Read Te Tusi Tapu I Te Gana Tuvalu Lomiga Lua TANIELU 9 Bible Online

TANIELU 9 - Te Tusi Tapu I Te Gana Tuvalu Lomiga Lua bible

TANIELU 9

¹Ko Taliu, te tagata Metai, te tama tagata a Asuelu, e tupu nei i te malo o Papelonia.

² I te tausaga muamua o tena nofoaiga, ka ko au e tauloto i tusitusiga tapu kae mafaufau ki te fitusefulu tausaga, te taimi ka ofa fakamasei ei a te fa'kai o Ielusalema, e pela eiloa mo te folafolaga a te Aliki ki a Ielemia.

³Ne talo malosi eiloa au ki te Aliki te Atua, o fakamolemole ki ei, kae fakalikiliki i feitu faka‐tapuakiga, kae pei ki gatu lautaga, kae sagasaga i te pefu.

⁴Ne talo atu au ki te Aliki toku Atua o fakatoese a agasala a oku tino. Muna a aku penei, “Te Aliki te Atua, a koe ko te Atua e sili kae fakaaloalogina ne matou. A koe e fakamaoni ki tau feagaiga, kae alofa ki a latou kola e alofa ki a koe kae fakalogo ki au fakatonuga.

⁵“A matou ko oti ne agasala, a matou ne tino fai amioga masei, ne tino fai mea 'se. Ko oti ne teke ne matou a mea ne fakatonu mai ne koe ke fai ne matou, kae fulitua matou ki mea tonu kola ne fakaasi mai ne koe ki a matou.

⁶A matou ne seki fakalogo ki au tavini ko pelofeta, ko latou e faipati sale i tou igoa ki omotou tupu, mo takitaki, mo tupuga o matou, pela foki ki te malo katoa o matou.

⁷Te Aliki, e fai faeloa ne koe a te mea tonu, ka ko matou e aumai faeloa ne matou te masiasi ki a matou. E tonu te mau tena ki a matou katoa konei e nofo i Iuta mo Ielusalema, pela foki a tino Isalaelu katoa kola ne fakasalalau ne koe ki malo kesekese, me ne seki fakamaoni atu ki a koe.

⁸Te Aliki, a omotou tupu, omotou takitaki, mo omotou tupuga ne fai ne latou a uiga se 'lei ki a koe.

⁹E ui eiloa matou ne teke atu ki a koe, ka ko koe e alofa eiloa kae loto fakamagalo.

¹⁰Te Aliki te motou Atua, a matou ne seki fakalogo ki a koe i te taimi ne fai mai ei koe ke tautali matou i tulafono kola ne aumai ne koe ki au tavini ko pelofeta mo matou.

¹¹Ne ofa ne Isalaelu katoa au tulafono kae ita ma fakalogo ki au muna. Ne agasala matou ki a koe, tena ne fakamalaia ei ne koe matou ki muna fakamalaia kola e tusi i loto i te Tulafono a Mose, tau tavini.

¹²Ne fai eiloa ne koe ki a matou a mea kola ne folafola ne koe ke fai ki a matou mo omotou takitaki. Ne fakasala ne koe Ielusalema i se fakasalaga e silia atu te masei i lo fakasalaga o nisi fa'kai o te lalolagi.

¹³Ne aumai ne koe ki a matou a fakasalaga katoa kola e tusi i te Tulafono a Mose. Te Aliki te motou Atua, ke oko mai foki eiloa ki te taimi nei, e seki taumafai foki eiloa matou o fakafiafia koe, o fuli keatea mai omotou agasala kae tautali i tau muna tonu.

¹⁴Te Aliki te motou Atua, ne fakasala ne koe matou, me i a koe se Atua e fai mea tonu ka ko matou e seki fakalogo ki a koe.

¹⁵“Te Aliki te motou Atua, ne fakaasi ne koe tou mana i te taimi ne aumai ei ne koe tou fenua mai Aikupito; a tou mana tenei eiloa koi manatua nei. A matou ne agasala; a matou ne fai mea se tonu.

