Read Te Tusi Tapu I Te Gana Tuvalu Lomiga Lua HOSEA 12 Bible Online

HOSEA 12 - Te Tusi Tapu I Te Gana Tuvalu Lomiga Lua bible

HOSEA 12

¹A mea katoa e fai ne tino Isalaelu mai te taeao ke oko ki te po e seai se aoga, kae fakamasei mea. A amioga fakaloiloi mo fakasauaga ko gasolo eiloa o fai sale ne latou. E fai feagaiga latou mo Asulia kae fai mea togi mo Aikupito.”

²E isi se molimau a te Aliki ki te se lei o Iuta, ka fakasala foki ne ia a Isalaelu e tusa mo amioga a ona tino. Ka taui ne ia ki a latou e tusa mo amioga a latou ne fai.

³ A te lotou tupuga ko Iakopo ne fekiki mo tena taina masaga ko Esau ka koi nofo i te tinae o te la matua; i te taimi ne matua ei a Iakopo, ne tafiti mo te Atua,

⁴ ne taua mo te agelu kae ne manumalo a ia. Ne tagi a ia kae fakatagi ke avatu se fakamanuiaga. Kae i Peteli, ne vau te Atua ki a Iakopo, te tou tupuga, kae fai pati mo ia.[25]

⁵A ia ko te Aliki te Atua Tafasili i te Malosi — te Aliki, ko te igoa tena e tau o tapuaki ki ei a tino.

⁶Tela la, i te taimi nei, koutou te gafa o Iakopo, talitonu ki te otou Atua kae foki atu ki a ia. Ke fakamaoni koutou kae fai te mea tonu, kae fakatalitali mo te loto kufaki ki te taimi e fai ei te galuega a te Atua.

⁷Muna a te Aliki, “A tino Isalaelu ko oko eiloa i te se fakamaoni e pela mo tino Kanana; e fiafia latou o fakaloi'loi a tino kola e o'mai o fakatau i a latou, ki fua 'se.

⁸Muna a latou, ‘Matou ko mau mea. Ka maua te manuia o matou. Kae e seai se tino e mafai ne ia o 'lou i a matou ne maumea i faiga se tonu.’

⁹ Ka ko Au, te Aliki te otou Atua tela ne taki ne ia koutou keatea mai Aikupito, ka toe faka'nofo ne au koutou i faleie, e pela mo te taimi tela ne vau ei au ki a koutou i te koga lavaki.

¹⁰“Au ne faipati ki pelofeta kae tuku atu foki ki a latou a fakaasiga e uke. Ne tuku atu foki ne au a polopolokiga ki toku fenua e auala i pelofeta.

¹¹Kae ui eiloa i te feitu tena, a tupua e tapuakigina eiloa i Kileata, ka ko latou kola e tapuaki ki ei ka mate. A pulumakau tagata e ta mo fai taulaga i Kilikala, ka ko fata-fai-taulaga i kona ka fai pela me ne fakaputuga fatu i koga ateatea.”

¹² A te tou tupuna ko Iakopo ne sola ki Mesopotamia i se feitu 'lei. I kona, ne galue a ia mō sua tino kae tausi foki ana mamoe ko te mea ke maua sena avaga.

¹³ Ne uga ne te Aliki se pelofeta ke fakasao a tino Isalaelu mai te fakapologa i Aikupito, kae tausi faka'lei foki latou.

¹⁴Ko oti ne fai ne tino Isalaelu a te Aliki ke kaitaua; e tau latou o tamate, e tusa eiloa mo agasala a latou ne fai. Ka fakasala latou ne te Aliki, i a ia ko masiasi eiloa i olotou mea ne fai.