Read Te Tusi Tapu I Te Gana Tuvalu Lomiga Lua HOSEA 1 Bible Online

HOSEA 1 - Te Tusi Tapu I Te Gana Tuvalu Lomiga Lua bible

HOSEA 1

¹ Tenei te fekau tela ne tuku mai ne te Aliki ki a Hosea, te tama a Peeli, i aso ne tupu ei a Usia, Iotama, Aasa mo Hesekia i Iuta, ka ko Ielopoamo, te tama a Ieoasa, e tupu i Isalaelu.

²I te kamataga o faipati a te Aliki ki Isalaelu e alatu i a Hosea, muna a ia ki a Hosea, “Fano o fai sau avaga; a tau avaga ka se fakamaoni, ka ko au tama'liki ka pau eiloa mo ia.[1] E pena toku fenua me ko oti ne tiakina ne latou a au, ka ko se fakamaoni mai foki ki a au.”

³Tena ne avaga atu ei a Hosea ki te fafine e igoa ki a Komeli, te tama a Tipelaima. I te fanauga o te la tama muamua,

⁴ ne faipati mai te Aliki ki a Hosea penei, “Fakaigoa a te tamaliki tagata tena ko ‘Ieseleelu’, me ko se leva nei kae ka fakasala ne au a te tupu o Isalaelu ona ko te agasala a tena tupuna ko Ieu, i te tatinoga i Ieseleelu.[2]Ka fakagata ne au a te fakasologa o tupu i te gafa o Ieu.[3]

⁵I te taimi tena, ka fakatakavale ne au a te kautau a Isalaelu, i te Vanu o Ieseleelu.”

⁶Ne toe fanau a Komeli, se fafine tena tama. Muna a te Aliki ki a Hosea, “Fakaigoa te tamaliki fafine a koe tena ki a ‘Se Alofagia’, me ka se toe fakaasi toku alofa ki tino Isalaelu io me fakamagalo latou.

⁷Ka fakaasi fua toku alofa ki tino Iutaia. Ko au, te Aliki te lotou Atua, ka fakasao ne au latou, e se ki te taua, io me ki pelu mo kausana mo matasana io me ki solofanua mo tino e sopo i ei.”

⁸I te taimi ko vae ei te tamaliki mo te u, ne toe faitama Komeli kae fanau mai se tamaliki tagata.

⁹Muna a te Aliki ki a Hosea, “Fakaigoa a ia ‘Se Ko Oku Tino’, me i tino Isalaelu e se ko oku tino, ka ko au e se ko te lotou Atua.”

¹⁰ A tino Isalaelu ka se maua o lau i te tokouke, e pela mo one o te tai. Muna a te Aliki ki a latou, “A koutou se ko oku tino,” kae ka oko mai eiloa te aso tela ka fai atu a ia ki a latou penei, “A koutou ko tamaliki a te Atua ola!”

¹¹A tino Iuta mo Isalaelu ka toe soko tasi. Ka filifili ne latou se takitaki e tokotasi mō latou, kae ka toe 'tupu ake latou mo te manuia i te lotou fenua.[4] E tonu, te aso o Ieseleelu se aso lasi eiloa!