Read Te Tusi Tapu I Te Gana Tuvalu Lomiga Lua HOSEA 11 Bible Online

HOSEA 11 - Te Tusi Tapu I Te Gana Tuvalu Lomiga Lua bible

HOSEA 11

¹ Muna a te Aliki, “I te taimi koi foniki ei a Isalaelu, au ne alofa ki ei. Kae ne aumai ne au a ia keatea mai Aikupito mo fai taku tama.[23]

²Kae ko te uke o taimi e kalaga ei au ki a ia, Ko te uke foki tena o taimi e fulitua mai ei latou ki a au. A toku fenua e fai taulaga ki a Paala; E sunu foki ne latou a taulaga manogi ki tupua.

³Kae tela la, ko au eiloa ne akoako ne au a Isalaelu ke iloa ne ia o sasale. Ne avake ne au a toku fenua ki oku lima, [24] Kae se talia lele eiloa ne latou me ko au ne tausi ne au latou.

⁴Ne sai mai ne au latou ki a au mo te alofa. Ne puke aka ne au a latou kae sai mai ki toku kalafau; Ne punou ifo eiloa au o fagai latou.

⁵“Ne ita latou ma foki mai ki a au, tela la, e tau mo latou o foki ki Aikupito, kae ka pule latou ne Asulia.

⁶A te taua ka oko mai ki olotou fa'kai kae ka maofa ei a pui o olotou fa'kai. Ka mate valevale oku tino me ne fai ne latou te mea e manatu latou me e lei.

⁷Ne taumafai eiloa latou o fulitua mai ki a au. Ka tagi latou i te mafa o te amoga tela e amo ne latou, kae ka seai eiloa se tino e sau ne ia keatea mai i a latou.

⁸ “Isalaelu, e tiakina pefea ne au a koe? E mafai pefea ne au o tiakina koe? E a, e mafai eiloa ne au o ta koe e pela mo te taga ne au a Atama, Io me fai koe e pela mo aku faiga ki a Sepoima? E se mafai ne toku loto o fai se vaega mea pena! A toku alofa mo koe ko to lasi.

⁹Ka se fakasala ne au a koe i toku kaitaua; Ka se toe ta fakamasei ne au a Isalaelu, Me i a au se Atua kae se se tino. A au, te Tasi Tapu, e fakatasi mo koutou. Ka se fanatu au ki a koutou i toku kaitaua.

¹⁰“A toku fenua ka tau'tali mai i a au i te taimi e gulu ei au ki olotou fili e pela me se leona. Ka fakavave mai latou ki a au mai te togala.

¹¹Ka o'mai latou mai Aikupito e pela eiloa te ma'kini mo manu eva; kae mai Asulia e pela me ne lupe. Ka toe faka'foki mai ne au a latou ki te olotou fenua. Ko au, te Aliki, ne faipati atu.”

¹²Muna a te Aliki, “Au ko fai valevale ne tino Isalaelu ki amioga loi mo uiga fakaloiloi, ka ko tino Iuta koi tumau eiloa te teke mai ki a au, te Atua tapu kae fakamaoni.