Read Te Tusi Tapu I Te Gana Tuvalu Lomiga Lua HOSEA 13 Bible Online

HOSEA 13 - Te Tusi Tapu I Te Gana Tuvalu Lomiga Lua bible

HOSEA 13

¹I aso mua, kafai e faipati te matakaiga o Efalaima, a nisi matakaiga o Isalaelu e ma'taku; e fakasili ne latou a Efalaima. Ka ko ona tino e tapuaki ki a Paala, kae i te feitu tena ka mate ei latou.

²E tumau eiloa te fai agasala o latou, ne faite ne latou a fakatusa ki fiti o tapuaki ki ei, ne tupua e faite ki siliva; ko te mafaufau o te tino e fuafua ei te ata, ka ko ona lima e faite ei te foitino. Oti aka, fai ei olotou pati penei, “Ofo atu ne taulaga ki a latou!” E mafai pefea ne tino o sogi ki tupua kona — tupua e foliga ki pulumakau tagata!

³Tela la, a tino konei ka galo e pela mo te sau i te vaveao, e pela mo te sau tela e matafi atu i te taeao. Ka pela latou me ne kau saito e agina mai i te koga faka'ma saito, e pela me se au e fanake i te fanela.

⁴Muna a te Aliki, “Au ko te Aliki te otou Atua tela ne aumai ne ia koutou keatea mai Aikupito. E seai se Atua o koutou, na ko au eiloa. Ko au tokotasi ko te otou fakaola.

⁵ Ne tausi faka'lei ne au koutou i se fenua lavaki kae seai ne vai i ei.

⁶Kae i te taimi ne ulu atu ei koutou ki loto i te fenua gali tena, ne ma'kona koutou kae ma'lie, ko koutou eiloa ko gasolo o fakamata'mata kae se manatua a au.

⁷Tela la, ka ta ne au koutou e pela me 'ta ne se leona. Ka takatokato au e pela me se lepoti, o fakatalitali i te auala tela e omai ei koutou.

⁸Au ka tafuke atu o ta koutou e pela me se ulosa tela ko galo ana tama, kae ka saesae ne au koutou. Ka kai ne au koutou e pela me se leona, i te koga eiloa tela ne maua ei ne au koutou, kae ka saesae fakalikiliki koutou e pela me se manu vao.

⁹“Ka ta fakapalele ne au koutou, tino Isalaelu! Ko oi ka fesoasoani ki a koutou?[26]

¹⁰ E ma'nako koutou ki se tupu mo ne takitaki, kae e mafai pefea ne latou o fakasao te malo?

¹¹ I toku ita ne tuku atu ei ne au a tupu, kae i toku kaitaua ne ave ei ne au keatea.

¹²“A te agasala a Isalaelu e fakamau nei ki se tusi, ka ko tusi kona a fakamau ki ei kola e teu fakalei i se koga malu lei.

¹³E isi se avanoaga o Isalaelu ke ola, kae ko to valea e se fia puke ne ia — e pela me se tamaliki tela ka fanau, kae ita ma vau ki tua mo te tinae.

¹⁴ Ka se fakasao ne au a tino konei mai te fenua o tino mate io me fakaola latou mai te malosi o te mate. Te mate, fakaoko mai[27] ou puapuaga! Te fenua o tino mate, aumai tou fakamataku! Au ka se toe alofa ki te fenua tenei.

¹⁵E ui eiloa a Isalaelu e olaola lei e pela me ne mouku,[28] ka fakaagi ne au te matagi vela mai te saegala tela e vau mai te koga lavaki, kae ka faka'masa ne ia a vaitafe foniki mo vaikeli a latou. Ka ave i te matagi tena a mea katoa kola e taua ki a latou.

¹⁶A Samalia e tau eiloa o fakasala me ne teke mai ki a au. A ona tino ka mate i te taua; a pepe ka taotao ke pala'pala i te laukele, ka ko fafine faitama ka fafaī olotou tinae.”