Read Te Tusi Tapu I Te Gana Tuvalu Lomiga Lua HOSEA 9 Bible Online

HOSEA 9 - Te Tusi Tapu I Te Gana Tuvalu Lomiga Lua bible

HOSEA 9

¹Tino Isalaelu, sa toe fakamanatugina a otou kaiga fiafia e pela mo tino fapau'pau. Ko oti koutou ne fulitua ki te otou Atua kae se fakamaoni ki a ia. Ko oti ne tuku atu otou foitino e pela me ne fafine tali tagata ki te atua ko Paala kae fiafia ki saito kola ne mafaufau koutou me ne aumai i a ia mo togi koutou!

²Kae ko pili nei ko se lava ne saito ma koutou, mo sinu olive pela foki mo uaina.

³A tino Isalaelu ka se toe nofo nei i te fenua o te Aliki, kae ka faka'foki ki Aikupito kae ka toe kai ki meakai kola e tapu ma kai ki ei[18] i Asulia.

⁴I fenua fakaatea kona, ka se toe mafai ne latou o ofo atu ne taulaga uaina ki te Aliki, io me fai olotou taulaga ki a ia. So se tino e kai ki olotou meakai ka lailai, e pela mo meakai kola e kai ne tino i taimi e tanu ei a tino mate. E fakaaoga fua ne latou mo fakama'kona latou; kae e seai eiloa se mea e ave mo fai taulaga ki te Faletapu o te Aliki.

⁵Kae kafai e oko mai te taimi e fai ei a kaiga fiafia e fakaaloalo ei te Aliki, ne a la olotou mea ka fai i te taimi tena?

⁶Kafai e oko mai te fakalavelave kae ko salalau valevale a tino, ka fakapotopoto latou ne tino Aikupito — fakapotopoto ke tanu i Mefisi! A olotou koloa siliva mo koga kola ne tu sale ei olotou fale, ka fonu i mouku mo lakau makai'kai.

⁷ A te taimi o fakasalaga ko oko mai, te taimi tela ka fakasala ei a tino e tusa mo olotou mea ne fai. Kafai eiloa e tupu te mea tena, ko iloa ei ne tino Isalaelu! Muna a koutou, “A te pelofeta nei se tino valea fua. A te tagata o te Atua tenei e fakavalevale.” A koutou e ita malosi ki a au me i otou agasala ko oko eiloa i te uke.

⁸Au ne uga mai ne te Atua ke fai mo pelofeta o polopoloki tena fenua ko Isalaelu. Kae ui eiloa i te mea tena, e taumafai eiloa latou o malei au e pela me se manu eva, i so se koga e fano ei au. I te fenua tonu eiloa o te Atua, a tino e fai fili ki ana pelofeta.

⁹ Ko se maua eiloa o fai te masei o latou i olotou amioga e fai, e pela eiloa mo te lotou nofoga i Kipea.[19] Ka masaua ne te Atua olotou agasala kae fakasala latou e tusa eiloa mo olotou agasala ne fai.

¹⁰ Muna a te Aliki, “I te taimi ne fatoa maua ei ne au a Isalaelu, e pela eiloa me ne vine e maua atu e ola i se koga lavaki. I te mateaga muamua eiloa ne au a otou tupuga, e pela eiloa me ko matea atu ne au te fua muamua o mati ko sulu i te taukai mati. Kae i te taimi ne oko atu ei latou ki te Mauga o Peolo, ne kamata ei latou o tapuaki ki a Paala, kae se mea vave eiloa latou o fakatakalialiagina e pela mo atua e fia'fia latou ki ei.

¹¹A te malu o Isalaelu ka eva keatea e pela me se manu eva, kae ka se toe ai ne tamaliki a latou e maua, se toe ai ne fafine e faitama, se toe ai foki ne tamaliki e fanau mai.

¹²Kae kafai e isi ne tamaliki a latou, ka ave keatea ne au, e seai se tamaliki e fakaola. I te taimi e tiakina ei ne au a tino konei, ka 'tupu fakalavelave faiga'ta ki a latou.”

¹³Te Aliki, e lavea ne au olotou tamaliki e afuli o tamate.

¹⁴Se a te mea ka fakatagi atu ei au ke fai ne koe ki tino konei? Fai aka olotou fafine ke se faitama! Ke mo a foki latou e mafai o tausi olotou pepe!

¹⁵Muna a te Aliki, “A amioga ma'sei katoa a latou ne kamata i Kilikala. I kona foki ne kamata ei au o kaitaua ki a latou. Ka afuli ne au a latou keatea mai toku fenua e tusa mo amioga masei a latou ne fai. Ka se toe alofa lele eiloa a au ki a latou; a olotou takitaki katoa ko oti ne teke mai ki a au.

¹⁶A tino Isalaelu e pela me se lakau tela ko pakupaku ona aka, kae ko seai foki ne ana fuaga. Ka seai ne olotou tamaliki, kae kafai foki la e isi, ka tamate ne au a tamaliki kola e fagasele i olotou loto.”

¹⁷A te Atua tela e tavini au ki ei, ka teke ne ia tena fenua, me ne seki faka'logo ki a ia. Ka fai latou mo malo nofo solo i te lalolagi.