Read Te Tusi Tapu I Te Gana Tuvalu Lomiga Lua HOSEA 3 Bible Online

HOSEA 3 - Te Tusi Tapu I Te Gana Tuvalu Lomiga Lua bible

HOSEA 3

¹Muna a te Aliki ki a au, “Toe fano [8] o fakaasi atu tou alofa ki te fafine tela e moe mo tena fiafaiga. E tau mo koe o alofa ki a ia e pela eiloa mo au e alofa ki Isalaelu, e tusa eiloa me fuli atu latou ki nisi atua kae fiafia o avatu a vine ke fai mo taulaga ki tupua.”[9]

²Ne togi mai ne au a ia ki te sefululima tupe siliva kae selau limasefulu kilokalame o kalite.

³Au ne fai ki a ia ke fakatalitali mai ki a au i se taimi tai leva, kae ke mo a ia e mulilua; kae i te taimi tenei, ka fakatalitali foki au ki a ia.

⁴E pena foki a tino Isalaelu, ka seai se lotou tupu io me se takitaki i se taimi leva, ka seai foki ne taulaga io me ne fatu tapuaki a latou, ka seai foki ne tupua io me ne fakatusa mo fai olotou tapuakiga.

⁵Kae e oko mai eiloa te taimi tela ka toe fuli ei a tino Isalaelu ki te Aliki te lotou Atua, e pela foki te tupu o latou tela ka vau i te gafa o Tavita. Tena, ka ma'taku ei latou ki te Aliki kae ka maua ne latou a meaalofa mai i a ia.