foki ki matu, pela foki ki saute. E seai eiloa se manu e mafai o teke ki ei io me mafai o sao mai i tena malosi. E fai eiloa ne ia a te mea e loto a ia ki ei, kae ko gasolo eiloa o fakamatamata.

⁵I te taimi koi mafaufau ei au me se a te uiga o te mea tena, kae sae mai mo te kouti e tele mai te togala, ko oko eiloa i te makini, se pa'tele ana vae ki lalo i te laukele. E tasi eiloa tena sau i te va o ona mata.

⁶Ne tele mai a te kouti tena ki te mamoe tagata tela ne lavea ne au e tu i tafa o te vaitafe; ne tele atu eiloa a te kouti tena o fakafepaki ki ei mo tena malosi katoa.

⁷Ne kilokilo atu eiloa au i tena fepakiga ki te mamoe. A te kouti tena ko oko eiloa i te kaitaua, tela la, i te fepakiatuga ki te mamoe, 'fati ei a sau e lua o te mamoe. A te mamoe ko seai sena malosi o teke atu te kouti. Ne siga te mamoe ki lalo, kae lakalaka ne te kouti, kae seai eiloa se tino e mafai ne ia o fakasao te mamoe.

⁸Ne gasolo aka eiloa te kouti o fakamatamata, kae i te taimi ko tugamalie eiloa tena malosi, kae fati tena sau, kae toetupu aka nei, e fa a sau e fakatau saga eiloa ki feitu kesekese.

⁹Ne tupu ake te sau foliki mai i te sau e tasi i sau kona e fa, ko tena malosi e fano fakasaute pela foki faka‐te‐saegala, e oko atu foki ki te Fenua o te Feagaiga.

¹⁰ Ne gasolo aka eiloa te sau foliki tena o malosi, ko mafai ne ia o fai taua ki kautau o te lagi, pela foki ki fetu. Ne pei ifo ne ia a nisi o latou ki te laukele kae lakalaka ne ia.

¹¹Ne fakatogafiti foki ne ia a te takitaki o te kautau o te lagi, fakagata foki ne ia a taulaga kola e ofo atu sale ki te takitaki o te kautau o te lagi, kae fakaseaoga foki ne ia a te Faletapu.

¹²A tino ko fai agasala fua i kona, i lo te ofo atu o taulaga 'tau kola e fai sale i aso takitasi; a faigā tapuakiga tonu ko seai foki. A te sau tena e manumalo i mea katoa e fai ne ia.

¹³Tena, kae lagona ne au a te agelu e tokotasi e fesili ki te sua agelu penei, “E gata mafea a mea konei e lavea atu i te fakaasiga? E oko mai mafea te taimi e toe kamata ei te faigā taulaga i aso takitasi? E gata afea te fakamaseiga o te Faletapu mo te kau o te lagi?”

¹⁴Ne lagona atu ne au a te tali a te sua agelu penei, “E tusa mo te afe selau limasefulu aso e seai eiloa ne taulaga i taeao mo afiafi e toe fai. Kafai ko katoa aso kona, ko toe faite ei te Faletapu.”

¹⁵I te taimi ne mafaufau malosi ei au ke malamalama au i te uiga o te fakaasiga, kae poi eiloa au i te tino e tu mai i oku mua.

¹⁶ Ne lagona atu ne au a te leo e kalaga i luga i te Vaitafe o Ulai penei, “Kapilielu, fakaasi atu ki a ia a te uiga o te fakaasiga tena ne lavea ne ia.”

¹⁷Ne vau Kapilielu, tu mai i oku tafa, ka ko au ko oko eiloa i toku mataku, tena siga ei au ki lalo i te laukele. Muna a Kapilielu ki a au, “Te tama a te tagata, e tau koe o malamalama i te fakaasiga tena e fakauiga ki mea ka tupu i te gataga o te lalolagi.”

¹⁸I te taimi ne faipati ei a ia, ka ko au ko matapo i lalo i te laukele. Ne puke mai a ia ki a au, fakatu aka ne ia a au,

¹⁹kae fai mai penei, “Ko fakaasi atu nei ne au a te mea ka tupu mafai ko kaitaua a te Atua. A te fakaasiga e fakauiga ki te taimi o te gataga.

²⁰“A te mamoe tagata tela ne lavea ne koe, tela e lua ona sau, ko te ava malo kona o Metai mo Pelesia.

²¹A te kouti ko te malo o Eleni, ka ko te sau takutakua o ia i te va o ona mata ko te tupu muamua.

²²A sau e fa kola ne tupu aka i te fātiga o te sau muamua, ko malo e fa kona kola ka vaevae ki ei te malo lasi tenei, tela la, ka se malosi e pela mo te malo muamua.

²³“Kafai ko pili mai a te gataga o malo kona me ko oko eiloa i te amio masei, kae ka tu mai se tupu loto makeke, kae saua kae faitogafiti.

²⁴Ka gasolo a ia o malosi, kae e se pogai mai i a ia a tena malosi. Ka ofa fakamasei ne ia a malo, kae e manumalo faeloa i ana mea e fai. Ka ta fakamasei ne ia a tagata malosi, pela foki a tino o te Atua.

²⁵Ka manumalo a ia i ana auala fakatogafiti me i a ia e faitogafiti. Ka fakamatamata a ia i tena malosi, kae 'ta fakamasei ne ia a tino e tokouke kae seai se fakailoaga e fai ki ei. Ka fakatogafiti foki ne ia a te Tupu takutakua eiloa, kae ka ta fakamasei a ia i se malosi e se se malosi faka‐te‐lalolagi.

²⁶A te fakaasiga tenei e uiga ki te toe faiga o taulaga i taeao mo afiafi, tenei ko oti ne fakamalamalama atu ki a koe, e taunu eiloa. Kae taumafai ke funa i te taimi tenei, me e tai leva eiloa kae fatoa taunu.”

²⁷Au ko oko eiloa i te fanoanoa, kae ne masaki au i ne nai aso. Ne tu aka au, foki atu ei au o fai te galuega tela ne tofi mai ne te tupu ke fai ne au, ka ko au ko 'numi valevale toku mafaufau i te fakaasiga ko se mafai o malamalama au i ei.