Read Te Tusi Tapu I Te Gana Tuvalu Lomiga Lua IOELU 2 Bible Online

IOELU 2 - Te Tusi Tapu I Te Gana Tuvalu Lomiga Lua bible

IOELU 2

¹Ili te pu; fakatagi aka te pu i Siona, Te mauga tapu o te Atua.[1] Pole'pole, koutou tino o Iuta! A te Aso o te Aliki ko pili o oko mai.

²A te aso tena ka pouli, kae se aso uli patoitoi kae kaumanā. A lafu sē akelise ko olo ki mua e pela me se pouliga i luga i mauga. E seki tupu eiloa se vaega mea penei i aso mua, Kae ka se toe ai foki i aso fakamuli.

³E kai ne latou a lakau e pela me ne ka i se afi. I olotou mua, a te laukele e pela eiloa mo te Fatoaga i Etena, Kae i olotou tua, ko pela me se toafa. E seai eiloa se mea e sao mai ia latou.

⁴ E foliga latou pela me ne solofanua; E tele foki pela me ne solofanua tau.

⁵Ka eva atu latou ki taulu o mauga, Kae gaii pela me ne kaliota; E pakeke pela me ne mouku paku'paku i loto i se afi. Ko fakalaina latou, e pela me se kautau lasi ko toka mō se taua.

⁶A tino katoa e ma'taku manafai e 'sae aka a sē akelise; A mata o tino katoa ko lau'tea eiloa.

⁷A sē akelise e taua e pela me ne tino tau, E 'kake i pui e pela me ne sotia. E olo faeloa ki mua, E se mafai eiloa o 'fuli ki se koga,

⁸Io me pono sua sē akelise ne sua sē akelise. E fakatau 'tele latou i loto i pui a te fili, Kae seai eiloa se mea e mafai o taofi latou.

⁹E 'tele atu latou ki te fa'kai; Kae tele i luga i pui, E kake atu latou ki luga i fale kae ulu i loto i famalama E pela me ne tino kai'soa.

¹⁰ E galulu te lalolagi kae polepole te lagi manafai e olo atu latou ki mua. A te la mo te masina ko gasolo o pouli, Ka ko fetu ko se toe maina.

¹¹ A te Aliki ko kalaga mai ana fakatonuga ki tena kautau. A potukau kola e faka'logo ki a ia e uke kae ma'losi. Ko oko eiloa i te fakamataku o te aso o te Aliki! Ko oi te tino ka sao i ei?

¹²Muna a te Aliki, “Na sala'mo nei koutou kae toe 'foki mai ki a au, I te fakalikiliki mo te 'tagi fanoanoa.

¹³Ke fakaasi mai ne tou loto mafatia a tou fanoanoa; Me e se lava manafai e saesae ou gatu.” Foki mai ki te Aliki te otou Atua. E fonu a ia i te alofa mo te alofa 'nau; E loto kufaki a ia kae tausi ki tena tautoga; E toka faeloa a ia o fakamagalo kae se o fakasala.

¹⁴E se taumate ka 'fuli mafaufauga o te Aliki te otou Atua Kae fakamanuia atu koutou o avatu lakau kaina e uke. Tena, ka mafai ei ne koutou o ofo atu ki a ia ne saito mo uaina.

¹⁵Fakatagi te pu i luga o te Mauga o Siona; Tuku atu fakatonuga ke fai se fakalikilikiga, Kae valo atu ke fai se maopoopoga!

¹⁶Fakamaopoopo aka a tino katoa; Fakatoka aka latou mo se maopoopoga tapu; Puke mai a tino ma'tua; Fakamaopoopo mai a tama'liki pela foki eiloa mo pepe fo'niki. Ke oko foki eiloa ki tauavaga fatoa a'vaga, Ke tiaki olotou potu kae o'mai ki te maopoopoga.

¹⁷A faitaulaga kola e tavini atu ki te Aliki i te va o te fata-fai-taulaga mo te mataloa o te Faletapu, E tau o tagi kae talo penei: “Te Aliki, alofa mai ki ou tino. Sa faigina a nisi malo ke takalialia mai ki a matou, Kae o'mai o fakalili matou o fesili mai penei, ‘Tefea te otou Atua?’ ”

¹⁸Tena, ko toe saga tonu atu ei te Aliki ki tena fenua; O toe alofa atu ki ona tino.

¹⁹Ne tali atu a ia ki a latou penei: “Ka avatu nei ne au ki a koutou, A saito mo uaina mo sinu olive, Kae ka ma'lie koutou. Ka se toe takalia'lia atu a nisi malo ki a koutou.

²⁰Ka ave keatea ne au te lafu sē akelise kola ne o'mai mai matu, Kae ka afuli ne au nisi ki te toafa. A te potukau tafa ki mua o latou ka atuli ki te Tai Mate, Ka ko te potukau ki tua e atuli ki te Tai Metitilani. A olotou foitino 'mate ka manogi ma'sei. Ka 'ta ne au a latou e tusa mo mea katoa a latou ne fai ki a koutou.

²¹“Fatoaga, sa ma'taku, kae fia'fia ona ko mea katoa ne fai ne te Aliki ki a koutou.

²²Manu vae fa o te laukele, sa ma'taku. A malae mouku ko lausiusi; A lakau ko fua, Ka ko uke a mati mo fuagā vine.

²³“Ke fia'fia koutou tino o Siona, Fia'fia ki mea ne fai ne te Aliki te otou Atua mō koutou. Ko oti ne tuku atu ne ia te aofaki 'tau o vaiua i te tau o te uaga muamua.[2] Ko oti ne ligi ifo ne ia te vaiua i te tau moko mō koutou Mo te vaiua o te tau muakiga e pela mo taimi mua.

²⁴A koga tuki saito ka fonu i saito; A lua i tafa o koga'tau vine ka fonu maligiligi i uaina mo sinu olive.

²⁵Ka faka'foki atu ne au a otou mea ne galo i tausaga kola ne kai ei ne sē akelise a otou lakau kaina. Ko au ne uga atu ne au te kautau kona ki a koutou.

²⁶Ka uke a mea e kai ei koutou. Ka ma'lie koutou. Ka viki atu koutou ki te Aliki te otou Atua, Tela ne fai ne ia a mea fakaofoofogia mō koutou. A toku fenua ka se toe itagia ne tino.

²⁷Tena, ka iloa ei ne koutou, e Isalaelu, I au e nofo tasi mo koutou. Ka iloa foki ei ne koutou i a au, te Aliki, Ko te otou Atua kae seai aka foki. A toku fenua ka se toe itagia ne tino.

²⁸“Fakamuli ifo, ka tuku atu ne au toku agaga ki a koutou katoa; A otou tama tagata mo tama fa'fine ka takutaku atu ne latou taku fekau; A otou toeaina ka fai moemiti, Ka ko otou tamataene ka oko ki a latou a fakaasiga.

²⁹I te taimi tena, ka tuku atu foki ne au a toku agaga Ki luga i tavini tagata mo tavini fafine.

³⁰“Ka tuku atu ne au a fakailoga o te aso tena i luga i te lagi, Pela foki i te lalolagi; Ka isi ne fakamaligiga toto, te afi, mo kaumana au.

³¹ Ka pouli te la, Ka ko te masina ka 'kula pela me se toto I mua o te taimi e oko mai ei te aso fakamataku o te Aliki.

³² Ka ko latou kola e ka'laga ki te Aliki mō se fesoasoani ka faka'sao. E pela mo muna te Aliki ne fai, ‘Nisi i Ielusalema ka sola; A latou kola ne filifili ne au ka ola.’ ”