Read Te Tusi Tapu I Te Gana Tuvalu Lomiga Lua HOSEA 10 Bible Online

HOSEA 10 - Te Tusi Tapu I Te Gana Tuvalu Lomiga Lua bible

HOSEA 10

¹A tino Isalaelu e pela me se vine tela ne pikitaki sale i fuaga vine. Ko te lasi o te maumea o latou, ko te uke foki o fata-fai-taulaga a latou e faite. Ko te lasi o te mea e fua mai i te lotou laukele, ka sili foki ei te gali o pou fatu kola e tapuaki ki ei latou.

²A tino kola e masani o amio pelo e tau nei o fakapuapuaga e tusa mo olotou agasala. Ka ofa ne te Atua a olotou fata-fai-taulaga kae fakama'sei olotou fatu tapuaki.

³Ko se leva nei kae ka fai aka a tino konei penei, “E seai se motou tupu, me i a matou e se ma'taku ki te Aliki. Kae se a foki eiloa te mea a te tupu e mafai o fai mō matou?”

⁴E fai'pati latou ki pati se aogā kae fai tautoga pelo mo feagaiga e seai ne aogā. A te fai mea tonu ko fuli ki te amio pelo, tela e ola ake pela me ne mouku poisini i loto i se fatoaga tela ko oti ne fakamalū.

⁵A tino kola e nofo i te fa'kai o Samalia ko ma'taku, kae ka tagi fanoanoa latou me ka galo a te pulumakau aulo tela i Peteli. [20] Ko latou mo faitaulaga kola e tavini ki te tupua tena ka tagi me ko galo atu. Ka tagi paka'laga latou manafai ko fakateka keatea te aulo gali o ia.

⁶A te tupua tena ka ave ki Asulia mo fai te meaalofa ki te tupu sili. A Isalaelu ka fakamasiasi kae fakamavale me ne tau'tali ki te fakatonuga 'se.

⁷A tena tupu ka ave keatea, e pela me se matifiga o te lakau e tapea i luga i te vai.

⁸ A koga tapuaki i koga maluga i Avene, kola e tapuaki saale ei a tino Isalaelu ki tupua, ka fakama'sei. A lakau makai'kai mo mouku ka ola aka, ko ma'luga atu i fata-fai-taulaga. Ka ka'laga atu a tino penei ki mauga, “Fakamuni aka matou!”

⁹ Muna a te Aliki, “A tino Isalaelu e seki fakagata eiloa te lotou fai agasala talu mai te taimi ne agasala mai ei ki a au i Kipea. Tela la, ko i Kipea foki ka oko atu ei ki a latou te taua.

¹⁰Ka faitaua au[21] ki tino agasala kona kae fakasala a latou. Ka kau fakatasi a malo o teke atu a latou, kae ka fakasalagina eiloa latou e tusa mo te uke o agasala a latou.

¹¹“I aso mua, a Isalaelu ne pela eiloa me se tama pulumakau ne akoako faka'lei, tela e toka kae fiafia o galue i te fakamāga o fuaga o saito. Kae ne mafaufau aka au o sai se lakau i tena ua gali kae sai ne uka ki tena ua e fakatoka ei a ia mo galuega tai mafa atu. Ne fai ne au a Iuta ke toso te mea fakamalū laukele, ka ko Isalaelu ke taki ne ia te mea tela e tofatofa ei a fakaputuga one.

¹² Muna a aku penei, ‘Fakamalū ne laukele fou ma koutou, toki ki ei te amiotonu kae ka fua mai ki te manuia mō koutou e auala mai i tapuakiga a koutou ki a au. Ko oko nei ki te taimi e tau ei mo koutou o fuli mai ki a au, te otou Aliki, kae ka vau au o ligi atu a fakamanuiaga ki luga i a koutou.’

¹³Kae tela la, ne toki ne koutou te masei kae tau foki eiloa ne koutou a ona fuataga. Ko oti ne oko atu ki a koutou te fakalavelave tela ne mafua mai i otou amioga 'loi. “A koutou ne fakalagolago ki otou kaliota,[22] mo te tokouke o sotia a koutou,

¹⁴tela la, ka oko atu ei ki a koutou te taua kae ka fakamasei ei otou olo katoa. Ka pela eiloa mo te aso tela ne fakamasei ei ne te Tupu ko Salemona a te fa'kai o Petapelu i te tauaga a latou, tela ne mate ei a matua mo olotou tama me ne taotaomaki valevale.

¹⁵Tena te mea ka tupu ki a koutou, tino o Peteli, e tusa mo te mea tafasili i te masei tela ko oti ne fai ne koutou. I te taimi eiloa e kamata ei te taua, ko te tupu eiloa o Isalaelu ka mate.”