¹⁶Ne puipui ne koe matou i taimi ko teka, tela la, na fakagata tou kaitaua ki Ielusalema, tou fa'kai mo tou mauga tapu.[9]A tino katoa i fenua pili mai e kilo mo te fakatauemu ki Ielusalema pela foki ki ou tino, e tusa eiloa mo agasala a matou ne fai mo amioga masei a omotou tupuga ne fai.

¹⁷Te Atua, fakalogo mai ki taku talo mo taku fakamolemole. Toe fakatu aka tou Faletapu tela ne ofa; toe fakatu aka ke iloa ne tino i a koe ko te Atua.

¹⁸Te Atua, fakalogo mai ki a matou; kilo mai ki a matou ke lavea ne koe a te fakalavelave tenei ko tupu ki a matou, mo te puapuaga tenei ko oko ki te fa'kai o koe. A matou e talo atu nei ki a koe, e se fai pela ko matou e amiotonu, kae e iloa ne matou i a koe se Atua e alofa.

¹⁹Te Aliki, fakalogo mai ki a matou. Te Aliki, fakamagalo mai matou. Te Aliki, fakalogo mai ki te motou talo kae fesoasoani mai! Sa fakatuai, ko te mea ke iloa ne tino katoa i a koe ko te Atua! A te fa'kai tenei mo tino konei, e o koe katoa.”

²⁰Ne talo eiloa au ke fakamagalo aku agasala mo agasala a toku fenua ko Isalaelu, kae fakamolemole foki au ki te Aliki toku Atua ke toe fakatu aka tena Faletapu malu.

²¹ I te taimi koi talo ei au, kae matea ne au a Kapilielu, tela ne lavea foki ne au i te fakaasiga muamua, e eva mai ki te koga e tu ei au. A te taimi tena ko te taimi o te taulaga o te afiafi.

²²Muna a Kapilielu penei, “Tanielu, au ne vau o fesoasoani ki a koe o fakamalamalama ki a koe te tali o tau talo.

²³I te taimi ne fakamolemole ei koe ki te Atua, kae ne tali atu eiloa ki a koe. E alofa eiloa a ia ki a koe, tena te mea ko vau ei au o fakaasi atu te tali a te Atua ki tau talo. Fakalogo fakalei mai ke fakamatala atu ne au a te fakaasiga.

²⁴“E fitusefulu tausaga fatele ki te fitu, tena te taimi ko oti ne fakamoe ne te Atua e fakasao ei ou tino mo te otou fa'kai 'malu mai te agasala mo te masei. Ka fakamagalo otou agasala, ka ko te fakamasinoga tonu e seai se gata mai ka fakatumau, ko te mea ke taunu a te fakaasiga mo te valoaga, mo te Faletapu malu [10] ka toe fakatapu.

²⁵Ke manatua ne koe te mea tenei kae ke malamalama foki koe i ei: E tusa mo te fitusefulu tausaga fatele ki te fitu mai te taimi o te tukumaiga o te fakatonuga ke toe faite Ielusalema ke oko ki te taimi e vau ei a te takitaki filifilia a te Atua. A Ielusalema ka toe faite, ona auala mo ona olo malosi, kae ka tu i tausaga e onosefulu lua fatele ki te fitu; a te taimi tena se taimi o fakalavelave.

²⁶[11] I te fakaotiga o te taimi tena, a te takitaki filifilia a te Atua ka tamate i se auala se tonu. A te fa'kai mo te Faletapu ka ofa ne te kautau a te takitaki malosi. A te gataga ka oko mai e pela me se lofiaga, e aumai ei a taua mo fakamaseiga o mea, kola ne fakatoka ne te Atua.

²⁷ A te takitaki tena ka fai sena feagaiga mo tino i tausaga e fitu, kae kafai ko palele te afa o te taimi tena, ko fakagata ei ne ia a te faigā taulaga. A te Mea Fakamataku[12] ka tuku i luga i te toe koga maluga eiloa o te Faletapu, kae ka tumau eiloa i kona ke oko ki te taimi e tamate ei ne te Atua a te tagata tena ne tuku ne ia te mea tena ki kona.”